Sa Amon mga Bumalasa

SUGOD sa sini nga gua, may pila ka mga pagbag-o nga makita sa pormat sang Magmata! Apang, bisan may mga pagbag-o, ang kalabanan nga bahin sini amo lang gihapon.

Padayunon gihapon sang Magmata! ang katuyuan sini sa sulod sang mga dekada. Subong sang ginpaathag sa pahina 4, “ini nga magasin ginbalhag para sa kasanagan sang bug-os nga pamilya.” Ang Magmata! padayon nga magapahibalo sa amon mga bumalasa, agod mangin alisto sila sa nagakatabo sa aton palibot paagi sa pag-usisa sang mga hitabo sa kalibutan, pagsugid tuhoy sa mga tawo nga may lainlain nga mga kultura, paglaragway sang kalatingalahan sang pagpanuga, pagbinagbinag tuhoy sa ikaayong-lawas, ukon pagpaathag sang siensia sa mga tawo nga indi pamilyar sa sini.

Sa Agosto 22, 1946 nga gua sini, ang Magmata! nangako: “Ang integridad sa kamatuoran amo ang panguna nga katuyuan sini nga magasin.” Sa pagtuman sina nga pangako, halin sang una ang Magmata! nagapanikasog gid nga makabalhag sing masaligan nga impormasyon. Sa sina nga katuyuan, ang mga artikulo ginapanalawsawan gid sing maid-id kag mahalungon nga ginausisa agod masiguro nga matuod ini. Apang, ini nga dyurnal nagapakita sing “integridad sa kamatuoran” sa mas importante pa nga paagi.

Halin sang una ginapatalupangod sang Magmata! ang Biblia sa mga bumalasa. Apang, sugod sa sini nga gua, ang Magmata! magapresentar sing mas madamo pa gid nga pasad-sa-Biblia nga mga artikulo. (Juan 17:17) Padayon man ang Magmata! nga magapresentar sing mga artikulo nga magapakita kon paano ang praktikal nga laygay sang Biblia makabulig sa aton nga magkabuhi sing malipayon kag madinalag-on sa karon. Halimbawa, madamong pasad-sa-Biblia nga panuytoy ang ginahatag sa serye sang “Pamangkot Sang mga Pamatan-on . . .” kag “Ang Pagtamod Sang Biblia,” nga mangin regular gihapon nga mga artikulo sini nga dyurnal. Subong man, padayon nga ipatalupangod sang Magmata! sa mga bumalasa ang saad sang Biblia nga mahidaiton nga bag-ong kalibutan nga magabulos sa dili madugay sa karon malinapason nga sistema sang mga butang.​—⁠Bugna 21:​3, 4.

Ano pa ang mga pagbag-o? Sugod sa sini nga gua, ang Magmata! ibalhag sing binulan sa halos 82 ka lenguahe (ginabalhag ini anay sing makaduha kada bulan sa madamo nga mga lenguahe).⁠ * Ang “Pagbantay sa Kalibutan,” nga nangin regular nga artikulo sugod sang 1946, yara gihapon sa tagsa ka gua apang isa ka pahina na lang  sa baylo nga duha. Sa pahina 31, idugang man namon ang isa ka makagalanyat nga bahin nga “Ano ang Imo Sabat?” Ano ang ginaunod sini, kag paano mo ini gamiton?

Tan-awa sing makadali ang pahina 31 sini nga gua. Ang pila ka seksion sini nga pahina maluyagan sang lamharon nga mga bumalasa, ang iban naman nga bahin magatilaw sa memorya sang mga may madalom nga ihibalo sa Biblia. Ang bahin nga “San-o Ini Natabo?” magabulig sa imo nga mangin pamilyar sa kon san-o nagkabuhi ang mga tawo nga ginasambit sa Biblia kag kon san-o natabo ang importante nga mga hitabo. Bisan pa nga ang mga sabat sa “Sa Sini nga Gua” masapwan sa bug-os nga magasin, ang sabat sa kalabanan sini nga mga pamangkot masapwan sa isa ka espesipiko nga pahina sa sini man nga gua, diin ipahamtang ini sing pabaliskad. Ngaa indi magpanalawsaw anay antes mo basahon ang mga sabat kag nian ipaambit sa iban ang imo mga natun-an? Mahimo mo man gamiton ining bag-o nga bahin, “Ano ang Imo Sabat?” subong basehan para sa pangpamilya ukon grupo nga paghinun-anon sa Biblia.

Mga 60 ka tuig na ang nagligad, ang Magmata! nangako: “Tuhoy sa mga topiko nga ginahinun-anunan, ini nga magasin magapanikasog nga ipresentar ang impormasyon suno sa pagtamod sang bug-os nga kalibutan sa baylo sang sa lokal lamang. Magaganyat ini sa bunayag nga mga tawo sa tanan nga kadutaan. . . . Ang materyal kag kaundan sini nga magasin . . . makasugid, makatudlo kag makagalanyat sa pinakamadamo nga mga tawo, bata man ukon tigulang.” Ang mga bumalasa sa bug-os nga kalibutan nagaugyon nga gintuman sang Magmata! ina nga pangako. Ginapasalig ka namon nga padayon ini nga himuon sini nga magasin.

Ang mga Manugbalhag

[Nota]

[Mga retrato sa pahina 3]

Gintawag nga “The Golden Age” sang 1919, gin-islan ini sing “Consolation” sang 1937, kag “Awake!” sang 1946

[Mga retrato sa pahina 4]

Sa sulod sang malawig nga tion ginapatalupangod sang “Magmata!” ang Biblia sa mga bumalasa

[Credit Lines]

Guns: U.⁠S. National Archives photo; starving child: WHO photo by W. Cutting