Gikan sa Amon mga Bumalasa

Ano Na ang Natabo sa Gugma? (Marso 2006) Ginapatiko sang kalibutan ang kahulugan sang gugma, kag luyag ni Satanas nga dulaon ini sing bug-os. Ang impormasyon kaanggid sini nagabulig sa aton nga ipakita ang gugma sa aton mga buhat kag sing di-mahamkunon. Salamat gid sa pagbulig sa akon nga mahangpan sing maayo kon paano naton dapat gamiton ining gamhanan nga ikasarang suno sa luyag ni Jehova.

Y. B., Estados Unidos

Ginsubuan ako sang ang akon duha ka suod gid nga mga abyan nagsaylo agod mag-alagad sa isa ka dumuluong sing lenguahe nga kongregasyon. Apang, sang tion nga ginpung-awan gid ako, nabaton ko ini nga magasin. Salamat gid sa pahanumdom nga, “Kon luyag mo nga higugmaon, magpakita sing gugma.” Sugod karon, nagaplano ako nga “magpasangkad” kag magpakita sing tinagipusuon nga gugma agod nga makapalambo ako sing bag-o nga mga pag-abyanay.—2 Corinto 6:12, 13.

M. T., Japan

Pagtigulang—Kon Paano Mabatas ang mga Kabudlayan (Pebrero 2006) Kon kaisa nagabatyag ako nga ang mga tigulang ginapabay-an na lang. Onse ka tuig na nga ginaatipan ko ang akon masakiton nga bana. May mga tion gihapon nga ginapung-awan ako. Madamo nga bes ko nga ginbasa sing sulitsulit ang mga artikulo sa sini nga Magmata! kag madamo nga bes ko man nga ginpamatian ini sa audiocassette. Ini nga magasin amo gid ang kinahanglan ko. Madamo gid nga salamat.

S. T., Japan

Artipisyal nga Kamot kag Tiil (Pebrero 2006) Madamo gid nga salamat sa inyo artikulo tuhoy sa artipisyal nga kamot kag tiil. Sang apat ka bulan ang akon ginabusong, ginsugiran kami nga ang amon anak matawo nga wala sing mga kamot kag tiil kag nga puede sia matakdan sang artipisyal nga mga tiil kon mag-isa ka tuig na sia. Ang artikulo nag-abot sa bulan mismo nga nag-isa ka tuig man si Daryl. Nagatuon na sia karon nga magtindog kag maglakatlakat. Ginakalangkagan namon sang akon bana ang pagkalipay sa tion nga si Daryl “magataklad subong sang isa ka lalaki nga usa.”—Isaias 35:6.

Y. A., Pransia

Life Is Worth Living (Oktubre 22, 2001 nga Awake!) Sulitsulit nga ginabasa ko ang Awake! nga Oktubre 22, 2001, labi na gid kon ginaluyahan ako sing buot. Ini nga mga impormasyon kaangay sang bulong para sa akon, ang kinatuhayan lang kay wala ini nagadaan. Ang mga laygay kag mga solusyon nga ginahatag sini para sa aton mga problema mabuligon gid. Ginapabakod gid ako sang Magmata!, kag ginapabatyag sini sa akon nga nagaulikid gid kamo sa mga indibiduwal nga kaangay ko. Malipayon gid ako kag mapinasalamaton nga yara kamo agod pahanumdumon ako nga “takus gid ang magkabuhi”!

P. T., Madagascar

Mga Pilgrim kag mga Puritano—Sin-o Sila? (Pebrero 2006) Nakibot gid ako sa sayop nga pagpresentar sang mga impormasyon sa sini nga artikulo. May masaligan nga rason kon ngaa wala ginasaulog sang mga Indian sa Aminhan nga Amerika ang Thanksgiving, kag hungod ninyo nga wala ginlakip ini nga mga impormasyon.

Ginhinago ang ngalan, Estados Unidos

Sabat sang “Magmata!”: Palihug talupangda nga ang katuyuan sini nga artikulo indi amo ang paghinun-anon tuhoy sa detalyado nga maragtas sang Thanksgiving Day. Madamo nga mga publikasyon, lakip na ang “Encyclopædia Britannica,” ang nagreport nga sang tigragas sang 1621, ang mga Pilgrim nagsaulog sing tatlo ka adlaw nga selebrasyon upod sa ila Amerikano nga Indian nga mga abyan. Ginlaragway ini sa sulat ni Edward Winslow, nga napetsahan sing Disiembre 11, 1621. Apang, sa mga tinuig nga nagsunod, ang kapiestahan sang thanksgiving ginasaulog agod selebrahon ang tanan nga okasyon luwas pa sa tig-alani. Ang labing malain nga “thanksgiving” gindeklarar sang 1637 ni Gobernador John Winthrop sang Massachusetts Bay Colony sa tapos nga ginmasaker ang ginatos ka Pequot nga mga Indian. Gani, nahangpan namon nga may mga bumalasa nga mahimo masaklaw sa topiko nga tuhoy sa Thanksgiving Day.