Ang Pagtamod sang Biblia

Anak Gid Bala sang Dios si Jesus?

MAY tudok gid nga pagpati nga nagsiling si Pedro kay Jesus: “Ikaw ang Cristo, ang Anak sang Dios nga buhi.” (Mateo 16:16) Isa lamang ini sa madamo nga pagsambit sang Biblia kay Jesus subong Anak sang Dios, isa ka ekspresyon nga nagresulta sa nanuhaytuhay nga reaksion sa tunga sang relihioso nga mga tawo.

Madamo sang mga nagapati nga si Jesucristo Dios ang nabudlayan sa pagpaathag kon ngaa ginatawag sia nga Anak sang Dios. Ginapakita sang lohika nga indi mahimo nga sia ang Dios kag sia man ang Anak sang Dios. Ginakabig sang iban si Jesus subong isa ka importante nga persona sa maragtas, isa ka maalam nga tawo, ukon ayhan isa pa gani ka tunay nga manalagna sang Dios, apang tubtob lamang dira. Ano gid bala ang ginatudlo sang Biblia? Importante bala kon ano ang imo ginapatihan?

Panganay nga Anak sang Dios

Ginapakita sang Biblia nga may tion anay nga ang Dios nagaisahanon lamang. Bangod sang iya gugma, nagdesisyon sia nga ipaambit ang dulot nga kabuhi kag nangin isa ka amay​—⁠apang indi sa tawhanon nga kahulugan. Sa baylo, gingamit ni Jehova ang iya di-matungkad nga gahom sa pagpanuga sa pagtuga sing isa ka buhi, intelihente nga espiritu nga persona​—⁠“ang pamuno sang pagpanuga sang Dios,” nga kilala naton subong si Jesucristo. (Bugna 3:14; Hulubaton 8:22) Bangod si Jesus direkta nga gintuga sang Dios sang ang Dios nagaisahanon pa lamang, si Jesus husto nga tawgon nga “bugtong nga anak” kag “ang panganay sa tanan nga tinuga.”​—⁠Juan 1:14; Colosas 1:15.

Kon amo, maathag nga bangod sia ang pinakauna nga gintuga sang Dios, si Jesus indi mahimo nga amo ang Manunuga, “ang lamang nga Dios.” (1 Timoteo 1:17) Sa pihak nga bahin, ginhatagan sang Dios ang iya Anak sing madamo nga pribilehiyo. Halimbawa, paagi kay Jesus, “gintuga [sang Dios] ang tanan iban pa nga mga butang,” lakip pa gani ang mga anghel. Ini nga mga anghel ginapatuhuyan subong mga “anak sang Dios”​—⁠bangod si Jehova  man ang ila Manughatag-Kabuhi.​—⁠Colosas 1:16; Job 1:⁠6; 38:7.

Pagkatapos mahanda ang duta agod puy-an sang tawo, ang Dios, maathag nga nagapakigsugilanon sa iya panganay nga Anak, nagsiling: “Himuon naton ang tawo sa dagway naton.” (Genesis 1:26; Hulubaton 8:22-31) Busa, gintuga man ni Jehova ang una nga tawhanon nga anak sang Dios, si Adan, paagi sa espiritu nga tinuga nga nangin si Jesus.​—⁠Lucas 3:⁠38.

Si Jesus Nangin Tawhanon nga Anak sang Dios

Ginpahayag ni apostol Juan nga sa gintalana nga tion, ang espiritu nga Anak sang Dios “nangin unod kag nagpuyo sa tunga naton.” (Juan 1:14) Agod si Jesus mangin tawo, milagruso nga ginliton sang Dios ang kabuhi ni Jesus halin sa langit pakadto sa taguangkan sang Judiyong ulay nga si Maria. Sa sinang paagi, si Jesus nagpabilin nga Anak sang Dios, walay sapayan nga tawo. Dugang pa, sanglit ang Dios, indi ang bisan sin-o nga tawo, ang naghatag sing kabuhi kay Jesus, si Jesus nabun-ag nga himpit, walay sala. “Ang ibun-ag tawgon nga balaan, Anak sang Dios,” siling ni anghel Gabriel kay Maria.​—⁠Lucas 1:35; Hebreo 7:26.

Ang kompirmasyon nga si Jesus Anak sang Dios sang yari sia sa duta subong tawo naghalin sa Amay mismo. Sa tion sang bawtismo ni Jesus, nasaksihan ni Juan Bautista ang pagbukas sang mga langit kag nabatian ang tingog gikan sa langit nga nagsiling: “Ini ang akon Anak, ang hinigugma, nga ginakahamut-an ko.” (Mateo 3:​16, 17) Indi katingalahan nga ginsugiran ni Juan ang iya mga disipulo: “Nakita ko ini, kag nagpamatuod ako nga ining isa amo ang Anak sang Dios.”​—⁠Juan 1:34.

Sa tion sang iya ministeryo sa duta, wala ginpanugidsugid ni Jesus bisan kay sin-o lang nga sia ang Mesias, ang Anak sang Dios. (Marcos 8:​29, 30) Masami nga ginpabay-an niya ang mga tawo nga sila mismo ang mamat-od paagi sa pagpamati sa iya mga panudlo, paagi sa pagpanilag sa iya pagsinalayo, kag paagi sa pagsaksi sa madamo niya nga mga milagro, nga ang kalabanan sini ginhimo niya sing dayag. Halimbawa, gin-ayo niya “ang tanan nga may malain nga kahimtangan, nga nagaantos sing lainlain nga balatian kag kasakit.” (Mateo 4:​24, 25; 7:​28, 29; 12:15) Ang mga bulag, apa, piang, kag mga balatianon tanan nagkadto kay Jesus, kag gin-ayo niya sila. Nagbanhaw pa gani sia sing mga patay! (Mateo 11:​4-6) Sa atubangan mismo sang iya mga disipulo, milagruso nga naglakat si Jesus sa tubig kag nagpatinong sang hangin kag balod sa tion sang makusog nga bagyo. Ini nga pagpakita sang gahom nagpahulag sa mga disipulo sa pagsiling: “Matuod gid nga ikaw ang Anak sang Dios.”​—⁠Mateo 14:24-33.

Kon Paano Ka Makabenepisyo sa Anak sang Dios

Ngaa ginliton sang Dios ang iya bugtong nga Anak gikan sa langit pakadto sa duta, nga sa ulihi magaagom didto sing mapintas nga kamatayon? “Agod nga ang tagsatagsa nga nagatuo sa iya indi malaglag kundi makatigayon sing kabuhi nga wala sing katapusan.” (Juan 3:16) Huo, ‘mahatag lamang ni Jesus ang iya kalag subong gawad nga kabaylo sang madamo’ paagi sa iya kamatayon. (Mateo 20:28) Sa pagkamatuod, sa bug-os nga maragtas, wala na sing iban pa nga nagpakita sing gugma sa katawhan nga labi pa sa ginpakita ni Jehova kag sang iya panganay nga Anak.​​—⁠Roma 8:⁠32.

Pagkatapos sang iya kamatayon, si Jesus “ginpahayag nga Anak sang Dios” sa paagi nga pinasahi gid kag makahalaylo, “paagi sa pagkabanhaw gikan sa mga patay” pakadto sa kabuhi subong isa ka espiritu nga Anak sang Dios. (Roma 1:⁠4; 1 Pedro 3:18) Nian, pagkatapos sang mapailubon nga paghulat sa tupad sang iya Amay sa sulod sang halos 19 ka siglo, si Jesus ginpalingkod sa trono subong Hari sang Ginharian sang Dios​—⁠isa ka langitnon nga panguluhan nga magagahom sa ulihi sa bug-os napuy-an nga duta.​​—⁠Salmo 2:​7, 8; Daniel 7:​13, 14.

Luyag mo bala matigayon ang kahamuot sining gamhanan nga Anak sang Dios? Kon amo, ginapalig-on ka namon nga usisaon ang iya mga panudlo kag iaplikar ini sa imo kabuhi. Si Jesus mismo nagsiling: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Huo, importante gid kon ano ang ginapatihan sang isa tuhoy sa Anak sang Dios!​​—⁠Juan 3:​18; 14:⁠6; 1 Timoteo 6:⁠19.

NAGPALIBOG KA BALA?

▪ Paano nangin bugtong nga Anak sang Dios si Jesus?​​—⁠Juan 1:​3, 14; Bugna 3:⁠14.

▪ Ngaa makapati ka nga si Jesus Anak sang Dios?​​—⁠Mateo 3:​16, 17.

▪ Paano ka makabenepisyo sa pagpati nga si Jesus amo ang Anak sang Dios?​​—⁠Juan 3:​16; Juan 14:⁠6; 17:3.

[Mga retrato sa pahina 12]

Ang maalamon nga mga panudlo kag makapahulag nga mga milagro ni Jesus nagpamatuod nga indi sia ordinaryo nga tawo