Gikan sa Amon mga Bumalasa

Cooperation—Vital to Life (Septiembre 8, 2005 nga Awake!) Ginaako ko nga sang una ko nga nakita ang panghapin sini nga isyu, wala ako maghunahuna nga mangin interesado ako sa topiko. Walay sapayan sini, ginbasa ko ang bug-os nga artikulo, kag nanamian gid ako! Samtang ginabasa ini, madamong beses nga nagdulog ako kag nagpasalamat kay Jehova bangod sang iya makatilingala nga pagpanuga. Makalilipay nga makita kon paano nagabuligay ang mga sapat.

B. K., Estados Unidos

Pamangkot sang mga Pamatan-on . . . Paano Ko Malikawan nga Madalahig sa Di-maayo nga mga Tawo? (Septiembre 8, 2005) Naganyat ako sa “di-maayo” nga tawo nga wala gid nakapanggamot sa kamatuoran. Ini nga impormasyon nagbulig sa akon nga mahangpan ang katalagman sang pagpakig-upod sa tawo nga maluya sa espirituwal. Makapalig-on gid nga mahibaluan nga nagaulikid si Jehova sa aton. Salamat gid sa sining sibu sa tion nga bulig.

A.B.K., Zambia

Ini nga artikulo nagpahangop sa akon sang kinahanglanon nga bag-uhon ko ang akon mga kaupdanan. Bisan pa nga mabudlay ini, ang artikulo—nga pirme ko ginabutang sa duog nga madali ko makab-ot kag mabasa—padayon nga nagapalig-on sa akon. Salamat sa inyo bulig kag pagpalig-on sa amon nga mga pamatan-on.

L. R., Estados Unidos

Ang Pagtamod sang Biblia—Dapat Ka Bala Mangamuyo kay Birhen Maria? (Septiembre 8, 2005) Nanamian gid ako sa inyo nga mga Saksi ni Jehova bangod indi kamo salawayon kag daku ang nabulig sang inyo mga magasin sa akon. Apang, ngaa nasiling ninyo nga indi kita dapat mangayo sing bulig kay Maria? Sia ang nagapatunga para sa aton sa Amay, agod maangkon naton ang paghidait.

E. R., Espanya

Sabat sang “Magmata!”: Subong sang ginpaathag sang artikulo, ang Biblia wala nagatugot nga mangamuyo kita sa iban magluwas lamang sa Dios. Suno sa Katoliko nga pari kag manunulat nga si Andrew Greely, “ang mga butang nga nagasimbulo kay Maria nagaangot sing direkta sang Cristianismo sa dumaan nga mga relihion sang iloy nga mga diosa.” Gani, ang pagsimba kay Maria wala naghalin sa mga Cristiano, kundi sa mga pagano. Mahimo bag-o ini nga panghunahuna sa madamo namon nga bumalasa, gani ginapalig-on namon sila nga usisaon ang Biblia agod mahibaluan kon ano gid ang ginatudlo sini. Madamo sang mga Saksi ni Jehova ang mga Katoliko anay, apang sang gintun-an nila ang Pulong sang Dios, nahangpan nila nga indi luyag sang Dios nga mangamuyo kita paagi kay bisan sin-o magluwas kay Jesucristo, ang lamang nga manugpatunga naton. (Hebreo 7:25). Para sa dugang nga impormasyon, tan-awa ang libro nga “Ano Gid ang Ginatudlo Sang Biblia?” * Ang kapitulo 15, nga may tig-ulo nga “Ang Pagsimba nga Nahamut-an Sang Dios,” nagabinagbinag sang kabilinggan sang pagpahisanto sang aton mga ginapatihan sa Balaan nga Kasulatan.

Palalahog Bisan Pa May Balatian (Mayo 8, 2005) Napatay ang akon asawa sang Disiembre 2002 bangod sang balatian sa atay. Mga walo ka bulan sia nga nag-antos. Pero, nagahambal sia pirme sing positibo nga mga butang kag nagasaysay sing mga eksperiensia nga makapakadlaw sa imo. Tubtob sa iya kamatayon, nagpabilin sia nga positibo. Pagkatapos ko mabasa ini nga artikulo, nahangpan ko kon ngaa. Kinahanglan niya nga mangin positibo subong nga kinahanglan man ini namon. Kaangay kay Conchi, mahimo nga nakabulig gid ini sa iya. Salamat sa pagbulig ninyo sa akon nga mahangpan kon ngaa amo sadto ang nangin panimuot sang akon asawa.

D. H., Estados Unidos

Gikan sa Amon mga Bumalasa Ginakalangkagan ko gid pirme ang artikulo nga “Gikan sa Amon mga Bumalasa.” Kon kaisa samtang ginabasa ko ang sulat sang iban, sa pensar ko, ‘Amo man sini ang ginabatyag ko!’ Kon kaisa naman ginapamangkot ko ang akon kaugalingon, ‘Nabasahan ko bala ini nga punto sa artikulo?’ Nian, ginabasa ko liwat ining artikulo, kag sa masami naluyagan ko ini kag napalig-on ako sini.

M. T., Japan

[Nota]