Ang Pagtamod sang Biblia

Mabuligan Mo Bala ang mga Patay?

“Halin sang una ang Simbahan . . . nagapangamuyo para sa [mga patay] . . . agod, kon maputli na sila, makita nila ang Dios.”​—“Katekismo sang Katoliko nga Simbahan.”

ANG mga tawo sang tanan nga rasa nagakabalaka sa kahimtangan sang mga patay. Ayhan nagkasubo ka gid kag nagbatyag sing daku nga kadulaan sang napatay ang imo isa ka hinigugma. Mahimo nagapalibog ka kon bala ang mga patay may hinalung-ong gihapon, kon bala nagaantos sila ukon yara sa kalinong, kag kon bala may mahimo ka agod mabuligan sila.

Madamong relihioso nga mga tawo ang nagapati nga mabuligan nila ang mga patay. Halimbawa, ang mga Hindu nagapati nga paagi sa pagsunog sang bangkay sang ila hinigugma sa pangpang sang Suba Ganges kag sa pagsabwag sang abo sini sa tubig, mapat-od nila ang dayon nga kalipay sang kalag sang napatay. Sa Sidlangan, nagasunog ang mga Budhista sing papel nga mga salakyan, balay, panapton, kag kuarta, sa pagpati nga magamit ini sang napatay sa pihak nga kalibutan. Sa Aprika, ginaula ang alkoholiko nga mga ilimnon sa kilid sang lulubngan, sa pagpati nga ini nga halad makahatag sing kaayuhan sa mga patay.

Ginatudlo sang Katolisismo nga kon mapatay ang isa ka tawo nga wala makahinulsol sang iya pila ka “mortal nga sala,” isikway sia sang Dios. Ini nga kahimtangan “ginatawag ‘impierno.’” Sa pihak nga bahin, ginatudlo man nila nga ang ginakahamut-an sang Dios mahimo makatigayon sang “labaw kag bug-os nga kalipay” upod sa Dios sa langit, apang pagkatapos lamang nga maputli sia sing bug-os. Ang pagputli mahimo magkinahanglan nga magpabilin anay sia sa purgatoryo agod mapaidalom sa “pagtinlo paagi sa kalayo” subong silot sa iya mga kasaypanan nga mapatawad pa. Apang,  samtang yara sia sa purgatoryo mahimo sia mabuligan sang mga pangamuyo para sa iya—mga pangamuyo nga ginahimo sang Katoliko nga simbahan—kag paagi man sa mga Misa para sa napatay. Ini nga mga serbisyo kinaandan nga ginabayaran sang mga abyan kag kaparyentehan sang napatay.

Natural lamang nga himuon mo ang imo bug-os nga masarangan agod mapahaganhagan ang pag-antos sang imo mga hinigugma. Kon mahimo pa sila mabuligan, indi bala nga dapat ipaathag sang Dios kon paano ini himuon? Tan-awon naton kon ano ang mga ginatudlo sang Biblia tuhoy sa pagbulig sa mga patay.

Ang Kahimtangan sang mga Patay

Ang tanan nga kinabatasan nga ginsambit bag-o lang napasad sa pagpati nga ang kalag di-mamalatyon, nga ini, bahin sang isa ka tawo kag nagapadayon sa pagkabuhi kon mapatay na ang iya pisikal nga lawas. Amo bala sini ang ginatudlo sang Biblia? “Ang mga buhi nakahibalo nga mapatay sila,” siling sini, “apang nahanungod sa mga patay, wala sila makahibalo sing bisan ano ukon may padya pa sila, bangod ang ila handumanan nalimtan. Subong man, ang ila gugma kag dumot kag kaimon nadula na, kag wala na sila sing bahin tubtob sa walay katubtuban sa bisan anong butang nga himuon sa idalom sang adlaw. Ang tanan nga makita nga himuon sang imo kamot, himua ini sa imo gahom, kay sa Sheol nga imo ginakadtuan walay buluhaton ukon pahito ukon ihibalo ukon kaalam.” (Manugwali 9:5, 6, 10) Ang Sheol amo ang Hebreong tinaga para sa kinaandan nga lulubngan sang katawhan.

Tuhoy sa epekto sang kamatayon sa hinalung-ong sang tawo, ang inspirado nga salmista nagsulat: “Ang iya espiritu nagagua, nagabalik sia sa iya duta; sa amo nga adlaw nagakawala ang iya mga hunahuna.”—Salmo 146:4.

Masaligan kag rasonable ang ginasiling sang Biblia. Ano sa banta mo? Luyag bala sang isa ka mahigugmaon nga amay nga mag-antos ang iya mga kabataan bangod sang ila napanubli nga kahimtangan? (Genesis 8:21) Siempre indi gid. Gani, ngaa himuon ini sang aton langitnon nga Amay? Sang ang pila sa Israel sang una naghimo sang paganong rituwal nga pagsunog sang ila kabataan subong halad sa butig nga mga dios, ginpakamalaut ni Jehova ining makangilidlis nga buhat, kag nagsiling sia nga ini ‘isa ka butang nga wala niya ginsugo kag wala gid nag-abot sa iya tagipusuon.’—Jeremias 7:31.

Ang sala sang tawo nagresulta sa kamatayon, indi sing pagpaantos pagkatapos sang kamatayon. “Ang bayad nga ginabayad sang sala amo ang kamatayon,” suno sa Kasulatan, kag “sia nga napatay nahilway na sa iya sala.”—Roma 5:12; 6:7, 23.

Ang mga patay wala nagaantos. Sa baylo, daw nagatulog sila sing mahamuok, nga wala sing hinalung-ong—wala nagabatyag sing kalipay ukon iban pa nga balatyagon. Busa wala sing duhaduha nga ang pagtinguha sang mga tawo nga buligan ang mga patay supak gid sa mga panudlo sang Biblia.

Ano ang Paglaum sang mga Patay?

Indi buot silingon sini nga ang inyo napatay nga mga hinigugma magapabilin nga walay hinalung-ong sing dayon. Sa baylo, masanag ang ila palaabuton.

Antes banhawon ang iya hinigugma nga abyan nga si Lazaro, si Jesus nagsiling nga ‘pukawon niya sia sa katulugon.’ (Juan 11:11) Sa isa pa ka hitabo ginpaathag niya nga “ang tanan nga yara sa handumanan nga mga lulubngan makabati sang iya tingog kag magagua.” (Juan 5:28, 29) Ang ginbanhaw nahilway na sa ila nagligad nga mga sala kag busa indi na nila kinahanglan nga mag-antos pa para sa ila nahimuan antes sila napatay. May paglaum pa sila nga matigayon ang himpit nga kahimtangan. Makalilipay gid ini nga palaabuton!

Kon luyag mo gid ini nga paglaum, indi mangalag-ag sa pag-usisa sang pagkamasaligan sini nga mga saad. Malipay gid ang mga Saksi ni Jehova sa pagbulig sa imo.

NAPALIGBAN MO NA BALA?

▪ May hinalung-ong pa bala ang mga patay?—Salmo 146:4; Manugwali 9:5, 6, 10.

▪ Tugutan bala sang Dios nga mag-antos ang mga patay sa kalayuhon nga impierno?—Jeremias 7:31.

▪ May paglaum pa bala ang mga patay?—Juan 5:28, 29.