Gikan sa Amon mga Bumalasa

Kon Paano Makakita sing Trabaho kag Mahuptan ini (Hulyo 8, 2005) Ginapasalamatan ko ang inyo panugyan nga mangusisa tuhoy sa tagsa ka oportunidad sa pagtrabaho bisan pa nga daw manubo ini nga trabaho. Sining karon lang, luyag ko magtrabaho na lang sing part-time agod makahinguyang ako sing mas madamo nga tion sa akon Cristianong ministeryo. Apang pislian ako sa obra. Nian gintanyagan ako sing isa pa ka trabaho, nga ginbaton ko. Bisan pa manubo ini nga trabaho, gintinguhaan ko nga mangin kontento sa sini. Ang importante amo nga indi kapoy ang akon hunahuna pagpauli ko sa balay, kag makakonsentrar ako sa akon personal nga pagtuon sang Biblia.

M. I., Japan

May Day—What Does It Mean to You? (Abril 22, 2005) Yara na ako sa ikap-at nga tuig sa hayskul, kag tuigtuig ginahiwat ang May Day nga kapiestahan sa amon eskwelahan. May dress rehearsal, kag ang tanan nga estudyante sa hayskul kag ikalima tubtob ikawalo nga grado ginapatan-aw sini. Amo sini anay ang ginahimo ko, apang ini nga kapiestahan nagtublag sang konsiensia sang akon magulang nga babayi. Ini nga artikulo nakabulig sa akon nga mahangpan nga husto sia! Madamo gid nga salamat. Nag-abot ang artikulo sing husto gid sa tion!

C. C., Estados Unidos

Paglahog Bisan Pa May Balatian (Mayo 8, 2005) Anom ka tuig na nga nagapakigbato ako sa kanser sa obaryo kag pila ka beses na ako nga gin-operahan kag gin-chemotherapy. Kaangay ni Conchi, ginatinguhaan ko gid nga sakdagon ang amon kongregasyon kag tambungan ang tanan nga miting kag kombension tubtob sa masarangan ko. Ang kanser isa ka balatian nga mabudlay pakigbatuan, gani nagapasalamat gid ako sa mga komento ni Conchi kon paano namon nga may mga kanser atubangon ang malain nga balita nga masami mabatian namon halin sa mga doktor. Napalig-on gid ako sang eksperiensia ni Conchi!

B. F., Estados Unidos

May lupus ako, kag isa ka tion temporaryo ako nga naamnisya. Samtang nagapaayoayo, gintinguhaan ko nga mangin palalahog. Sining karon lang, sang naospital ako bangod sang gastritis, amo man gihapon ang ginhimo ko. Nagaugyon ako sa ginhambal ni Conchi nga, “Indi lahuglahog nga magbalatian, apang dapat mo gid tinguhaan nga mangin palalahog.”

M. A., Venezuela

Pagbantay sa Kalibutan (Hulyo 8, 2005) Tuhoy sa artikulo nga may tig-ulo nga “Mga Bitamina kag Kanser,” luyag ko ipatalupangod nga madamo nga nutrisyonista ang wala nagaugyon sa opinyon ni Dr. Sullivan nga ginkutlo. Ginapakita sang di-maisip nga mga report halin sa mga publikasyon sa siensia kag sang madamo nga mga pagtuon nga ang mga substansia nga ginlista ninyo napamatud-an nga mapuslanon sa pagtapna—kag sa pagbulong—sang pila ka sahi sang kanser. Sa banta ko, ang pagbalhag sing may nadampigan nga impormasyon kaangay sini makaapektar sa pagkaneutral sang Magmata!

A. B., Netherlands

Sabat sang “Magmata!”: Subong sang ginsiling sining bumalasa, maathag nga ginapakita sang mga pagtuon nga sa pila ka kahimtangan, ang mga substansia nga ginsambit sa amon artikulo nakabulig sa mga pasyente nga may kanser. Ginakasubo namon nga ang pagbalhag sini nga artikulo nagtuga sing sayop nga paghangop. Ang “Magmata!” wala sing nadampigan kon tuhoy sa mga pagpabulong. Ang pagbalhag namon sang mga impormasyon nahanungod sa panglawas agod binagbinagon sang amon mga bumalasa wala nagakahulugan nga amon ini ginarekomendar. Subong man, kon ginakutlo namon ang isa ka publikasyon ukon ang isa ka eksperto sa partikular nga patag sang pagtuon, nahangpan namon—subong nga amo pirme ang nagakatabo—nga ang iban nga mga publikasyon kag ang iban nga mga eksperto may tuhay nga opinyon. Yara sa amon mga bumalasa ang paghimo sing maalamon nga desisyon kon tuhoy sa ila panglawas.