Pamangkot sang mga Pamatan-on . . .

Paano Ko Mabuligan ang mga Nagakinahanglan?

“Kon makatapos na ako sa pag-eskwela, kuntani makatrabaho ako subong elektrisyan. Luyag ko nga magbulig sa pagtukod sang mga Kingdom Hall.”​—Tristan, 14.

“Ari ang 20 dolyares para sa bag-o nga imprintahan. Allowance ko ini, pero luyag ko nga ihatag ini sa inyo.”​—Abby, 9.

SA SINING tion nga ang iban nagalaragway sa mga pamatan-on nga maiyaiyahon, madamo sining pamatan-on—lakip ang mga ginkutlo sa ibabaw—ang nagapakita nga indi tanan subong sini. Sa tunga sang mga Saksi ni Jehova, madamo nga mga pamatan-on ang nagagamit sang ila tion, kusog, kag pagkabutang agod alagaran ang iban. (Salmo 110:3) Binagbinaga ang pila pa ka halimbawa.

Wala madugay nga napatay ang iya lola, ang siete anyos nga si Jirah nga taga-Australia nakabaton sing $50 halin sa iya lolo. Gin-ano ni Jirah ang kuarta? Sa masunod nga miting sa kongregasyon, ginhulog niya ini tanan sa kahon alamutan. Ngaa? “Damo na ang akon hampanganan, apang isa lang ang akon lola,” paathag ni Jirah sa iya iloy. “Nahibaluan ko nga luyag ni Lola nga iamot ko ini nga kuarta, kay ginahigugma gid niya si Jehova.”

Ang lima-ka-tuig nga si Hannah nga taga-Estados Unidos mahuyugon sa mga kabayo. Luyag niya nga magbakal sing kulukabayo, nga nagabili sing $75. Agod matudluan sia sang kapuslanan sang pagkinot, ginahatagan kon kaisa si Hannah sang iya mga ginikanan sing kuarta nga ihulog niya sa iya alkansiya. Wala madugayi, nakasupot si Hannah sing kuarta nga iguigo na ibakal sing kulukabayo.

Apang, sa amo man nga tion, ginlaslasan sang Bagyo Katrina ang Gulf Coast. Nabalaka si Hannah sa mga biktima, gani nagdesisyon sia nga iamot ang iya tanan nga sinuptan—kapin sa $100—agod mabuligan sila. Si Hannah nagsulat sa ulong-talatapan sang mga Saksi ni Jehova: “Luyag ko ihatag sa inyo ini nga kuarta bangod ginahigugma ko si Jehova kag luyag ko makabulig.” Natalupangdan bala ni Jehova ang kaangay sini nga  kaalwan? Ang Biblia nagasiling: “Dili malimot sa paghimo sing maayo kag sa pagpaambit sang mga butang sa iban, kay sa amo nga mga halad nahamuot gid ang Dios.”—Hebreo 13:16.

Ang bata nga si Tiffany, nga taga-Estados Unidos man, nakig-angot sa ulong-talatapan sang mga Saksi ni Jehova pagkatapos makaduha nga ginbagyuhan ang Florida sang 2004. “Kami sang akon manghod nga si Timothy luyag mag-amot sing $110,” sulat niya. “Ang amon balay wala gid man maguba, apang nakita namon ang ginhimo sang bagyo sa iban nga mga balay. Luyag namon nga makabulig, gani ginsupot namon ang amon kuarta. Si Timothy nakasupot sing $10 sa iya pagbulig sa pagpangkakas sing drywall sa isa ka balay, kag nakatipon man ako sing $100.” Si Tiffany 13 anyos, kag ang iya manghod nga si Timothy siete anyos lamang! Ano ang nagakatabo kon ginauna naton ang interes sang iban sangsa aton? Ang Hulubaton 11:25 nagasiling: “Ang isa nga nagabunyag sing bugana sa iban bunyagan man sing bugana.”

Ang isa ka grupo sang mga pamatan-on nga Saksi sa Estados Unidos, nga halin sa 4 tubtob 15 anyos, nakabalita nga ang ila mga masigkatumuluo sa Aprika nagakinahanglan sing mga Kingdom Hall. Gani nagdesisyon sila nga magbulig. “Nagbaligya kami sing mga biskwit kag mga mamon sa isa ka garage sale, kag nakaganar kami sing $106.54. Ginhambalan namon ang mga tawo nga ang kuarta gamiton sa mga duog tilipunan sa Aprika agod ang mga tawo makatuon tuhoy sa Biblia. Madamo ang nagbakal. Siam ka oras kami nga nagbaligya, apang takus gid ang amon panikasog—para ini kay Jehova!”

 Makabulig Ikaw

Ang mga pamatan-on nga ang mga eksperiensia ginsambit bag-o lang nakahibalo nga matuod gid ang ginsiling ni Jesus: “May kapin nga kalipay sa paghatag sangsa pagbaton.” (Binuhatan 20:35) Mahimo mo man mabatyagan ang kalipay sa paghatag. Sa anong mga paagi?

May nabalitaan ka bala nga nagakinahanglan sing bulig ang mga masigkatumuluo? Halimbawa, may natabo bala nga kalamidad? Handurawa kon ano ang imo batyagon kon madulaan ka sing puluy-an, pagkabutang, ukon ayhan mapatyan pa gani sang isa ka hinigugma. Si apostol Pablo nagsulat nga ang mga Cristiano dapat ‘magtuon sang ila mata, indi sa personal nga interes sang ila kaugalingon lamang nga mga butang, kundi sa personal man nga interes sang iban.’ (Filipos 2:4) Bisan pa nga malayo ka sa natabuan sang kalamidad, mahimo ka makaamot para sa panikasog sa pagbulig nga ginahimo sang mga Saksi ni Jehova. *

May madamo pa nga paagi nga makabulig ka sa mga nagakinahanglan. Halimbawa, kon ikaw isa sa mga Saksi ni Jehova, ngaa indi magpanghulonghulong sa inyo Kingdom Hall? May yara bala mga may-edad ukon iban pa nga nagakinahanglan sing bulig? Makabulig ka bala sa ila mga ulubrahon? Si apostol Pablo nagsulat sa mga taga-Roma: “Sa utudnon nga gugma magpakita kamo sing mapinalanggaon nga balatyagon sa isa kag isa. Sa pagpadungog sa isa kag isa manguna kamo.” (Roma 12:10) Kon may makita ka nga bululigan, nian, magmatumato. Mangin handa sa pag-obra bisan sang kubos nga mga ulubrahon. Kag dumduma nga ang pag-alagad sa iban naangot sa pag-alagad sa Dios. Ang Biblia nagasiling: “Sia nga nagapakita sing kaluoy sa imol nagapahulam kay Jehova, kag bayaran Niya sia sa iya ginabuhat.”—Hulubaton 19:17.

Siempre pa, ang labing daku nga paagi sa pagbulig sa iban amo ang pagpaambit sang imo nahibaluan tuhoy sa Pulong sang Dios, ang Biblia. Si Jesus nagsiling: “Ini nagakahulugan sing kabuhi nga wala sing katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” (Juan 17:3) Karon, labi na gid nga kinahanglan nga mabatian sang mga tawo ang nagaluwas kabuhi nga mensahe sang kamatuoran gikan sa Biblia. Gani, padayon nga makigbahin sing regular kag sing makugi sa pagbantala nga hilikuton, nga nagasalig nga ‘ang imo pagpangabudlay indi wala sing pulos.’—1 Corinto 15:58.

Ang dugang pa nga artikulo sa serye sang “Pamangkot Sang mga Pamatan-on  . . .” masapwan sa Web site nga www.watchtower.org/ype

[Nota]

HUNAHUNAA

▪ May mahunahuna ka bala nga nagakinahanglan sing bulig?

▪ Ano ang mahimo mo agod makabulig?

[Blurb sa pahina 25]

“Dili malimot sa paghimo sing maayo kag sa pagpaambit sang mga butang sa iban, kay sa amo nga mga halad nahamuot gid ang Dios.”​—Hebreo 13:16.

[Kahon/​Mga retrato sa pahina 24, 25]

NGAA TUN-AN ANG PAGHATAG?

“Bangod nakita ko nga ginagamit sang akon mga ginikanan ang ila tion kag kusog sa pag-alagad kay Jehova kag sa ila mga isigkatawo, luyag ko man nga mangin kaangay nila. Ginsilingan ako ni tatay: ‘Bisan daw ano man ini kadiutay, ang ano man nga ginhimo mo para kay Jehova magapadayon. Si Jehova nagakabuhi sing dayon, kag dumdumon niya ini sing dayon. Apang, ang pagkabuhi para sa imo kaugalingon lamang wala sing pulos. Kon mapatay ka, ang imo ginhimo mapatay man kaupod mo.’”—Kentaro, 24, Japan.

“Ang matuod, ginatamaran gid ako magbulig sa mga may-edad sa ila mga ulubrahon sa balay kon Sabado sang hapon. Luyag ko magpangalipay upod sa akon mga katubotubo. Apang, kon makig-upod ako sa mga may-edad, nanamian man ako. Kon ginahimo ko ini, makilala ko ang mga tawo nga kaangay ko, nangin pamatan-on man sang una. Nagapahulag ini sa akon nga buligan sila.”—John, 27, Inglaterra.

“Sang pamatan-on pa ako, nagabulig ako sa pagpaninlo sang Kingdom Hall kag sa iban pa nga mga hilikuton. Nanamian man ako magbulig sa iban nga mga katapo sang kongregasyon. Kon buligan mo ang iban, makita mo ang ila kalipay. Halimbawa, isa ka bes nagbulig ako sa pagbutang sing wallpaper sa apartment sang isa ka may-edad na nga utod nga babayi. Daku gid ang iya kalipay! Kon mapahalipay mo ang iban, malipayon ka man.”—Hermann, 23, Pransia.

[Retrato sa pahina 24]

Madamo nga pamatan-on ang nagaamot sing kuarta agod buligan ang mga biktima sang kalamidad