Ang Pagtuo sang Isa ka Bata

SI Dustin nagaupod kon ginatun-an sing Biblia ang iya iloy sang isa sa mga Saksi ni Jehova. Bisan pa 11 anyos lamang sia, nagapamensar sia sing maayo kag kadalom sang iya mga pamangkot. Wala magdugay, nangabay sia nga magtuon man sa Biblia upod sa misyonera nga nagatudlo sa iya iloy. Ginapaambit man niya ang iya mga natun-an sa iya mga kabutho.

Nagtambong dayon si Dustin sa mga miting sa Kingdom Hall sa ila lugar, kag nagakomento man sia kon ginapangabay nga makigbahin ang mga tumalambong. Sang ginduaw nila sang iya mga manghod ang ila amay, luyag sang ila amay nga ululupod sila tanan nga magsimba. Ginpaathag ni Dustin kon ngaa mas gusto niya nga sa Kingdom Hall makadto. Nagpasugot ang iya amay kag nagsiling ini nga tugutan niya si Dustin nga magtambong didto.

Isa ka gab-i pagkatapos sang miting sa Kingdom Hall, ginpangita sang iya iloy si Dustin. Wala makahibalo ang iya iloy nga nagpalapit sia sa manugtatap sang Teokratikong Eskwelahan Para sa Ministeryo kag nangabay nga magpalista sa eskwelahan. Nagpasugot ang iya iloy. May kalangkag gid nga naghulat sia para sa iya una nga bahin. Apang, sa amo man nga tion, may nabatyagan sia nga grabe nga kasakit sa iya balikawang, gani gindala sia sa nanuhaytuhay nga mga doktor agod ipakonsulta. Sang ulihi, nag-abot gid man ang ginakalangkagan nga tion para sa una nga bahin ni Dustin sa Kingdom Hall. Sa sini nga tion, nagasaklay na sia. Bisan pa nga makita nga ginasakitan sia, wala sia magsaklay pakadto sa plataporma.

 Wala madugay sa tapos sini, nasayasat nga may Ewing’s sarcoma si Dustin, nga isa ka talagsahon nga sahi sang kanser sa tul-an. Ginhinguyang niya ang halos kabug-usan sang masunod nga tuig sa isa ka ospital para sa mga bata sa San Diego, sa California. Si Dustin nakaagi sang chemotherapy, radiasyon, kag sang ulihi gin-utod ang iya tuo nga tiil kag sipit, apang wala sini nabuhinan ang iya mabakod nga pagtuo kag gugma kay Jehova. Kon indi na gid niya masarangan nga magbasa, ginabasahan sia sang iya iloy nga halos wala gid nagabiya sa iya tupad.

Bisan pa nagalala ang kahimtangan ni Dustin, wala gid sia nagareklamo. Masako gihapon sia, nga nagalagawlagaw sakay sa iya wheelchair nga nagapalig-on sa iban nga mga pasyente kag sa ila mga ginikanan, lakip ang isa man ka Saksi nga pasyente. Nakita sang mga empleyado sang ospital nga tuhay gid si Dustin kag ining isa pa ka pamatan-on nga Saksi nga pasyente—nga ang ila pagtuo nagapabakod sa ila.

Luyag ni Dustin nga magpabawtismo. Gani, samtang nagahigda sia sa sopa, kay indi na sia makapungko, ginrepaso sang Cristianong mga gulang upod sa iya ang mga pamangkot para sa mga kandidato sa bawtismo sang mga Saksi ni Jehova. Sang Oktubre 16, 2004, sa edad nga 12 kag tunga, ginbawtismuhan si Dustin sa isa ka sirkito nga asambleya.

Sang manugsugod na ang pamulongpulong para sa bawtismo, si Dustin nagbuylog sa iban pa nga kandidato sa bawtismo sakay sa iya wheelchair. Sang ginpangabay nga magtindog, si Dustin nga suksok ang iya pinakamaayo nga panapton, nagtindog sa iya isa na lang ka tiil, nga nagapanukod sa halambuyan sang iya wheelchair. Ginsabat niya ang mga pamangkot para sa bawtismo sa mabaskog kag maathag nga tingog. Nagtambong ang tanan nga katapo sang iya pamilya, pati ang amay ni Dustin kag ang iya manding. Yara man ang mga empleyado sang ospital kag ang mga ginikanan sang may kanser nga kabataan.

Pagkadason nga adlaw, ginbalik sa ospital si Dustin. Ang kanser naglapta na sa tanan niya nga tul-an. Samtang labi sia nga nagaluya kag nabatyagan niya nga dali na lang sia mapatay, ginpamangkot niya ang iya iloy kon bala nagatagumatayon na sia. “Ngaa nagapamangkot ka?” siling sang iya iloy, “nahadlok ka bala mapatay?”

“Wala,” sabat niya. “Piyungon ko lang ang akon mga mata, kag kon magmuklat ako sa pagkabanhaw, daw kaangay lang nga bag-o lang ako nagpiyong. Indi na ako masakitan pa liwat.” Dayon nagsiling sia, “Nabalaka lang ako sa akon pamilya.”

Si Dustin napatay pagkadason nga bulan. Ang iya lubong ginkumpanyaran sang mga doktor, mga nars, mga pamilya sang mga empleyado sa ospital, mga manunudlo, mga kaingod, kag siempre, sang pamilya ni Dustin—yadtong mga Saksi ni Jehova kag bisan sang indi mga Saksi. Nagpangabay si Dustin nga panaksihan ang tanan nga nagtambong sa iya lubong tuhoy sa iya pagpati. Ang manugtatap sa Teokratikong Eskwelahan Para sa Ministeryo, nga nag-asayn kay Dustin sang iya bahin, naghatag sang ekselente kag makapalig-on sing pagtuo nga diskurso sa madamo nga tumalambong nga ang iban nagatilindog na lang.

Ang duha sa paborito nga mga teksto ni Dustin gin-imprinta para sa mga nagkumpanyar—ang Mateo 24:14 kag 2 Timoteo 4:7. Ang iya mabakod nga pagtuo kag integridad nagpalig-on gid sa mga nakakilala sa iya. Ginalauman naton nga abiabihon sia sa pagkabanhaw.—Panugiron sang Saksi nga nagdumala sing pagtuon kay Dustin.

[Blurb sa pahina 27]

“Nakapakig-away ako sang maayo nga pag-away, nadalagan ko ang dalaganon tubtob sa katapusan, natuman ko ang pagtuo.”—2 Timoteo 4:7

[Retrato sa pahina 26]

Sa ibabaw: Si Dustin, sang mapagros pa sia

[Retrato sa pahina 26]

Sa idalom: Si Dustin nga ginbawtismuhan sa edad nga 12 1⁄2