Kon Paano Mo Masalapuan ang Matuod nga Gugma

Ano ang himuon mo agod makakita ka sing gugma kag mangin labi ka hiligugmaon, kag indi lamang sa romantiko nga paagi? Magmanggaranon? Magpatahom?

BANGOD nalimbungan sang mga pasayod kag naimpluwensiahan sang media, masami ginakabig sang mga lalaki kag mga babayi ining mga tulumuron subong solusyon. Sa pagkamatuod, natural lamang nga mangin interesado kita sa aton hitsura, apang ang katahom​—⁠nga temporaryo lamang​—⁠indi amo ang higot sang nagadugay nga paghiusa. Ang manggad indi man solusyon. Ang makabulig gid amo ang pagpakita sing di-makagod nga gugma sa iban. Si Jesus nagtudlo: “Ugalia ang paghatag, kag ang mga tawo magahatag sa inyo.” (Lucas 6:38) Sa simple nga hambal, kon luyag mo higugmaon, magpakita ka sing gugma.

Paano naton ina mahimo? Nagasulat sa idalom sang panuytoy sang balaan nga espiritu sang Dios, ginsabat ni apostol Pablo ina nga pamangkot. Ginpakita niya nga ang gugma aktibo, buot silingon ginapakita ini, indi paagi sa emosyon, kundi panguna na sa kon ano ang ginahimo sini para sa iban kag kon ano ang ginalikawan sini nga himuon. Talupangda ang ginsiling ni Pablo: “Ang gugma mapinasensiahon kag mainayuhon. Ang gugma indi maimon, wala ini nagapahambog, wala nagapahabok, wala nagagawi sing di-nagakaigo, wala nagapangita sang kaugalingon nga kaayuhan, indi maakigon. Wala ini nagaisip sang kahalitan. Wala ini nagakalipay sa kalautan, kundi nagakalipay sa kamatuoran. Ginaantos sini ang tanan nga butang, ginapatihan ang tanan nga butang, ginalauman ang tanan nga butang, ginabatas ang tanan nga butang.”​—⁠1 Corinto 13:4-7.

Ano ang ginabatyag mo kon mainayuhon ang isa ka tawo sa imo ukon kon ginabaton ka niya walay sapayan sang magagmay nga makapaugot nga mga butang nga ginasiling ukon ginahimo mo? Indi bala nga luyag mo mangin suod sa tawo nga nabalaka gid sa imo, nga wala gilayon nagakaakig, kag mapinatawaron kag maminatud-on gihapon bisan pa indi ini mahapos himuon?

Gani, himua ina sa iban. Si Jesus nagsiling: “Busa, ang tanan nga butang nga luyag ninyo nga himuon sang mga tawo sa inyo, dapat man ninyo himuon sa ila.” (Mateo 7:12) Indi pirme mahapos magpakita sing gugma, apang  takus ini panikasugan. Ang isa ka benepisyo amo nga labi ka nga higugmaon sang imo pamilya, mga abyan, tiayon, ukon sang imo palangasaw-on ukon palamanhon. Isa pa, makaagom ka sing kalipay sa paghimo sing husto nga butang, sa paghimo sing mga butang para sa iban. Huo, “may kapin nga kalipay sa paghatag sangsa pagbaton.”​—⁠Binuhatan 20:35.

Magtuon sa Pinakamataas nga Awtoridad

Si Jehova amo ang Dios sang gugma, ang pinakamataas nga awtoridad sa sini. (1 Juan 4:8) Ang iya gugma nagapahulag sa iya nga itudlo ining kinaiya sa tanan nga luyag magtuon. Binagbinaga ang pila ka halimbawa nga prinsipio sa Biblia nga makabulig sa aton nga maghigugma kag higugmaon.

“Magmadagmit sa pagpamati, magmahinay sa paghambal.” (Santiago 1:19) Ginapakita sang surbe sa kapin sa 20,000 ka magtiayon ukon magnobyahanay nga ang pinakamalipayon nga mga tawo amo ang may kahagugma nga maayo nga manugpamati. Ang maayo nga komunikasyon importante gid sa isa ka relasyon. Isa ka propesor sang sociology ang nagsulat: “Kon gusto mo sing masubo nga relasyon, updi ang tawo nga wala sing hinalung-ong kon ano ang imo mga ginaantos. Ukon ang mas malain pa, ang tawo nga may ideya apang indi makahangop kon ngaa nabudlayan ka gid.” Nagsiling pa gid sia nga bisan magkatuhay ang duha ka tawo sa madamo nga paagi, “kon mahinuklugon ang isa ka kahagugma sa imo punto-de-vista kag sa kon paano ka naapektuhan sang imo mga eksperiensia sa kabuhi, nian di-importante inang mga kinatuhayan.”

“Ginapiutan kamo sa inyo kaugalingon mapinalanggaon nga gugma. . . . Magpasangkad.” (2 Corinto 6:​12, 13) Nagabenepisyo kita kon ginapasangkad naton ang aton gugma sa iban. Ang isa ka publikasyon sang Harvard Medical School nagsiling: “Ginapakita sang madamo nga pagtuon nga ang mga tawo nga may maayo nga kaangtanan sa iban​—⁠buot silingon, may makaalayaw nga kaangtanan sa pamilya, mga abyan, kag sa ila komunidad​—⁠mas malipayon, diutay lang sing problema sa panglawas, kag mas malawig ang kabuhi.”

“Binagbinagon naton ang isa kag isa agod pukawon sa gugma kag sa maayong mga buhat.” (Hebreo 10:​24, 25) Ginaimpluwensiahan kita sang aton mga kaupod. Paagi sa paghinguyang sing tion upod sa mga nagapakita sing matuod nga Cristianong gugma, maeksperiensiahan mo mismo ining kinaiya kag matun-an mo kon paano ini ipakita sa imo kabuhi. Ginapanikasugan sang mga Saksi ni Jehova nga ipakita ining gugma sa tunga nila, kay nakahibalo sila nga isa ini ka nagapakilala nga tanda sang matuod nga mga disipulo ni Jesus. (Juan 13:35) Ginaagda ka gid nila nga magtambong sa ila Cristianong mga miting.

Kon nagabatyag ka nga wala sing nagahigugma sa imo, indi ka dapat maluyahan sing buot ukon hukman ang imo kaugalingon. Dumduma nga nakita ni Jehova ang imo kahimtangan. Nadumduman mo bala si Lea, nga ginsambit sa nahauna nga artikulo sining serye? Nakita ni Jehova ang iya kahimtangan, kag nangin iloy sia sang anom ka lalaki kag isa ka babayi​—⁠hamili gid yadto nga pagpakamaayo sang panahon nga ang kabataan gintamod anay nga isa ka malahalon nga panag-iya! Dugang pa, ang tanan nga anak ni Lea nangin katigulangan sang mga tribo sa Israel. (Genesis 29:30-​35; 30:16-​21) Pat-od nga nalugpayan gid si Lea sa mahigugmaon nga kabalaka sang Dios!

Sa bag-ong kalibutan nga ginsaad sa Kasulatan, wala sing bisan isa ang magabatyag nga wala sia ginahigugma. Sa baylo, ang tawhanon nga katilingban mapuno sing matuod nga gugma. (Isaias 11:⁠9; 1 Juan 4:​7-​12) Gani ipakita naton karon nga luyag naton magpuyo didto, paagi sa pagpalambo sang gugma nga ginatudlo sang Biblia kag madugay na nga ginpakita sang Awtor sini. Huo, ang matuod nga kalipay nasandig indi lamang sa pagbaton sang gugma kundi sa pagpakita sang di-makagod nga gugma sa iban.​​—⁠Mateo 5:​46-​48; 1 Pedro 1:⁠22.

[Blurb sa pahina  8]

“May kapin nga kalipay sa paghatag sangsa pagbaton.”​—⁠Binuhatan 20:35

[Retrato sa pahina 8]

Kon luyag mo higugmaon, magpakita ka sing gugma