Luyag sang Tanan ang Maayo nga Panglawas!

KAPIN sa 2,700 ka tuig na ang nakalipas, ang isa ka manalagna nagpamulong tuhoy sa tion nga madula na ang balatian. Ini nga tagna gintipigan tubtob sa aton adlaw kag mabasa ini sa dumaan nga mga sinulatan ni Isaias. Nagsulat sia tuhoy sa tion nga “wala sing pumuluyo nga magasiling: ‘Nagamasakit ako,’” kag nagdugang pa sia: “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magataklad subong sang lalaki nga usa, kag ang dila sang apa magaamba sa kalipay.” (Isaias. 33:24; 35:5, 6) Ang iban nga mga tagna sa Biblia nagasambit tuhoy sina nga palaabuton. Halimbawa, ang katapusan nga tulun-an sang Biblia, ang Bugna, nagalaragway sang tion nga dulaon sang Dios ang kasakit.—Bugna 21:4.

Matuman bala ini nga mga tagna? Magaabot gid bala ang tion nga ang tawhanon nga rasa magaagom sing maayo nga panglawas kag ang balatian madula na? Matuod, mas maayo karon ang panglawas sang daku nga bahin sang katawhan sangsa nagligad nga mga kaliwatan. Apang ang mas maayo nga panglawas wala nagakahulugan sing pinakamaayo nga panglawas. Ang balatian nagapaantos gihapon sa madamo. Bisan ang kahangawa nga magmasakit nagahatag sing daku nga kabalaka. Kag ang masakit gid nga kamatuoran amo nga bisan sa sining moderno nga dag-on, wala sing tawo ang bug-os nga makalikaw sa pagbalatian sang lawas kag sang hunahuna.

Ang Pabug-at sa Imo

Ang balatian nagapabug-at sa madamo nga paagi. Ang isa ka paagi nga ang balatian nagapabug-at sa mga tawo amo ang daku kaayo nga gasto kon magmasakit. Halimbawa, sining karon lang nga tuig, 500 milyones ka adlaw sang pagtrabaho ang nawasi sa Europa bangod sang mga problema sa panglawas. Amo man ang kahimtangan bisan diin. Ang manubo nga produksion sa trabaho, lakip na ang pagmahal sang pag-atipan sa panglawas, nagaresulta sa pinansial nga problema nga nagaapektar sa tanan. Ang mga korporasyon kag ang mga gobierno nagakapierde. Agod mabawi ini nga pagkapierde, ginapamahalan sang mga negosyante ang presyo sang ila mga produkto kag ginadugangan naman sang mga gobierno ang buhis. Sin-o ang ginabug-atan? Siempre, ikaw!

Sing makapasubo, ang mga imol amo sa masami ang nabudlayan sa pagtigayon sing nagakaigo nga pag-atipan sa panglawas, kon may yara gid man. Amo sini ang makaluluoy nga kahimtangan sang minilyon sa imol nga mga pungsod nga may limitado lamang ukon wala gid sing paagi nga makatigayon sing serbisyo sang mga doktor. Bisan sa manggaranon nga mga pungsod, ang iban kinahanglan nga maghimakas agod makatigayon sing maayo gid nga pag-atipan sa panglawas. Amo ini sa masami ang kahimtangan sang madamo sang 46 milyones ka tawo sa Estados Unidos nga wala sing pasiguro sa panglawas.

Indi lamang sa pinansial nga paagi nagapabug-at ang balatian. Ang pinakadaku nga pabug-at sini amo ang kalisang sang pagbalatian nga indi na mag-ayo, ang pag-agwanta sang madugay kag sobra nga kasakit, ang kasubo nga makita ang iban nga nagamasakit sing malubha, kag ang kalisod nga mapatyan sang isa ka hinigugma.

Ang paglaum nga magkabuhi sa pila ka adlaw sa isa ka kalibutan nga wala na sing balatian halandumon gid. Luyag sang tanan ang maayo nga panglawas! Bisan pa nga daw di-mapatihan, madamo ang nagapati nga ini nga paglaum matuod. Kumbinsido ang iban nga paagi sa himo-tawo nga teknolohiya, ang halos tanan nga balatian madula sa ulihi. Sa pihak nga bahin, ang mga nagatuo sa Biblia nagapati nga tumanon sang Dios ang mga tagna sini tuhoy sa isa ka kalibutan nga wala na sing balatian. Ang tawo bala ang magapaluntad sang tion nga madula na ang balatian? Ukon ang Dios bala ang magapaluntad sini? Ano ang mahanabo sa palaabuton?