Magkalipay Kamo sa Paglaum

GRABE na ang kanser ni Joe kag ilisipon na lang ang iya kabuhi. Ang iya asawa nga si Kirsten, kag ang pila pa ka abyan yara sa tupad sang iya katre nga nagainistoryahanay. Ginpasiplatan ni Kirsten ang iya bana kag nanutaran niya nga nagapanaligdig ang mga luha sa iya guya. Abi niya sang primero, may ginabatyag nga kasakit si Joe. Ayhan sang una, apang sini nga tinion, ginsugid niya sa iya asawa nga indi ang kasakit ang nagapahibi sa iya.

“Sa sining mabudlay nga tinion,” siling ni Kirsten, “ginalibutan si Joe sang suod nga mga abyan, nga nagkari agod updan sia. Subong man, kompiansa sia karon, labaw sa bisan ano nga tion sa iya kabuhi nga may paglaum sia, kag nahibaluan niya nga indi ini makuha sa iya ni bisan sin-o. Nagtu-ad sia, nga ang iya mga luha, sa kamatuoran, mga luha sang kalipay. Sadto nga gab-i, napatay si Joe.”

Ano nga paglaum ang nagsustenir kay Joe samtang nagagrabe sia? Amo ang ginsaad ni Jehova nga Dios nga kabuhi nga walay katapusan nga may himpit nga panglawas sa paraiso nga duta. (Salmo 37:10, 11, 29) Ang Bugna 21:3, 4 nagasiling: “Ang kayangkayang sang Dios upod sa mga tawo . . . Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang [lakip ang madamo nga problema karon] nagtaliwan.”

May Paglaum Bisan ang mga Patay

Para kay Joe, ang katumanan sang iya paglaum magakahulugan sing pagbalik gikan sa lulubngan. Sa pagkamatuod, nalugpayan gid sia sang saad ni Jesus nga “ang tanan nga yara sa handumanan nga mga lulubngan”—ang mga patay nga natipigan sa memorya sang Dios—magabalik gikan sa pagtulog sa kamatayon. (Juan 5:28, 29) Nasubuan ka bala bangod napatay ang isa ka katapo sang imo pamilya ukon ang imo abyan? Kon amo, mapalig-on ka man sang ginalauman nga pagkabanhaw. Matuod, walay sapayan sini nga paglaum, ginasubuan gihapon kita kon mapatay ang isa ka hinigugma naton. Si Jesus mismo “naghibi” sang mapatay ang iya abyan nga si Lazaro. Apang ginapahaganhagan sang aton paglaum ang kasakit nga aton ginabatyag.—Juan 11:14, 34, 35; 1 Tesalonica 4:13.

“Sang madaug si Joe sang kanser,” siling ni Kirsten, “pagdumdom ko indi na gid ako mangin malipayon liwat. Bisan karon, pagligad sang pila ka  tuig, narealisar ko nga ang akon kabuhi sa sining sistema sang mga butang indi na gid mangin subong sang una. Ginapangita ko gihapon si Joe. Apang, masiling ko sing bunayag nga nakatigayon ako liwat sing malinong nga panghunahuna kag pagkakontento.”

Ang ginsiling ni Kirsten nagapahanumdom sa aton nga sa karon nga sistema sang mga butang, indi naton mapaabot nga mangin malipayon kita sa tanan nga tion. Ang kabuhi may kalipay kag kasubo. Kag may mga tion nga indi gid nagakaigo nga magkalipay kita kundi magkasubo lamang. (Manugwali 3:1, 4; 7:2-4) Subong man, mahimo nga ang pila sa aton nagapakigbato sa depresyon, nga mahimo nanuhaytuhay ang mga kabangdanan. Walay sapayan sini, makalugpay gid ang mga saad sang Biblia, kag ang walay tupong nga kaalam nga masapwan naton sa Biblia makabulig sa aton agod malikawan ang madamo nga tugalbong nga nagaresulta sa kasubo. “Tuhoy sa isa nga nagapamati sa akon,” siling sang Dios, “magapuyo sia nga may kalig-unan kag indi matublag sang kahadlok sa kalamidad.”—Hulubaton 1:33.

Huo, interesado gid si Jehova sa aton daku nga kaayuhan. Luyag niya nga mangin malipayon kita—indi hapaw lamang, kundi tudok gid kag, indi lamang sing pila ka tinuig, kundi tubtob sa walay katubtuban! Busa, ginpamulong sang iya Anak ining wala nagalubad nga mga pulong: “Malipayon ang mga mahunahunaon sang ila espirituwal nga kinahanglanon, kay ila ang ginharian sang langit.” (Mateo 5:3) Maalamon kita kon iaplikar naton ini.

[Kahon/Retrato sa pahina 9]

Siam ka Ingrediente Para sa Kalipay

1. Pagpalambo sing apresasyon sa espirituwal nga mga butang.—Mateo 5:3.

2. Pagkakontento, kag paglikaw sa “gugma sa kuarta.”—1 Timoteo 6:6-10.

3. Pagbutang sang paglipaylipay sa nagakaigo nga lugar sini.—2 Timoteo 3:1, 4.

4. Pagkaalwan, kag paghimo sing mga butang nga magapahalipay sa iban.—Binuhatan 20:35.

5. Pagkamapinasalamaton, kag pagkamainapresyahon sa mga pagpakamaayo nga nabaton mo.—Colosas 3:15.

6. Pagkamapinatawaron.—Mateo 6:14.

7. Maalamon nga pagpili sang imo mga kaupod.—Hulubaton 13:20.

8. Paghalong sa imo lawas kag paglikaw sa malain nga mga bisyo.—2 Corinto 7:1.

9. ‘Pagkalipay sa paglaum’ nga ginasambit sa Biblia para sa imo.—Roma 12:12.

[Mga retrato sa pahina 8, 9]

Makalugpay gid ang napasad sa Biblia nga paglaum nga amo ang kabuhi sa isa ka bag-ong kalibutan