Ang Pagtamod sang Biblia

Isa Bala ka Persona ang Balaan nga Espiritu?

ANO ang balaan nga espiritu sang Dios? Suno sa nagabukas nga mga pinamulong sang Biblia, ang balaan nga espiritu—nga ginbadbad man nga “aktibo nga kusog sang Dios”—“nagagiho pakadto-pakari sa kadaygan sang mga tubig.” (Genesis 1:2) Samtang ang Dios ginalaragway sang rekord tuhoy sa bawtismo ni Jesus subong nga sa “mga langit,” ang balaan nga espiritu nakita nga ‘nagapanaug kay Jesus kaangay sa salampati.’ (Mateo 3:16, 17) Dugang pa, ginpatuhuyan ni Jesus ang balaan nga espiritu subong “mananabang.”—Juan 14:16.

Bangod sini kag sang iban pa nga mga teksto sa Biblia, ang iban naghinakop nga ang balaan nga espiritu isa ka persona, subong man nga ang Dios, si Jesus, kag ang mga anghel indibiduwal nga mga espiritu nga persona. Sa katunayan, mga siniglo na nga ginatudlo sang dalagku nga mga relihion sang Cristiandad nga ang balaan nga espiritu isa ka persona. Walay sapayan sining madugay na nga doktrina, madamong miembro sang simbahan ang nagamuhan gihapon, kag ang iban wala gani nagaugyon sa mga lider sang ila relihion. Halimbawa, suno sa isa ka surbe sining karon lang, 61 porsiento sang mga gin-interbyu ang nagapati nga ang espiritu sang Dios “isa ka simbulo sang presensia ukon gahom sang Dios apang indi ini isa ka buhi nga persona.” Apang, ano ang ginasiling sang Biblia?

Ang Ginasiling sang Biblia

Ang isa ka bunayag nga bumalasa sang Biblia mapahulag gid sa paghinakop nga ang balaan nga espiritu indi pareho sa paglaragway sang simbahan sa sini subong isa ka persona. Binagbinaga ang masunod nga rekord sa Biblia.

1. Sang nagduaw si Maria, nga iloy ni Jesus, sa iya pakaisa nga si Elisabet, ang Biblia nagasiling nga ang wala pa mabun-ag nga lapsag sa taguangkan ni Elisabet nagkibo, “kag si Elisabet napuno sing balaan nga espiritu.” (Lucas 1:41) Husto bala pamensaron nga ang isa ka persona ‘mapuno’ sang isa pa ka persona?

2. Sang nagsiling si Juan Bautista sa iya mga disipulo nga si Jesus amo ang magabulos sa iya, si Juan nagsiling: “Nagabawtismo ako sa inyo . . . sa tubig . . . , apang ang isa nga nagakari sunod sa akon mas gamhanan sangsa akon, kag indi ako takus sa paghukas sang iya mga sandalyas. Inang isa magabawtismo sa inyo . . . sa balaan nga espiritu.” (Mateo 3:11) Wala gid ginpatuhuyan ni Juan ang balaan nga espiritu subong isa ka persona sang nagsiling sia nga ang mga tawo ginabawtismuhan sa sini.

3. Sang nagduaw sa isa ka opisyal sang Romanong hangaway kag sa iya panimalay, si apostol Pedro nagsiling nga si Jesus ginhaplasan sang Dios “sing balaan nga espiritu kag gahom.” (Binuhatan 10:38) Pagkatapos sadto, “nagkunsad ang balaan nga espiritu” sa panimalay sang opisyal. Ang rekord nagasiling nga madamo ang natingala “bangod ang wala bayad nga dulot nga balaan nga espiritu ginpasagahay man sa mga tawo sang mga pungsod.” (Binuhatan 10:44, 45) Sa liwat, ang termino nga gingamit diri wala nagahisanto sa ideya nga ang balaan nga espiritu isa ka persona.

Kinaandan na para sa Pulong sang Dios nga ipersonipikar ang mga butang nga indi persona. Nagalakip ini sa kaalam, paghantop, sala, kamatayon, kag di-bagay nga kaayo. (Hulubaton 8:1–9:6; Roma 5:14, 17, 21; 6:12) Si Jesus mismo nagsiling nga ang “kaalam ginapamatud-an nga matarong paagi sa tanan nga anak sini,” ukon sa maayong mga resulta sini. (Lucas 7:35) Maathag  nga ang kaalam indi isa ka persona nga may literal nga mga anak! Sing kaanggid, ang pagpersonipikar sa balaan nga espiritu sa pila ka halimbawa wala nagakahulugan nga isa ini ka persona.

Ano ang Balaan nga Espiritu?

Sa Biblia, ang balaan nga espiritu sang Dios ginapakilala subong ang gahom sang Dios nga nagapanghikot. Gani, ang isa ka sibu nga pagbadbad sa Hebreo nga teksto sa Biblia nagapatuhoy sa espiritu sang Dios subong “aktibo nga kusog sang Dios.” (Genesis 1:2) Ini nga ideya ginasuportahan sa bug-os nga Biblia.—Miqueas 3:8; Lucas 1:35; Binuhatan 10:38.

Tuhay sa ginapatihan sang madamo nga tawo, ang Dios wala pirme sa tanan nga lugar. Sa baylo, nagapuyo sia sa espiritu nga duog, sa isa ka “establisado nga duog nga puluy-an.” (1 Hari 8:39; 2 Cronica 6:39) Ginasambit man sang Kasulatan ang isa ka espesipiko nga duog diin nagapuyo ang Dios kag yara ang iya “trono.” (1 Hari 22:19; Isaias 6:1; Daniel 7:9; Bugna 4:1-3) Apang, gikan sa iya “establisado nga duog nga puluy-an,” magamit niya ang iya aktibo nga kusog agod malab-ot ang tanan nga hilit sang espirituwal kag pisikal nga mga duog.—Salmo 139:7.

Sadtong 1879, nagakaigo nga gin-ilustrar sang iskolar sang Biblia nga si Charles L. Ives ang ikasarang sang Dios sa paggamit sang iya gahom gikan sa isa ka pat-od nga duog. Nagsulat sia: “Halimbawa, nagasiling kita, ‘Buksi ang bintana, kag pasudla ang adlaw sa hulot.’ Wala naton ginapatuhuyan ang literal nga adlaw, kundi ang silak sang adlaw, nga nagahalin sa adlaw.” Sing kaanggid, indi kinahanglan nga maglakbay ang Dios padulong sa mga duog diin luyag niya gamiton ang iya aktibo nga kusog. Ginagamit lamang niya ang iya balaan nga espiritu, nga makalab-ot sa mga kaukbungan sang tinuga. Ang paghangop sa kon ano gid ang balaan nga espiritu—ang gamhanan nga aktibo nga kusog sang Dios—makahatag sa imo sing pagsalig nga tumanon ni Jehova ang iya mga saad.

NAPALIGBAN MO NA BALA?

▪ Ginatudlo bala sang Biblia nga ang balaan nga espiritu isa ka persona?—Binuhatan 10:44, 45.

▪ Ano ang balaan nga espiritu?—Genesis 1:2.

▪ Daw ano kalayo ang malab-ot sang balaan nga espiritu sang Dios?—Salmo 139:7.