Isa ka Dulot nga Ginpasalamatan Gid

Ang nagahatag kag ang ginahatagan lunsay nga nagakalipay kon ang isa ka dulot amo gid ang ginakinahanglan kag kon ginpasalamatan gid ini. Sining karon lang ang isa ka mataas nga opisyal sang gobierno sa Mexico nagsulat sa sanga talatapan sang mga Saksi ni Jehova agod magpasalamat kay nakabaton sia sang libro nga Magtuon Gikan sa Daku nga Manunudlo. Ang isa ka bahin sang iya sulat nagasiling:

“Ang kaundan sini nga libro bilidhon gid. Nakita ko nga bisan pa ang mga impormasyon sa sini napasad sa isa ka dumaan nga libro, sibu ini sa tion kag naaplikar sa aton adlaw-adlaw nga pagkabuhi.

“Kumbinsido ako nga subong mga ginikanan dapat naton ipatudok sa aton mga kabataan ang mga prinsipio nga nagatugot sa ila nga mahantop kon ano ang ila himuon kag nagabulig sa ila nga mangin sangkol nga mga tawo kag maggawi nga may pagtahod kag pagkabunayag sa isa ka kalibutan nga nakulangan sini nga mga pamatasan. Labaw sa tanan, dapat naton sila buligan nga kilalahon ang pagluntad sang isa ka mahigugmaon, mainayuhon nga Supremo nga Persona. Matuod man, ining ginpadala ninyo nga balasahon tuman gid ka mapuslanon, sa akon trabaho kag sa buluhaton nga gintugyan sang aton Manunuga sa mga ginikanan nga buligan ang aton mga kabataan nga magdaku subong mga tawo nga nagahigugma sang ila isigkatawo.”

Ginkilala sining opisyal ang balor sang mga leksion nga makuha sa mga panudlo kag huwaran ni Jesucristo nga ginpresentar sa Magtuon Gikan sa Daku nga Manunudlo. Mahimo ka man makabaton sing kopya sining 256-pahina nga libro nga may matahom nga mga laragway, nga ang pahina pareho kadaku sini nga mga magasin. Mahimo ka makapangabay sing isa ka kopya paagi sa pagsulat kag pagpadala sang kaupod nga kupon sa adres nga yara sa kupon ukon sa nagakaigo nga adres nga nalista sa pahina 5 sini nga magasin.

□ Luyag ko nga makabaton sing kopya sang libro nga ginapakita diri.

□ Palihug kontaka ako may kaangtanan sa isa ka wala sing bayad nga pagtuon sa Biblia sa puluy-an.