Ang Pagtamod sang Biblia

Napaslawan Bala ang Cristianismo?

MGA un-tersia sang populasyon sang duta ang nagapangangkon nga Cristiano. Apang, ang kalibutan daw mas nabahinbahin karon sa politika kag mas masingki sangsa una. Ginapakita bala sini nga may depekto ang Cristianismo nga gintudlo ni Jesus. Ukon, ang depekto bala yara sa paagi sang pag-aplikar sang madamo nga tawo sa mga panudlo ni Cristo?

Binagbinagon sa sining artikulo kon ano gid ang gintudlo ni Cristo kag kon ano nga halimbawa ang ginpahamtang niya para sa iya mga sumulunod. Binagbinagon man sini ang isa ka kinaandan nga pagtamod sang nagapangangkon nga mga Cristiano, pagtamod nga supak gid sa matuod nga kahulugan sang Cristianismo.

Isa ka Ginpatiko nga Porma sang Cristianismo

Pila ka gatos ka tuig pagkatapos mapatay si Cristo, ang relihion nga ginpaboran sang Emperyo sang Roma amo ang isa ka ginpatiko nga porma sang Cristianismo. Bangod wala na ginakabig subong sinikway nga mga tagagua, ang mga katapo sining grupo sang nagapangangkon nga mga Cristiano nangin bahin sang ulihi sang nagapanguna nga politikal kag sosyal nga elemento sang Romanong katilingban. Ang mga lider sang simbahan, kaangay ni Augustine, nagpauyon sa sining pagbag-o paagi sa pagtudlo nga ang ginahulat nga Ginharian sang Dios nag-abot na. Gintudlo sining mga lider nga ang ila bag-ong natigayon nga politikal kag relihiosong impluwensia amo ang paagi agod mapatuman ang kabubut-on sang Dios sa duta. Busa ginpadaku nila ang panikasog sang tawo sa pagtuytoy sa mga hilikuton sa duta.

Subong resulta, madamo ang nagapati nga may papel ang Cristianismo sa politikal nga sistema sang katilingban. Agod mahimo ini, madamo ang nagapati nga dapat isikway kon kaisa sang isa ka Cristiano ang pila ka aspekto sang iya pagtuluuhan agod magpasakop sa kabubut-on sang katilingban sa ila lugar. Halimbawa, madamo nga tawo ang nagahambal nga ginatuman nila ang mga panudlo ni Cristo tuhoy sa gugma kag paghidait, apang sa amo man nga tion nagasuportar sa masingki nga mga inaway. Bangod sa amo man nga rason, mahimo palig-unon sang mga simbahan ang ila mga sumulunod nga mangamuyo para sa Ginharian sang Dios apang sa amo man nga tion nagasuportar sa mapiguson nga mga manuggahom.

Ini nga sahi sang Cristianismo indi amo ang relihion nga gintukod ni Jesus. Sa baylo, himo-tawo lamang  ini nga bersion kag amo ini karon ang relihion sang nagapangangkon nga mga Cristiano. Ining bersion sang Cristianismo napaslawan gid, subong sang ginapakita karon sang lapnag nga pagsikway sa mga prinsipio sang Biblia sa bug-os nga Cristiandad.

Ano Gid Bala ang Gintudlo ni Jesus?

Mahimo nga makibot ang pila kon mahibaluan nila nga ginsilingan ni Jesus ang iya mga sumulunod nga “indi sila [dapat] bahin sang kalibutan, subong nga [sia] indi bahin sang kalibutan.” (Juan 17:15, 16) Ngaa ginpalig-on ni Cristo ang iya mga disipulo nga manindugan sing subong sini? Ang pinalangga nga disipulo ni Jesus nga si apostol Juan naghatag sing sabat. Nagsulat sia: “Ang bug-os nga kalibutan yara sa gahom sang isa nga malauton.”—1 Juan 5:19.

Busa, ginapakita sang mga panudlo ni Cristo nga ang makapahanabo sang matarong nga kalibutan diri sa duta amo ang langitnon nga Ginharian sang Dios, sa baylo nga ang tawhanon nga mga organisasyon. (Mateo 6:10) Si Jesus wala gid nagpasilabot sa sistema sang gobierno sang panahon niya. Direkta niya nga ginpangindian ang palangakuan sa politika. (Juan 6:15) Wala man sia naggamit sing kasingki subong paagi sa paghusay sa mga sinuay. (Mateo 26:50-53; Juan 18:36) Wala nagbilin si Jesus sing konstitusyon ukon layi. Wala sia sing may gindampigan sa politikal nga mga isyu sang panahon niya. Halimbawa, indi sia nangin aktibista para sa mga kinamatarong sang mga ulipon, ukon nagpakigbahin sa pagpakig-away sang mga Judiyo batok sa Roma.

Apang, wala ini nagakahulugan nga wala nagaulikid si Jesus sa mga tawo kag sa ila mga problema. Ginpadaku gid ni Jesus sa iya panudlo ang salabton sang indibiduwal sa iya isigkatawo. Ginpalig-on niya ang pagkabunayag tuhoy sa pagbayad sing mga buhis kag ginpadaku niya ang pagpasakop sa mga awtoridad. (Mateo 22:17-21) Gintudlo niya kon paano magpakita sing aktibo nga interes sa kaayuhan sang mga nagakinahanglan. Gintudlo man niya kon paano padunggan ang iban kag kon paano mangin mahinuklugon, mapinatawaron, kag maluluy-on. (Mateo, kapitulo 5-7) Nahibaluan gid sang tanan nga ang sentro sang mga panudlo ni Cristo amo ang gugma sa Dios kag sa isigkatawo.—Marcos 12:30, 31.

Matuod nga Cristianismo Karon

Busa, paano dapat maggawi ang isa ka matuod nga sumulunod ni Cristo? Dapat sia maggawi kaangay ni Jesus. Bisan pa matinumanon sia sa mga kasuguan sang pungsod, dapat magpabilin sia nga neutral gid sa politika. (Juan 12:47, 48) Indi niya dapat pag-ikompromiso ang Cristianong mga prinsipio, bisan pa sa idalom sang mabaskog nga pag-ipit. (1 Pedro 2:21-23) Sa amo man nga tion, indi sia dapat mangin daw sa wala lang sing labot nga tagpanilag. Ang matuod nga Cristiano dapat magpakita sing aktibo nga interes para sa kaayuhan sang mga tawo sa palibot niya, subong sang ginhimo ni Jesus. (Marcos 6:34) Dapat man sia manikasog sing lakas sa pagbulig sa iban nga magmalipayon sa ila pagkabuhi paagi sa pagbulig sa ila nga mahangpan ang mga panudlo ni Cristo kag magkabuhi nahisuno sa sini.—Juan 13:17.

Bangod sini, nagapanikasog ang mga Saksi ni Jehova karon nga ilugon si Cristo sa ila pagpakig-angot sa mga tawo sa palibot nila. Bisan pa mahidaiton sila kag matinumanon-sa-kasuguan nga mga banwahanon, indi sila bahin sang kalibutan. Kaangay ni Jesus, wala sila nagapakigbahin sa kasingki kag politikal nga mga kontrobersia nga lapnag gid karon. Ang ila ginalauman nga solusyon sa mga problema nga ginaatubang sang kalibutan karon amo ang Ginharian sang Dios. Ang matuod nga Cristianismo nagaresulta sa mas malipayon nga pagkabuhi kag paghiusa sa tunga sang mga katapo sini. (Juan 13:34, 35) Pat-od nga wala gid ini napaslawan.

NAPALIGBAN MO NA BALA?

▪ Dapat bala makigbahin ang mga Cristiano sa politika?—Juan 6:15.

▪ Gintudlo bala ni Cristo nga dapat gamiton ang kasingki subong paagi sa paghusay sang mga sinuay?—Mateo 26:50-53.

▪ Ano ang nagapakilala nga tanda sang matuod nga mga Cristiano?—Juan 13:34, 35.

[Credit Line sang retrato sa pahina 18]

EL COMERCIO, Quito, Ecuador