Ang Pagtamod sang Biblia

Mangin Anghel Bala ang mga Tawo Kon Mapatay?

ANG isa ka bata nga babayi nga si Argyro napatay sang pito pa lamang ka tuig ang iya edad. Tuman gid ang kalisod sang iya mga ginikanan samtang ginatan-aw nila sia nga nagahamyang sa lungon, nga napanaptan sing puti. Agod pahaganhaganon ang ila kasubo, ginsilingan sila sang ministro: “Luyag sang Dios ang isa pa ka anghel, kag ginkuha Niya si Argyro agod makaupod niya. Karon ang iya kalag nagalupadlupad sa palibot sang trono sang Labing Gamhanan.”

Madamo nga tawo ang nagapati nga ang mga anghel amo ang mga kalag sang napatay nga mga tawo, bisan pa diutay lang nga mga relihion ang nagasakdag sini nga pagpati. Ginapalapnag sang media ini nga ideya sa mga pelikula kag sa mga serye sa telebisyon tuhoy sa patay na nga mga tawo nga nangin mga anghel bangod mabinuligon sila kag ginaamligan nila ang mga buhi.

Napat-od mo gid bala nga mangin mga anghel ang imo mga hinigugma kon mapatay sila? Ano ang ginatudlo sang Biblia tuhoy sa sini? Agod masabat ini, repasuhon anay naton kon ano gid ang ginasiling sang Balaan nga Kasulatan tuhoy sa pagkahuman sang mga anghel kag ang aktual nga kahimtangan sang mga patay.

Mga Anghel—Pinasahi nga mga Tinuga

Ang mga anghel di-makita kag gamhanan nga mga alagad sang Dios nga nagapuyo sa duog sang mga espiritu. Ang ila pagluntad indi kontrolado sang tawo. Ang mga anghel mga espiritu nga tinuga sang Dios. Ang Biblia nagasiling: “Magdayaw [ang mga anghel] sang ngalan ni Jehova; kay sia mismo nagsugo, kag gintuga sila.”—Salmo 148:2, 5.

Ang Biblia nagapahayag nga minilyon ka matutom nga mga anghel nga tinuga, lakip ang mga serafin kag mga kerubin, ang matinumanon nga nagaalagad sa pinasahi nga mga katungdanan suno sa ila mga ranggo kag mga asaynment. (Salmo 103:20, 21; Isaias 6:1-7; Daniel 7:9, 10) Kinahanglan gid bala nga mapatay anay ang mga tawo agod mapaluntad sang Dios ining mga anghel? Ang matuod, daw imposible gid ini. Ngaa?

Ginapakita sang Biblia nga ang mga anghel madugay na nga gintuga antes ang mga tawo. Sang gintuga ni Jehova ang duta nga pagapuy-an sang ulihi sang tawo, ang mga anghel—nga mabinalaybayon nga ginapatuhuyan subong mga kabugwason—‘nagdungan sa paghugyaw sa kalipay kag nagsinggit sa pagdayaw.’ (Job 38:4-7) Gani, nagaluntad na sila sa sulod sang malawig nga tion antes pa gintuga ang tawo.

Dugang pa, ang mga anghel kag mga tawo magkatuhay gid sa pagkahuman kag katungdanan sa katuyuan ni Jehova. * Gintuga sang Dios ang tawo nga “kubos sangsa mga anghel,” gani ang espiritu nga mga tinuga nagakaigo lamang kabigon nga labaw sa tawo, nga mas may ikasarang sa paghunahuna kag gahom. (Hebreo 2:7) Ang “nagakaigo nga puluy-an” sang mga anghel amo ang langit. (Judas 6) Tuhoy naman sa mga tawo, orihinal nga katuyuan  sang Dios nga ang tawo magkabuhi sing dayon sa duta. (Genesis 1:28; 2:17; Salmo 37:29) Kon nagmatinumanon sa Dios ang una nga mag-asawa, wala kuntani sila mapatay. Nian, halin sa ginsuguran ang mga tawo kag mga anghel nagakalipay kuntani sa ila nanuhaytuhay nga katungdanan sa katuyuan sang Dios.

Ano ang Nagakatabo sa Kamatayon?

Ang pila pa ka importante nga pamangkot nga dapat naton binagbinagon amo: Ano ang nagakatabo sa napatay nga tawo? Padayon bala sila nga nagaluntad sa tuhay naman nga porma, ayhan subong anghel sa duog sang mga espiritu? Ang Biblia may simple kag maathag nga sabat: “Ang mga buhi nakahibalo nga mapatay sila; apang nahanungod sa mga patay, wala sila makahibalo sing bisan ano.” (Manugwali 9:5) Gani, kon ang tawo mapatay wala na sia nagaluntad. Ang patay indi na makahibalo, makabatyag, kag makaeksperiensia sing bisan ano.

May paglaum pa bala ang mga patay? Huo! Ginapakita sang Biblia nga ang paglaum sang kalabanan nga napatay amo ang pagkabanhaw. Ang kalabanan nga nagkalamatay pagabanhawon subong mga tawo sa isa ka paraiso nga duta.—Lucas 23:43; Juan 5:28.

Ang pila ka tawo may paglaum nga mabanhaw sa kabuhi sa langit. Ang ila kadamuon diutay lamang—144,000 tanan. Apang, ining 144,000 pinasahi sangsa mga tinuga nga ginatawag mga anghel. Halimbawa, ang 144,000 magagahom subong di-mamalatyon nga mga hari kag saserdote kaupod ni Cristo. May awtoridad sila nga maghukom. (1 Corinto 6:3; Bugna 20:6) Mga lapsag bala sila nga nagkalamatay? Indi. Mga sumulunod sila ni Cristo nga bug-os nga nakalampuwas sa mga pagtilaw!—Lucas 22:28, 29.

Binagbinaga man ang kinatuhayan sang patay nga mga tawo kag sang nagakabuhi nga mga anghel. Ang patay nga mga tawo “wala makahibalo sing bisan ano,” samtang ang mga anghel may pangalibutan, may balatyagon, kag may ikasarang nga magbuot. Mga tinuga sila nga may kahilwayan sa pagpili. (Genesis 6:2, 4; Salmo 146:4; 2 Pedro 2:4) Ang patay ginalaragway nga “wala sing gahom,” samtang ang mga anghel “gamhanan sa kusog.” (Isaias 26:14; Salmo 103:20) Kag samtang ang kaliwatan ni Adan nagakapatay subong resulta sang sala kag pagkadihimpit, ang mahinadlukon sa Dios nga mga anghel himpit, kag may bug-os nga kahamuot ni Jehova.—Mateo 18:10.

Ang ideya nga ang mga anghel kalag sang napatay nga mga tawo mahimo nangin topiko sang isa ka himuhimo nga programa sa TV ukon pelikula, apang ini nga pagpati wala gid ginasakdag sang Kasulatan. Ang mga kamatuoran sa Biblia nga ginapaathag sa ibabaw nagabulig sa aton nga malikawan ang sayop nga pagpati tuhoy sa madangatan sang aton nagkalamatay nga mga hinigugma. Kag ginapasalig kita sang Biblia nga ang matutom nga mga anghel—gintuga subong mga indibiduwal kag gamhanan nga mga alagad sang Dios—labaw sangsa mga tawo, kag pirme sila handa sa paghimo sang kabubut-on ni Jehova. Sing makalilipay, ang katuyuan sang Dios nagalakip sa paggamit sa mga anghel agod bantayan kag buligan ang mga hanuot nga nagatahod kay Jehova kag luyag nga alagaron sia.—Salmo 34:7.

[Footnote]

NAGPALIBOG KA BALA?

▪ Ang imo bala napatay nga mga hinigugma mga anghel na karon nga nagaalagad sa Dios sa langit?—Manugwali 9:5, 10.

▪ Ang mga bata bala nagakapatay bangod luyag sang Dios ang dugang pa nga mga anghel?—Job 34:10.

▪ Makabalik bala ang mga patay agod amligan ang mga buhi?—Isaias 26:14.

[Blurb sa pahina 29]

“Magdayaw [ang mga anghel] sang ngalan ni Jehova; kay sia mismo nagsugo, kag gintuga sila.”—Salmo 148:2, 5