Gikan sa Amon mga Bumalasa

Mountains​—⁠Vital for Life on Earth (Marso 22, 2005) Ang pagkadto sa Grand Tetons isa sa makahalawhaw gid nga hitabo sa akon kabuhi. Apang nahayanghag ako sa nabasa ko kon daw ano ka importante ang mga bukid. Ginaapresyar ko na karon sing labi pa ang importansia sang mga bukid kag ang makadalayaw nga Manunuga nga naghimo sini.

J. G., Estados Unidos

Kon makita ko ang katahom sang mga tinuga ni Jehova, daw indi ko malaragway ang akon mabatyagan. Walay sapayan sang paghalit kag pagdagta sang tawo sa palibot, makaapresyar kag makabenepisyo gihapon ang isa sa mga kabukiran. Nalipay ako nga sugiran ang iban kon ano ang matabo sa dili madugay, subong sang ginsaad sa Salmo 72:16.

R. C., Estados Unidos

Pamangkot sang mga Pamatan-on . . . Ngaa Kinahanglan Ko Himuon ang Pisikal nga Trabaho? (Marso 22, 2005) Nagatrabaho ako sa isa ka kompanya nga nagapamintura nga ginadumalahan sang akon amay, apang may nagsiling sa akon nga sa sini nga obra, indi mo na kinahanglan nga gamiton ang imo ulo. Apang, ginasugid sang artikulo nga sanday Jesus kag Pablo nagpangabudlay sing lakas. Napalig-on ako karon nga magtrabaho sing mas mapagsik pa. Luyag ko nga mangin lantip agod magamit ko ini nga ikasarang sa pagtukod sing Assembly Hall kag Kingdom Hall.

M. Y., Japan

Napalig-on gid ako sini nga artikulo! Nagpahanumdom ini liwat sa akon nga ang aton panguna nga katuyuan sa kabuhi amo ang pag-alagad kay Jehova nga Dios kag ang trabaho nga pilion ko dapat nahisanto sa sini nga katuyuan. Ining maayo gid nga artikulo nagpahulag sa akon nga magmatumato sa mga hilikuton sa sulod sang balay. Labaw sa tanan, ang artikulo nagtudlo sa akon nga mahibaluan ang pagtamod ni Jehova tuhoy sa pagtrabaho sing manumano.

Y. K., Rusya

Life​—⁠An Amazing Assembly of Chains (Enero 22, 2005) Nagapangidaron ako sing 15 anyos. Sa akon klase sa biolohiya, nagtuon kami sing isa ka topiko nga gintawag energy metabolism. Sang gindala ko ini nga magasin sa eskwelahan, gingamit sang akon maestro sa biolohiya ini nga artikulo sa amon klase, nga ginapakita ang mga drowing nga yara sa sini. Pagkatapos sang klase, ang tanan luyag nga makatigayon sini nga magasin. Maathag gid sa sini nga artikulo kon daw ano kaalam si Jehova. Takus gid Sia dayawon. Ginakalangkagan ko gid ang tion nga ang tanan nga buhi nga butang magadayaw kay Jehova!

Y. B., Rusya

“Kon Nahibaluan Lamang Ini sang mga Tawo!” (Enero 8, 2005) Disisiete anyos ako, kag pirme ko ginabinagbinag ang pagsaylo sa isa ka duog nga kinahanglanon ang dugang nga mga manugbantala sang Ginharian. Ang halimbawa ni David nagpalig-on sang akon determinasyon nga magsaylo sa isa ka teritoryo pagkagradwar ko. Palihug padayuna ninyo ang pagbalhag sining makapalig-on nga mga halimbawa. Ang mga kaedad ko nagakinahanglan gid nga palig-unon nga mag-uswag sa hilikuton nga pagbantala.

K. O., Poland

Beinte anyos ako, kag naghibi ako samtang ginabasa ko ini nga artikulo. Sa pensar ko, ‘Kon mapatay ako samtang lamharon pa, wala gid ako sing hinulsulan bangod gin-alagad ko si Jehova sa bug-os ko nga masarangan!’ Handum ko nga mangin bug-os tion nga ebanghelisador sa indi madugay. Ibutang ko sa kuadro ini nga artikulo kag ipakabit sa dingding agod indi ko malipatan ang akon ginbatyag sang ginbasa ko ini. Salamat sa pagbalhag sining dalayawon nga mga eksperiensia.

N. N., Japan