Kon ang Balatian Madula Na!

MADAMO nga tawo ang nagalaum nga makakita sila sing kaumpawan gikan sa kasakit kag balatian sa pihak nga kinabuhi sa langit. Apang, kabaliskaran sa ginapatihan sang madamo, ang paglaum nga ginatanyag gid sang Biblia para sa katawhan amo ang kabuhi sa paraiso sa duta. (Salmo 37:11; 115:16) Ining ginsaad nga palaabuton nagalakip sang himpit nga panglawas, kalipay, kag kabuhi nga walay katapusan.

Ngaa nagamasakit kita kag nagakapatay? Kag paano magaluntad ang isa ka kalibutan nga wala na sing balatian? Ini nga mga pamangkot ginasabat sang Biblia.

▪ Ang matuod nga kabangdanan sang balatian Si Adan kag si Eva, ang aton una nga tawhanon nga mga ginikanan, gintuga nga may himpit nga panglawas. (Genesis 1:31; Deuteronomio 32:4) Gintuga sila agod magkabuhi sing dayon sa duta. Nagmasakit lamang sila sang hungod sila nga nagrebelde sa Dios. (Genesis 3:17-19) Paagi sa pagsikway sa awtoridad sang Dios, gin-utod nila ang ila kaangtanan sa Manunuga, ang Tuburan sang ila himpit nga kabuhi. Nangin di-himpit sila. Subong resulta, nagmasakit sila kag napatay, subong gid sang ginpaandam sang Dios nga mahanabo sa ila.—Genesis 2:16, 17; 5:5.

Pagkatapos nga nagrebelde sanday Adan kag Eva, ang maliton lamang nila sa ila mga anak amo ang pagkadihimpit. (Roma 5:12) Subong sang ginsambit sa nauna nga artikulo, ginakilala karon sang mga sientipiko nga ang napanubli nga  pagkadihimpit nagaresulta sa balatian kag kamatayon. Pagkatapos sang maid-id nga pagpanalawsaw, ang isa ka grupo sang mga sientipiko naghinakop sining karon lang: “Indi gid malikawan nga biolohiko nga kamatuoran nga sa tion nga magsugod ang kabuhi, ang lawas di-malikawan nga nagasugod sang proseso sang kaugalingon nga kalaglagan.”

▪ Indi paagi sa panikasog sang tawo Ang siensia nakahimo sing tumalagsahon nga kadalag-an sa pagpakig-away batok sa balatian. Apang indi gid mapaathag sang siensia ang kabangdanan sang balatian. Wala nakibot sa sini ang mga estudyante sang Biblia nga pamilyar sa inspirado nga pulong sang Dios: “Dili kamo magsalig sa mga dungganon, ukon sa anak sang dutan-on nga tawo, nga sa iya wala sing kaluwasan.”—Salmo 146:3.

Apang, subong sang ginasiling sang Biblia, “ang mga butang nga imposible sa tawo posible sa Dios.” (Lucas 18:27) Sarang madula ni Jehova nga Dios ang kabangdanan sang balatian. Ayuhon niya ang aton tanan nga balatian. (Salmo 103:3) Ang iya inspirado nga Pulong nagasaad: “Yari karon! Ang tolda sang Dios yara sa mga tawo, kag magapuyo sia kaupod nila, kag sila mangin iya mga katawhan. Kag ang Dios mismo mangin kaupod nila. Kag pahiran niya ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”—Bugna 21:3, 4.

▪ Kon ano ang dapat mo himuon Maathag nga ginpakita ni Jesucristo kon ano ang dapat naton himuon agod magkabuhi sa isa ka palaabuton nga kalibutan nga wala na sing balatian. Nagsiling sia: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo”—Juan 17:3.

Ang ihibalo tuhoy sa Dios kag ang mga panudlo sang iya Anak, si Jesus, makita sa Biblia. Ini nga ihibalo nagalakip sang praktikal nga laygay nga makapauswag sang imo karon kabuhi. Apang, ang Dios nagasaad pa gid sing isa ka kalibutan nga wala na sing kasakit para sa iya matinumanon nga mga sumilimba. Huo, ang Dios nagatanyag sa imo sing isa ka palaabuton diin “wala sing pumuluyo nga magasiling: ‘Nagamasakit ako’”!—Isaias 33:24.

[Kahon/Mga retrato sa pahina 11]

Isa ka Timbang nga Pagtamod sa Panglawas

Ang Biblia nagapalig-on sang pagtahod sa kabuhi. Ginapakita sang mga Saksi ni Jehova ini nga pagtahod paagi sa pagpanikasog nga atipanon ang ila panglawas. Ginalikawan nila ang makahalalit nga mga bisyo, subong sang pag-abuso sa droga kag pagpanabako. Ginapaabot sang Dios sa iya mga sumilimba nga maghaganhagan sila sa pag-inom kag pagkaon. (Hulubaton 23:20; Tito 2:2, 3) Ining praktikal nga mga tikang upod ang supisyente nga pahuway kag ehersisyo makapalantang ukon makatapna sang madamo nga balatian sa lawas. Mahimo nga kinahanglan sang mga nagamasakit ang bulig sang masaligan nga mga espesyalista sa panglawas.

Ang Biblia nagapalig-on sang pagkamakatarunganon kag ‘pagkaligdong sing hunahuna.’ (Tito 2:12; Filipos 4:5) Madamo karon ang indi timbang kag sobra ka mahunahunaon sa ila pagpangita sing mga bulong, amo nga napatumbayaan nila ang ila espirituwalidad. Ang pila nagtilaw sang kwestionable nga mga terapiya nga mahimo tunaan sang kahalitan. Ang iban nagausik sing kuarta kag tion sa mga pagpabulong nga indi epektibo ukon makahalalit pa gani.

Ang kamatuoran amo nga ang himpit nga panglawas indi pa maangkon. Samtang ginahulat mo ang isa ka palaabuton nga wala na sing balatian, ang kaalam kag pagkamakatarunganon nga masapwan sa Biblia makabulig sa imo nga magpabilin nga timbang sa imo pagtinguha nga makaangkon sing maayo nga panglawas.