‘Luyag Ko Mag-alagad sa Dios Antes Ako Mapatay’
‘Luyag Ko Mag-alagad sa Dios Antes Ako Mapatay’
ANG SUGILANON NI MAMIE FREE
SANG 1990 hinali nga nag-inaway sibil sa Liberia. Samtang nagasandukot ang inaway, ang 12-anyos nga si Mamie kag ang iya pamilya gikan sa tribo Krahn nakibon sa ila balay sa Monrovia, ang kapital. “Nakabati kami sing lupok sa tupad-balay,” siling ni Mamie. “Naigo sang misil ang balay sang amon tupad-balay kag nasunog ini. Nagtabok ang kalayo sa amon balay kag nasunog man ini.” Walay sapayan sang nagasandukot nga inaway, sanday Mamie, ang iya iloy, kag ang manghod nga lalaki sang iya iloy nagpalagyo.
“Sa hinali lamang, naigo ako,” hinumdom ni Mamie.
“Nian ang akon iloy namangkot, ‘Ano ang natabo?’”
“Naigo ako! Sa banta ko, naigo ako sang isa ka bala,” sabat ko.
Napukan si Mamie sa duta nga nagawiit sa sobra nga kasakit kag nangamuyo: “Dios ko, palihug pamatii ako. Mahimo nga mapatay na ako, apang luyag ko nga mag-alagad sa imo antes ako mapatay.” Pagkatapos sini nadulaan sia sing pangalibutan.
Sa pagdumdom nga patay na si Mamie, luyag sang mga kaingod nga ilubong sia sa malapit nga baybayon. Apang, nag-insister ang iya iloy nga dalhon sia sa ospital sa ila lugar. Apang, ang ospital kulang sing kagamitan agod mabulong ang nagdagsa nga napilasan nga mga lalaki, mga babayi, kag mga kabataan. Ang tiyo ni Mamie, nga napilasan man, napatay sadto nga gab-i, apang si Mamie nabuhi, nga paralisado halin sa hawak paubos.
Ginadugo gihapon si Mamie sa sulod sang iya lawas kag nagaantos sing tuman nga kasakit. Paglipas sang apat ka bulan, gin-X-ray sia sang mga doktor agod hibaluon kon diin ang bala. Yari ini sa ulot sang iya tagipusuon kag sang iya baga. Delikado gid ang operasyon, gani gindala si Mamie sang iya iloy sa isa ka tradisyunal nga herbalista. “Ginririan niya ako paagi sa labaha,” hinumdom ni Mamie, “kag pagkatapos sini ginsupsop niya ang bala gikan sa pilas. ‘Nakuha ko na,’ siling niya, kag ginluad niya ang bala gikan sa iya baba. Ginbayaran namon sia kag naglakat sia.”
Apang nagbinutig gali sia. Ginpakita sang masunod nga mga X-ray nga yara pa gihapon ang
bala. Gani nagbalik si Mamie kag ang iya iloy sa herbalista, apang napapati niya sila nga siam pa ka bulan ang kinahanglan nga paligaron antes makita sa X-ray nga nakuha na ini. Nagpauli sila kag mapailubon nga naghulat. Sadto man nga tion, lainlain nga bulong ang gin-inom ni Mamie agod maagwanta niya ang kasakit. Pagligad sang siam ka bulan, gin-X-ray sia liwat. Yara gihapon ang bala. Ang herbalista nagpalagyo.Disiotso ka bulan na nga nalubong ang bala sa lawas ni Mamie. Gindala sia sang iya himata sa isa ka siruhano nga babayi. Tigaylo nga makabulig, nagsiling sia nga si Mamie ukon ang iya iloy mahimo nga mapatay sa isa ka gintalana nga adlaw. Si Mamie 13 anyos na karon. “Wala ako sing ginhimo kundi ang maghilibion na lang,” siling ni Mamie. “Apang sang nag-abot ang gintalana nga petsa, wala sing isa sa amon ang napatay.”
Nian gindala si Mamie sang iya tiyo sa isa ka lider sang simbahan nga nagpangangkon nga nakakita kuno sia sing palanan-awon nga nagasugid nga indi bangod sa bala, kundi bangod sa hiwit, kon ngaa naparalitiko si Mamie. Nangako sia nga kon sundon ni Mamie ang ginapanugda niya nga ritwal, makalakat sia liwat sa sulod sang isa ka semana. Panaysayon ni Mamie: “Madamong beses ako nga nagpaligo sa dagat suno sa ritwal, nagpuasa, kag nagligid sa duta kada tungang gab-i nga, kon sumahon, naglawig ini sing madamo nga inoras. Apang ini tanan walay pulos, kay wala gihapon mag-ayo ang akon kahimtangan.”
Sang ulihi, may yara na mga kagamitan sa pagbulong, kag ang bala sa lawas ni Mamie nakuha gid man. Kapin sa duha ka tuig nga nag-antos sia sing tuman nga kasakit. “Pagkatapos sang operasyon,” hinumdom niya, “daw aso lang nga nadula ang tanan nga kasakit, kag ang pagginhawa nangin mas mahapos. Bisan pa paralisado gihapon ang akon tunga nga lawas, makatindog na ako sa bulig sang walker.”
Nasugilanon ni Mamie ang mga Saksi ni Jehova
Pila ka semana pagkatapos sang operasyon, nasugilanon sang iloy ni Mamie ang duha ka Saksi ni Jehova. Bangod nahibaluan niya nga nanamian ang iya anak sa pagbasa sing Biblia, gin-agda niya ang mga Saksi sa ila puluy-an. Gilayon nga ginbaton ni Mamie ang pagtuon sa Biblia. Apang, pagligad sang pila ka bulan, naospital sia liwat kag nautod ang iya komunikasyon sa mga Saksi.
Walay sapayan sini, yara gihapon ang kauhaw ni Mamie sa ihibalo sa Biblia. Gani sang gintanyagan sia sing bulig sang lider sang isa ka relihion, ginbaton niya ini. Sa klase sa Sunday school, ginpamangkot sang isa ka estudyante ang manunudlo, “Magkatupong bala si Jesus kag ang Dios?”
“Huo,” siling sang manunudlo. “Magkatupong sila. Apang si Jesus indi gid tupong sa Dios.”
‘Indi gid tupong?’ pamensar ni Mamie. ‘Indi ko ini mahangpan. Daw indi ini husto.’ Bangod indi sia kumbinsido nga kamatuoran sa Biblia ang iya ginatun-an, wala na makig-upod si Mamie sa amo nga relihion sang ulihi.
Sang 1996 liwat nga nagsingki sa Monrovia. Duha ka katapo sa pamilya ni Mamie ang napatay, kag ang ila balay ginsunog sa ikaduha nga tion. Paglipas sang pila ka bulan, nasugilanon ni Mamie ang duha ka Saksi samtang nagapamalaybalay sila. Ginpadayon ni Mamie ang iya pagtuon sa Biblia. Sang nagtambong sia sa miting sa nahauna nga tion, nakibot sia sang makita niya ang tanan—lakip na ang mga gulang sang kongregasyon—nga nagabinuligay sa pagtinlo sa Kingdom Hall. Sadto man nga tuig, nalipay gid sia nga makatambong sa isa sa “Mga Mensahero Sang Diosnon nga Paghidait” nga Distrito nga mga Kombension, ang
nahaunang daku nga pagtilipon sang mga Saksi ni Jehova nga natambungan niya.“Natandog gid ako,” siling ni Mamie. “Ang mga Saksi may matuod nga gugma sa isa kag isa, bisan pa nga naghalin sila sa lainlain nga tribo. Kag ang tanan organisado gid.”
Pagtuman sa Iya Handum nga Mag-alagad sa Dios
Sang 1998, bangod sang liwat nga pagsandukot sang inaway, napilitan si Mamie kag ang iya iloy nga magpalagyo pakadto sa kaingod nga Côte d’Ivoire, diin nagpuyo sila sa Peace Town Refugee Camp upod sa mga 6,000 pa ka taga-Liberia. Ginpadayon ni Mamie ang iya pagtuon sa Biblia upod sa mga Saksi kag madasig sia nga nag-uswag. Wala madugay, luyag niya ipaambit sa iban ang iya pagtuluuhan. Agod makapakigbahin sia sa publiko nga ministeryo, ginbuligan sia sang iya espirituwal nga mga kauturan paagi sa pagtulod sang iya wheelchair. Sa sining paagi nakapanaksi si Mamie sa madamong iban pa nga mga refugee.
Walay sapayan nga bangod sang iya sablag, nabudlayan sia sa pagkadto sa Kingdom Hall, nga mga anom ka kilometro ang layo sa iya puluy-an, gintambungan ni Mamie ang tanan nga miting. Sang Mayo 14, 2000, naglakbay sia sing kapin sa 190 kilometros agod makatambong sa adlaw sang pinasahi nga asambleya kag agod simbuluhan ang iya dedikasyon sa Dios paagi sa pagpabawtismo sa tubig. (Mateo 28:19, 20) Sa atubang sang madamo nga tawo nga nagalumawlumaw ang mga mata, si Mamie ginhakwat pakadto sa sapa, diin gintugmawan sia. Ang iya nawong malipayon sang nagbutwa sia sa tubig.
Si Mamie nagapuyo karon sa isa ka refugee camp sa Ghana kag ang iya tulumuron amo ang mangin isa ka regular payunir, ukon bug-os tion nga ebanghelisador. Nagtuon man ang iya iloy sa Biblia upod sa mga Saksi ni Jehova kag nagasugid man karon sa iban sang iya natun-an. Malangkagon nila nga duha nga ginahulat ang tion nga ginsaad sang Pulong sang Dios kon san-o “ang piang magataklad subong sang lalaki nga usa, kag ang dila sang apa magaamba sa kalipay.”—Isaias 35:5-7.
[Retrato sa pahina 22]
Ang bala nga nakuha sa lawas ni Mamie
[Retrato sa pahina 23]
Si Mamie ginhakwat pakadto sa sapa agod bawtismuhan
[Retrato sa pahina 23]
Nagadumala sing pagtuon sa Biblia sa iya iloy, nga si Emma