Gikan sa Amon mga Bumalasa

Skin Cancer​​—⁠How to Protect Yourself (Hunyo 8, 2005 nga Awake!) Ang impormasyon sa sining serye maayo gid. Isa ako ka pinuno nga doktor sang isa ka dermatology clinic. Luyag ko makatigayon sing pila ka kopya para ipanghatag ko.

K. W., Denmark

Bangod sini nga artikulo, namat-od ako nga ipatan-aw ang abnormal nga basad nga nagtubo sa akon likod. Siling sang doktor sa akon basi kuno nangin isa ini ka sahi sang kanser nga ginatawag nga Bowen’s disease. Nagpaopera ako gilayon. Ining serye nagbulig sa akon nga maghulag gilayon.

S. M., Japan

Ang kahon sa pahina 7 nagpahulag sa akon nga ipatan-aw ang akon alom sa doktor. Ang resulta sang pagsayasat​—⁠kanser sa panit nga ginatawag melanoma, apang indi pa malala. Subong sang ginsiling sang artikulo, kon wala mabulong dayon ang melanoma, mahimo ini makapatay. Nagapasalamat gid ako sa akon doktor kag sa sining serye sang Awake!, nga ayhan amo ang nagsalbar sang akon kabuhi!

L. S., Estados Unidos

For Family Review (Mayo 8, 2005 nga Awake!) Sang una, ginabasa ko lang ang mga artikulo nga nanamian ko, apang sang nakita ko ang “For Family Review,” ginbasa ko ang bug-os nga magasin para masabat ko ang mga pamangkot. Kag wala magdugay nangin kinabatasan ko na nga basahon ang bug-os nga magasin!

Y. Z., Rusya

Nanamian ako sa sining pahina. Magluwas nga makawiwili, narealisar ko nga kinahanglan ko hatagan sing dugang nga igtalupangod ang akon ginabasa!

D. S., Britanya

Pamangkot sang mga Pamatan-on. . . Ngaa Nagakaganyat Ako sa Di-maayo nga mga Tawo? (Agosto 8, 2005) Bisan pa nga napulo ka tuig na ako nga “madamo pirme sing ginahimo sa hilikuton sang Ginuo,” daw indi ko gihapon malandas ining akon kaluyahon. (1 Corinto 15:58) Narealisar ko nga indi ako hamtong sa emosyon, kag indi ko mahibal-an kon paano lubaron ang problema. Nagapasalamat ako kay Jehova tungod sa mga artikulo kaangay sini, nga nagabulig sa aton nga makapadayon sa sining presente nga kahimtangan.

J. F., Estados Unidos

Ginsambit sa sining artikulo nga ‘indi dapat paglikawan sing bug-os ang wala makahibalo sang mga kamatuoran sang Biblia.’ Mahimo bala ninyo mapaathag ini sing dugang pa? Ano abi kon ang isa ka Cristiano nagapakigsuod sa isa ka di-tumuluo? Dapat bala ini nga kabalak-an?

D. P., Estados Unidos

Sabat sang “Magmata!”: Ang artikulo wala nagapalig-on nga makigsuod ang mga Cristiano sa mga di-tumuluo. Pat-od gid nga bisan sa ano nga kahimtangan, ang prinsipio sa Biblia naaplikar: “Ang malain nga kaupdanan nagadunot sang mapuslanon nga mga batasan.” (1 Corinto 15:33) Apang, wala ini nagakahulugan nga likawan naton sing bug-os ang mga di-tumuluo. Subong sang ginsiling sang artikulo, ginapalig-on kita sang Biblia nga “magbuhat kita sing maayo sa tanan”​—⁠indi lamang sa aton mga masigkatumuluo. (Galacia 6:10) Ang matuod, ang aton mismo Cristianong ministeryo nagakinahanglan nga magpakita kita sing matuod nga interes sa mga tawo kag pakig-angutan sila nga may dignidad kag pagtahod. Si Jesus isa ka maayo nga halimbawa sa sini. Wala sia nakigsuod sa mga tawo nga indi interesado sa paghimo sang kabubut-on sang Dios. (Juan 15:14 ) Apang sa amo man nga tion, nagpalapit sia sa mga tawo kag nakigsugilanon sa ila. Amo kon ngaa nakapanaksi si Jesus sing epektibo. (Halimbawa, basaha ang rekord sang Lucas 7:36-50.) Kaangay ni Jesus, puede naton mahuptan ang matinahuron nga panimuot sa mga di-tumuluo. Ang aton tulumuron amo nga “mangin makatarunganon, nagapakita sing bug-os nga kalulo sa tanan nga tawo.”⁠​—⁠Tito 3:2.