Pamangkot sang mga Pamatan-on . . .

Paano Ko Malandas Ini nga Batasan?

“Nagsugod ako sa paghimo sing masturbasyon sang otso anyos ako. Sang ulihi natun-an ko ang pagtamod sang Dios tuhoy sini. Nahuya gid ako kada makahimo ako sini. ‘Paano mahigugma sang Dios ang isa nga kaangay ko?’ pamangkot ko sa akon kaugalingon. Sigurado gid ako nga indi ako makasulod sa bag-ong kalibutan sang Dios.”—Luiz. *

KAANGAY ni Luiz, ayhan indi mo man mapunggan ang paghimo sing masturbasyon. Nahibaluan mo nga mahamuot sa imo si Jehova kon ginbatuan mo ang kailigbon kag nagpakita ka sing pagpugong sa kaugalingon, nga isa ka bunga sang balaan nga espiritu sang Dios. (Galacia 5:22, 23; 2 Pedro 1:5, 6) Apang kon kaisa, nagakapaslawan ka. Sa tagsa ka tion nga magbalik ini nga batasan, nagabatyag ka nga daw wala ka na gid sing mahimo, nga indi mo gid masunod ang matarong nga mga talaksan sang Dios.

Amo sina ang pagtan-aw sang pamatan-on nga si Pedro sa iya kaugalingon. “Sa tagsa ka tion nga magbalik ining batasan, nahuya gid ako,” siling niya. “Sa banta ko indi na mapatawad ang akon sala. Nabudlayan ako sa pagpangamuyo. Ginaumpisahan ko ini paagi sa pagsiling: ‘Jehova, indi ako sigurado kon pamatian mo ining pangamuyo, apang . . .’” Amo man sini ang ginhunahuna sang isa ka pamatan-on nga lalaki nga si André. “Nagbatyag ako nga isa ako ka salimpapaw,” siling niya. “Pagbugtaw ko sa aga, daw wala na ako gana magbangon kag atubangon ang mga hilikuton sa sina nga adlaw. Nabudlayan ako sa pagtambong sa Cristianong mga miting ukon sa pagpakigbahin sa ministeryo.”

Kon ang ginabatyag mo kaangay sang ginbatyag nanday Luiz, Pedro, ukon André, magpakabakod ka. Indi lamang ikaw ang may amo sini nga problema, kag may paagi agod malandas mo ini! Madamo nga pamatan-on—kag mga hamtong—ang nagpakig-away anay sa masturbasyon kag nalandas nila ini. Sarang mo man ini malandas. *

Pagpakigbato sa Balatyagon nga Nakasala

Subong sang nasambit na, ang may mga problema sa masturbasyon masami nasubuan gid bangod sang balatyagon nga nakasala. Walay duhaduha nga  ang “pagkasubo sa diosnon nga paagi” makahatag sa imo sing motibasyon nga untaton ining batasan. (2 Corinto 7:11) Apang ang pagbatyag sing tuman nga kasubo wala sing mahimo nga maayo. Makapaluya ini sang imo buot amo nga daw luyag mo na lang mangampo.—Hulubaton 24:10.

Busa, panikasugi nga tamda sing husto ang mga butang. Ang masturbasyon isa ka sahi sang kahigkuan. Mahimo ka sini himuon nga “ulipon sa sarisari nga mga kailigbon kag mga kinalipay,” kag nagapalambo ini sang panimuot nga makapalain sa hunahuna. (Tito 3:3) Walay sapayan sini, ang masturbasyon indi isa ka mabug-at nga seksuwal nga imoralidad, subong sang pakighilawas. (Efeso 4:19) Busa, kon problema mo ang masturbasyon, indi ka dapat maghunahuna nga nakahimo ka sing sala nga indi na mapatawad. Ang solusyon amo ang pagbato sa kailigbon kag indi mangampo sa imo pagpakig-away!

Kon kaisa mahimo ka maluyahan sing buot kon magbalik liwat ini nga batasan. Kon matabo ina, dumduma ang ginasiling sang Hulubaton 24:16: “Ang matarong mahimo mapukan bisan sing makapito, kag pat-od nga magabangon sia; apang ang mga malauton masandad bangod sang kalamidad.” Ang umalagi nga kapaslawan wala nagahimo sa imo nga isa ka malaut nga tawo. Busa indi ka dapat mangampo. Sa baylo, analisaha kon ngaa napaslawan ka, kag tinguhai nga likawan ang mga butang nga nagdul-ong sa paghimo sini.

Sa baylo nga padayon nga mulayon ang imo kaugalingon, hatagi sing tion ang pagpamalandong sa gugma kag kaluoy sang Dios. Ang salmista nga si David nga nagbatyag man sing kasubo bangod sang iya mga kaluyahon, nagsiling: “Subong sang amay nga nagakaluoy sa iya mga anak, si Jehova nagakaluoy sa mga nagakahadlok sa iya. Kay sia gid nakahibalo sang aton pagkahuman, nagadumdom nga kita yab-ok.” (Salmo 103:13, 14) Huo, ginahatagan ni Jehova sing konsiderasyon ang aton pagkadihimpit kag “handa [sia] magpatawad” kon makasala kita. (Salmo 86:5) Sa pihak nga bahin, luyag man niya nga manikasog kita nga mag-uswag.

Anong praktikal nga mga tikang ang mahimo mo agod mauntat ang masturbasyon kag malikawan nga mapaslawan liwat?

Ang Balor sang Pagtu-ad

Walay sapayan sang publisidad nga ginahatag sa sekso sa madamo nga pungsod, madamo gihapon nga tawo ang nabudlayan makighambal tuhoy sa sekso sa serioso kag talahuron nga paagi. Sa imo bahin, ayhan nabudlayan ka nga makigsugilanon tuhoy sa sini nga topiko bisan sa isa nga ginasaligan mo bangod nahuya ka. Ang isa ka Cristiano nga nagpakig-away sa masturbasyon sa sulod sang madamo nga tuig nagkomento: “Kon nangin maisog lang  kuntani ako nga nakigsugilanon sa iban tuhoy sini sang pamatan-on ako! Madamo nga tinuig ako nga gintublag sang balatyagon nga nakasala, kag naapektuhan gid sini ang akon kaangtanan sa iban kag, labaw sa tanan, kay Jehova.”

Kay sin-o ka dapat makighambal? Ang pinakamaayo nga sugilanunon mo amo ang isa nga hamtong sa espirituwal, mas maayo kon ang imo mismo ginikanan. Puede ka magsugod paagi sa pagsiling: “Puede ko bala ikaw masugilanon tuhoy sa isa ka problema nga nagatublag gid sa akon?”

Namat-od si Mário nga sugilanunon ang iya amay, nga nangin mahinuklugon kag mahinangpanon gid. Gin-ako pa gani niya kay Mário nga nakig-away man sia anay sa sini nga batasan sang bata pa sia. “Napalig-on gid ako bangod sa pagkabunayag kag pagkasinsero sang akon amay,” siling ni Mário. “Nangatarungan ako nga kon nalandas niya ini, mahimo ko man ini. Natandog gid ako sa panimuot sang akon amay amo nga nakahibi ako.”

Maisugon nga namat-od si André nga makigsugilanon sa isa ka Cristianong gulang, kag nalipay sia nga ginhimo niya ini. * “Samtang ginapamatian ako sang gulang, nagalumawlumaw ang iya mata,” siling ni André. “Sang nakatapos na ako, ginpasalig niya ako nga ginahigugma ako ni Jehova. Ginhambalan niya ako nga kinaandan lamang ang akon problema. Nangako sia nga pirme niya ako kamustahon may kaangtanan sini kag hatagan niya ako sing dugang pa nga impormasyon gikan sa mga bulig sa pagtuon sa Biblia. Pagkatapos ako makigsugilanon sa iya, determinado ako nga padayunon ang akon pagpakig-away—bisan pa kon magbalik liwat ang akon batasan.”

Kaangay ni Mário kag ni André, makasapo ka man sing bulig sa imo mga panikasog nga malandas ang batasan nga masturbasyon. Sunda ang laygay sa kahon nga “Makigbato!” Huo, makasalig ka nga sarang mo madaug ang pagpakig-away!

Ang dugang pa nga mga artikulo sa serye sang “ . . .” masapwan sa Web site nga www.watchtower.org/ype

[Mga nota]

HUNAHUNAA

▪ Ngaa importante nga dumdumon nga si Jehova “handa magpatawad”?—Salmo 86:5.

▪ Ano nga mga tikang ang dapat mo himuon agod mauntat ang batasan nga masturbasyon?

▪ Ngaa indi ka dapat mahuya nga mangayo sing bulig?

▪ Paano mo matuon sing maayo ang imo panghunahuna sa matinlo nga mga butang?

[Kahon/Retrato sa pahina 19]

Ang Pagbalik sang Batasan Wala Nagakahulugan sing Kapierdihan!

Daw ano kahapos maghunahuna: ‘Napaslawan ako, gani maayo pa nga mauntat na lang ako.’ Awaya ina nga panimuot. [Indi pagtuguti ang temporaryo nga pagbalik, ukon bisan ang madamo pa nga pagbalik sang imo batasan, nga magpierde sa imo.]

Binagbinaga ining ilustrasyon: Kon nagasaka ka sa hagdan kag nahulog ka sing isa ukon duha ka halintang bangod [nakadanlog] ka, magarason ka bala, ‘Mabalik na lang ako sa puno sang hagdan kag magsaka liwat’? Sa pagkamatuod indi! Ti, ngaa, abi nga gamiton mo ining sayop nga pangatarungan sa pag-away [sa malain] nga mga buhat?

Ang pagbatyag nga nakasala masami nga nagasunod sa tapos magbalik ang isa ka malain nga [batasan]. Mahimo nga pasobrahan mo ini nga balatyagon paagi sa paghinakop nga walawala gid ikaw, nga ikaw maluya kag indi takus sa bisan anong butang nga maayo. Indi pagtuguti ang imo kaugalingon nga magpabilin sa sini. Ginakuha sini ang imo kusog nga kinahanglan mo sa pagpadayon liwat sang imo pagpakig-away. Kag dumduma ini: Ang labing daku nga tawo nga naglakat sa sini nga duta, nga si Jesucristo, nagkari agod tubuson ang mga makasasala, indi ang himpit nga mga tawo. Gani wala sing isa sa aton ang himpit nga magahimo sang mga butang sa sini nga tion.—Gikan sa Magmata! Abril 8, 1991, pahina 14.

[Kahon/Retrato sa pahina 20]

Makigbato!

▪ Pilita nga ituon ang imo panghunahuna sa iban nga butang.—Filipos 4:8.

▪ Likawi ang pagtan-aw sa mga butang nga magapukaw sang imo sayop nga mga kailigbon.—Salmo 119:37.

▪ Mangamuyo sing “gahom nga labaw sa kinaandan.”—2 Corinto 4:7.

▪ Mangin masako sa Cristianong mga hilikuton.—1 Corinto 15:58.

[Kahon/Retrato sa pahina 20]

Dugang Pa nga Bulig

Para sa dugang nga impormasyon kon paano mauntat ang batasan nga masturbasyon, tan-awa ang kapitulo 25 kag 26 sang libro nga Questions Young People Ask . . . Answers That Work, nga ginbalhag sang mga Saksi ni Jehova.