Ang Dios Nagaulikid Gid!

ANG daku nga gugma sang Dios para sa kada isa sa aton kag ang iya pag-ulikid para sa aton palaabuton makita sa kon paano niya ginhusay ang pagrebelde nga nagsugod sa Eden. Binagbinaga palihug ang masunod nga mga pamatuod nga nagaulikid gid ang Dios sa aton, kag basaha ang ginsambit nga mga kasulatan sa imo kopya sang Biblia.

❖ Gin-aman niya ang duta, nga dagaya sa kinaugali nga katahom, makawiwili nga kasapatan, kag mapatubason nga mga uma.—Binuhatan 14:17; Roma 1:20.

❖ Ginhatagan niya kita sing makatilingala nga lawas agod malipay kita sa aton ginahimo adlaw-adlaw, subong sang pagtilaw sa manamit nga pagkaon, pagtan-aw sa pagtunod sang adlaw, pagpamati sa udyak sang isa ka bata, kag pagbatyag sa pag-angga sang isa ka hinigugma.—Salmo 139:14.

❖ Ginhatagan niya kita sing maalamon nga panuytoy nga nagabulig sa aton agod malubad ang mga problema kag mga pag-ipit.—Salmo 19:7, 8; 119:105; Isaias 48:17, 18.

❖ Ginhatagan niya kita sing makalilipay nga paglaum, lakip na ang paglaum nga mabuhi sa paraiso sa duta kag makita ang pagbanhaw sa aton napatay nga mga hinigugma.—Lucas 23:43; Juan 5:28, 29.

❖ Ginpadala niya ang iya bugtong nga Anak agod mapatay tungod sa aton kag agod paagi sini, may paglaum kita nga mabuhi sing dayon.—Juan 3:16.

❖ Gintukod niya ang Mesianiko nga Ginharian sa langit kag ginhatagan niya kita sing madamo nga pamatuod nga magagahom ang Ginharian sa bug-os nga duta sa dili madugay.—Isaias 9:6, 7; Mateo 24:3, 4, 7; Bugna 11:15; 12:10.

❖ Ginaagda niya kita nga magpalapit sa iya sa pangamuyo, nga ginapautwas sa iya ang aton balatyagon, kag kon himuon naton ini nagapamati gid sia.—Salmo 62:8; 1 Juan 5:14, 15.

❖ Sulit-sulit nga ginapasalig niya sa mga tawo ang iya tudok nga gugma kag pag-ulikid.—1 Juan 4:9, 10, 19.