“Nagasaulog Ka Bala sang Adlaw sang mga Lola?”

ISA yadto ka aga sang tigtulugnaw. Si Natalia, nga isa ka 16 anyos nga dalagita nga taga-Poland, nagabantay sing tren sang ginpalapitan sia sang duha ka dyurnalista sang lokal nga pamantalaan kag ginpamangkot, “Nagasaulog ka bala sang Adlaw sang mga Lola?”

Sa Poland, ang Adlaw sang mga Lola, Adlaw sang mga Lolo, Adlaw sang mga Iloy, Adlaw sang mga Babayi, kag Adlaw sang mga Manunudlo pinasahi tanan nga mga adlaw. Ang magagmay nga mga bata masami nga nagasaulog sang Adlaw sang mga Lola kag sang Adlaw sang mga Lolo, paagi sa paghimo sing mga kard nga nagatamyaw sa ila, samtang ang mga dakudaku na nagahatag sing mga regalo ukon mga bulak sa ila mga Lolo kag Lola.

Sang primero daw indi makahibalo si Natalia kon ano ang iya isabat sang ginpamangkot sia. Apang sang nakapangamuyo na sia sing mahipos, ginsilingan niya ang mga dyurnalista, “Isa ako sa mga Saksi ni Jehova, kag wala ako nagasaulog sang Adlaw sang mga Lola.” Daw nakibot ang mga dyurnalista. Nian nagyuhum si Natalia kag nagsiling: “Nagaistar ako upod kay Lola, gani madalhan ko sia sing mga bulak, maistorya sia, kag mapasalamatan sia sa iya kaayo adlaw-adlaw. Ngaa dapat ko sia padunggan sing makaisa lang kada tuig?”

Ining mainayuhon nga ekspresyon nagpadayaw gid sa mga dyurnalista, subong nga ayhan nagpadayaw man ini sa imo. Pagkaaga gin-imprinta sang pamantalaan ang ginsiling ni Natalia kag ang iya retrato.

Ini bala nga halimbawa nagpahulag sa imo nga pamangkuton ang imo kaugalingon kon bala handa ka man nga ipaathag ang mga rason sang imo ginapatihan kag paggawi, ilabi na kon wala ginapaabot nga ginpamangkot ikaw? Ang matuod nga mga sumilimba sang Dios nagapangita sing paagi nga mapadunggan sia paagi sa pagkahanda pirme nga maghatag sing mga rason sa ila mga ginapatihan kag kinabubut-on nga ginahimo ini kon posible.—1 Pedro 3:15.