Batan-on nga Kapagsik Tubtob San-o!

ANG tawo sa tupad ni Jesus malapit na mapatay. “Jesus,” pakitluoy niya, “dumduma ako kon magsulod ka sa imo ginharian.” Nagsabat si Jesus: “Sa pagkamatuod ginasiling ko sa imo karon, Mangin kaupod ko ikaw sa Paraiso.” (Lucas 23:​42, 43) Matuod, indi bangod sa balatian sang katigulangon mapatay ining wala ginhingadlan nga tawo; patyon sia bangod sang krimen nga ginhimo niya. Apang, daku nga pagpalig-on ang makuha sang nagatigulang nga mga indibiduwal gikan sa iya desperado nga kahimtangan.

Dalayawon gid ang tumalagsahon nga kompiansa sini nga tawo! Bisan pa malapit na mapatay si Jesus sa usok sang pag-antos sa tupad niya, wala magduhaduha ini nga tawo nga si Jesus magagahom gid subong Hari sa Ginharian sang Dios. Subong man, nangatarungan sia nga dumdumon sia ni Jesus sa pila ka adlaw nga may kahamuot. Hunahunaa lamang​—⁠ining ginpakamalaut nga tawo magabugtaw gikan sa kamatayon sa isa ka matahom nga paraiso, nga pagaharian ni Jesus!

Ang kahimtangan sang katawhan kaanggid man sa sining palatyon nga kriminal. Sa anong paagi? Bisan pila pa ang edad naton, nagabayad kita tanan sang silot sa sala kag nagakinahanglan sing kaluwasan. (Roma 5:12) Kaangay sini nga kriminal makadangop kita kay Cristo Jesus agod makatigayon sing paglaum​—⁠bisan ang paglaum nga madula ang masakit nga mga problema nga tuga sang pagtigulang! Ang matuod, ginatan-ay ni Jesus sa katawhan ang paglaum nga kabuhi nga walay katapusan nga may himpit nga panglawas kag panghunahuna sa isa ka paraiso nga duta.​—⁠Juan 3:​16, 36.

Ang Tanan nga Butang Bag-o Para sa mga Tigulang kag Bata

Sa idalom sang Ginharian ni Cristo ang mga pumuluyo sang duta ‘makasapo gid sing daku nga kalipay sa kabuganaan sang paghidait.’ (Salmo 37:11) Wala sing bisan sin-o ang magasiling: “Nagamasakit ako.” (Isaias 33:24) Ang bisan ano nga diperensia sa lawas nga ginabatas naton madula na, kay “ang piang magataklad subong sang lalaki nga usa, kag ang dila sang apa magaamba sa kalipay.” (Isaias 35:6) Matigayon liwat sang mga tigulang ang ila batan-on nga kapagsik; ang ila unod “mangin linghod pa sangsa pagkapamatan-on.”​—⁠Job 33:25.

 Apang, realistiko bala nga kalangkagan ini nga paglaum? Bueno, hunahunaa ang Isa nga nagtan-ay sang paglaum sa Paraiso sa isa sadto ka palatyon na nga tawo. Madamo nga kahigayunan nga ang kadam-an nagdala kay Jesus sing mga tawo nga piang, baldado, bulag, kag bungol. Malangkagon nga ginpaayo niya ang ‘tanan nga sahi sang balatian kag ang tanan nga sahi sang masakit.’ (Mateo 9:​35, 36; 15:​30, 31; Marcos 1:40-42) Ginpakita niya kon ano ang himuon sang iya Ginharian. Ginbanhaw pa gani ni Jesus ang pila ka tawo nga napatay. (Lucas 7:11-17; Juan 11:38-44) Paagi sa sini, gindugangan niya sing makakumbinsi nga puersa ang iya saad nga “ang tanan nga yara sa handumanan nga mga lulubngan makabati sang iya tingog.”​—⁠Juan 5:​28, 29; Binuhatan 24:15.

Handurawa ang pagbugtaw sa Paraiso nga may bag-o nga lawas, ang panulok matin-aw, ang igdulungog makabati sang mga huni sang mga pispis kag sang malipayon nga mga tingog, ang mga butkon kag mga tiil wala nagapalanakit, kag ang panghunahuna bug-os nga maligdong. Madula na sing dayon “ang mabudlay nga mga adlaw” sang pagtigulang. (Manugwali 12:1-7; Isaias 35:​5, 6) Bisan “ang kamatayon dulaon”​—⁠‘lamunon ini sing dayon.’​—⁠1 Corinto 15:​26, 54.

Ang mga hitabo sa kalibutan karon nga nagasanto sa tagna sang Biblia nagapakita nga sa indi na gid lang madugay ang pagtigulang nga aton nahibaluan karon madula na. (Mateo 24:​7, 12, 14; Lucas 21:11; 2 Timoteo 3:1-5) Sa indi na gid lang madugay ang mga tigulang nga nagtuo sa Dios kag nag-alagad sa iya makatigayon liwat sing batan-on nga kapagsik​—⁠apang sa sini nga tion mangin tubtob san-o ini!

[Kahon/Retrato sa pahina 9]

Iehersisyo ang Utok!

Subong nga ginapabakod sang pisikal nga ehersisyo ang maskulo, ginapapagsik man sang paghanas sa panghunahuna ang utok. Agod mapapagsik ang utok, dapat kita maghimo sing bag-o nga mga butang. Ang masunod amo ang pila ka paagi agod mapasad kag mapabakod ang mga koneksion sang mga selula sang utok.

▪ Mangita sing bag-o nga mga dibersion, subong sang taliambong, iskultura, mga word game, ukon jigsaw kag crossword puzzle; magtuon sing iban nga lenguahe.

▪ Makig-angot sa lainlain nga mga tawo; makighililuong (socialize) kag makig-istorya agod malikawan nga amo lang pirme ang ginahimo kag mabaid ang panghunahuna.

▪ Palambua ang espirituwalidad. “Indi kamo magkabalaka sa bisan ano nga butang, kundi sa tagsa ka butang paagi sa pangamuyo kag pag-ampo nga may pagpasalamat ipahibalo sa Dios ang inyo mga pangabay; kag ang paghidait sang Dios nga nagalabaw sa tanan nga panghunahuna magabantay sa inyo tagipusuon kag sa inyo ikasarang sa paghunahuna paagi kay Cristo Jesus.”​—⁠Filipos 4:​6, 7.

▪ Magbasa sing maayo nga mga balasahon; isugid sa iban ang imo nabasahan.

▪ Hinumduma kag ipaalinton ang mga balita gikan sa radyo ukon TV agod maehersisyo ang imo wala nagadugay kag nagadugay nga memorya.

▪ Gamita ang imo mas maluya nga kamot (ang tuo nga kamot kon walis ka, ukon ang kabaliskaran) kon magpislit sang remote control sang TV, kon magtelepono, ukon kon manipilyo.

▪ Masunson nga gamita kon mahimo ang tanan nimo nga sentido sa bug-os nga adlaw.

▪ Magkuha sing impormasyon tuhoy sa makawiwili nga mga lugar sa malapit ukon sa malayo ukon magduaw sa sini.

[Retrato sa pahina 8, 9]

Nagsaad si Jesus nga sa indi na gid lang madugay madula na ang kasakit sang pagtigulang, kag buslan sang batan-on nga kapagsik tubtob san-o