Ang Pagtamod sang Biblia

Praktikal Bala nga Mangin Mahidaiton?

SA IYA bantog nga sermon, si Jesucristo nagsiling: “Malipayon ang mga makihidaiton.” Nagsiling man sia: “Malipayon ang mga malulo, kay sila magapanubli sang duta.” (Mateo 5:5, 9) Ang pagkamahidaiton wala lamang nagakahulugan nga ang isa wala sing kaaway ukon malinong. Ang mahidaiton nga tawo nagahimo sang una nga tikang nga mangin mainabyanon kag aktibo nga nagapalambo sang paghidait.

Praktikal bala karon ang mga pulong ni Jesus nga ginkutlo sa ibabaw? Nagahunahuna ang iban nga agod magmadinalag-on sa sining moderno nga kalibutan, ang isa dapat kahadlukan, dapat mangin agresibo kag masingki pa gani. Maalamon bala nga balusan man sing kasingki ang kasingki? Ukon praktikal bala nga mangin mahidaiton? Binagbinagon naton ang tatlo ka rason kon ngaa kinahanglan naton pamalandungan ang mga pulong ni Jesus: “Malipayon ang mga makihidaiton.”

▪ KALINONG SANG TAGIPUSUON “Ang malinong nga tagipusuon amo ang kabuhi sang undanon nga organismo,” siling sang Hulubaton 14:30. Ginapakita sang madamo nga report sa medisina nga ang kaakig kag dumot mahimo tunaan sang stroke kag atake sa tagipusuon. Sining karon lang, sang nagkomento ang isa ka balasahon sa medisina tuhoy sa mga tawo nga may balatian sa tagipusuon, ginpaanggid sini ang nagaibwal nga kaakig sa isa ka hilo. Nagsiling pa ang balasahon nga “ang daku nga kaakig mahimo tunaan sang malubha nga balatian.” Apang, ang mga nagatinguha nga mangin mahidaiton makatigayon sing “malinong nga tagipusuon” kag magaani sang mga pagpakamaayo.

Ang isa ka halimbawa sini amo si Jim, 61 anyos nga sa karon isa na ka manunudlo sang Biblia sa isa ka Vietnamese nga komunidad. Sia nagpaathag: “Pagkatapos sang anom ka tuig nga pagsoldado kag tatlo ka misyon sa pagpakig-away sa Vietnam, naeksperiensiahan ko mismo kon paano mangin masingki, maakig, kag mapaslawan. Bangod sang akon inagihan, naapektuhan ang akon tulog. Sang ulihi, naapektuhan man ang akon panglawas bangod sang kahuol kag sang problema sa tiyan kag emosyon.” Ano ang nakabulig sa iya? Sia nagsabat: “Ang pagtuon sa Biblia upod sa mga Saksi ni Jehova amo ang nag-amlig sang akon kabuhi. Sang mahibaluan ko ang katuyuan sang Dios para sa isa ka mahidaiton nga bag-ong kalibutan kag kon paano ko ‘isuklob ang bag-o nga personalidad,’ natigayon ko ang kalinong sang tagipusuon. Gani, nag-ayo gid ang akon panglawas.” (Efeso 4:22-24; Isaias 65:17; Miqueas 4:1-4) Napamatud-an mismo sang iban pasad sa ila kaugalingon nga eksperiensia nga ang pagpalambo sing mahidaiton nga panimuot makabulig sa emosyonal, pisikal, kag espirituwal nga kapagros.—Hulubaton 15:13.

▪ MAS MALIPAYON NGA MGA KAANGTANAN Mangin mas malipayon ang aton mga kaangtanan sa  iban kon mahidaiton kita. Nagsiling ang Biblia nga ang “kaakig kag kasingkal kag sininggitanay kag maparas nga hambal” dapat “kuhaon . . . , kaupod sang tanan nga kalainan.” (Efeso 4:31) Ang mga palaaway masami ginapalayuan sang iban, amo nga wala sila sing mga abyan nga masandigan. Ang Hulubaton 15:18 nagasiling: “Ang masingkal nga tawo nagapaibwal sing pagbanggianay, apang ang makuli sa pagpangakig nagapalugpay sang kasuayon.”

Si Andy, isa ka 42 anyos nga Cristianong gulang sa siudad sang New York, nagdaku sa masingki nga palibot. Sia nagpanugiron: “Walo ka tuig pa lang ako, ginhanas na ako nga mangin boksingero. Indi tawo ang pagkabig ko sa akon mga kontra. Sa baylo, ang akon lang ginapamensar amo ang ‘magsumbag ukon sumbagon.’ Wala magdugay nag-upod ako sa isa ka gang. Pirme kami makakita sing kontra kag nagarambol sa kalye. Naagihan ko nga ginpatumtuman sing pusil sa ulo kag gintayaan sing kutsilyo. Madamo sang akon pagpakig-abyan magamo kag nagaupdanay lamang kami bangod sa kahadlok.”

Ano ang nagpahulag kay Andy nga manikasog nga mangin mahidaiton? Sia nagsiling: “Isa ka adlaw nagtambong ako sa miting nga ginhiwat sa Kingdom Hall sang mga Saksi ni Jehova, kag nabatyagan ko gilayon ang mahigugmaon nga panimuot sang mga tawo didto. Umpisa sadto, ang pagpakig-upod ko sa sining mga tawo nga mahigugmaon sa paghidait nagbulig sa akon sa pagpalambo sing malinong nga tagipusuon, kag sang ulihi sa paglandas sang akon daan nga panghunahuna. Nakatigayon ako sing madamo kag matuod nga mga abyan.”

▪ PAGLAUM SA PALAABUTON Ang pinakaimportante nga rason nga mangin mahidaiton amo sini: Pagpakita ini sang pagpadungog kag pagtahod sa ginpahayag nga kabubut-on sang aton Manunuga. Ang Pulong sang Dios, ang Biblia, nagapalig-on sa aton: “Pangitaa ang paghidait, kag sunda ini.” (Salmo 34:14) Kon kilalahon naton ang pagluntad ni Jehova nga Dios kag nian tun-an kag tumanon ang iya nagaluwas-kabuhi nga mga panudlo, mangin suod naton sia nga abyan. Kon may amo kita sini kasuod nga kaangtanan sa iya, matigayon naton “ang paghidait sang Dios.” Ini ang paghidait nga nagalabaw sa bisan ano nga mga pagtilaw nga mahimo maatubang naton.—Filipos 4:6, 7.

Dugang pa, kon mahidaiton kita mapakita naton kay Jehova kon ano nga sahi sang pagkatawo luyag naton nga mangin amo kita. Mapamatud-an naton sa Dios nga takus kita sa iya ginsaad nga mahidaiton nga bag-ong kalibutan. Kon laglagon niya ang mga malauton, kag ang mga mahagop “magapanag-iya sang duta,” subong sang ginsiling ni Jesus, masaksihan naton ini. Daw ano kadaku nga pagpakamaayo ini!—Salmo 37:10, 11; Hulubaton 2:20-22.

Huo, indi gid mapangduhaduhaan ang praktikal nga importansia sang mga pulong ni Jesus nga “malipayon ang mga makihidaiton.” Matigayon naton ang kalinong sang tagipusuon, mas malipayon nga mga kaangtanan, kag malig-on nga paglaum sa palaabuton. Maagom naton ining mga pagpakamaayo kon himuon naton ang aton bug-os nga masarangan nga “magpakighidait sa tanan nga tawo.”—Roma 12:18

[Mga retrato sa pahina 28]

“Nag-ayo gid ang akon panglawas.”—Jim

[Mga retrato sa pahina 29]

“Nakatigayon ako sing madamo kag matuod nga mga abyan.”—Andy