Pamangkot sang mga Pamatan-on . . .

Homoseksuwalidad​—Paano Ko Ini Mapamatukan?

“Sang 12 anyos ako, may naluyagan ako nga babayi sa amon eskwelahan. Ginaligban ako kag nagakabalaka nga basi tomboy ako.”—Anna. *

“Sang tin-edyer ako naluyag ako sa mga lalaki. Ang matuod, nahibaluan ko nga indi normal ini nga balatyagon.”—Olef.

“Kami sang akon amiga makaisa ukon makaduha na naghalukay. Apang, may gusto man gihapon ako sa mga lalaki, gani nahunahuna ko nga basi silahis ako.”—Sarah.

ANG matinuguton nga mga panimuot sa karon amo ang nagtiklod sa madamong pamatan-on nga tilawan ang pareho sing sekso nga mga relasyon. “Madamo nga babayi sa eskwelahan ang nagapangangkon nga tomboy, silahis, ukon ‘interesado sa pagpakigsekso sa lalaki ukon babayi man,’” siling sang 15-anyos nga si Becky. Kaangay man sini ang kahimtangan sa eskwelahan sang 18 anyos nga si Christa. “Ang matuod duha ka klasmeyt ko nga babayi ang naghagad sa akon nga makigsekso sa ila,” siling niya. “Ginsulatan ako sang isa sa ila nga nagapamangkot kon bala luyag ko maeksperiensiahan ang pagpakigsekso sa babayi.”

Sa karon nga ginapasundayag na ang pareho sing sekso nga mga relasyon, ayhan nagapalibog ka: ‘Sayop gid bala ang homoseksuwalidad? Ano abi kon maluyag ako sa isa nga pareho ko sing sekso? Nagakahulugan bala ini nga homoseksuwal ako?’

Paano Ginatamod sang Dios ang Homoseksuwalidad?

Sa karon, madamo nga tawo—bisan ang pila ka mga klero—ang daw nagabalewala lang sa isyu sang homoseksuwalidad. Apang, maathag ang ginasiling sang Biblia. Ginasugiran kita sini nga gintuga ni Jehova nga Dios ang lalaki kag babayi kag gintuyo niya nga ang seksuwal nga mga handum para lamang sa mag-asawa. (Genesis 1:27, 28; 2:24) Busa, indi makapakibot nga ginapakamalaut sang Biblia ang homoseksuwal nga mga buhat.—Roma 1:26, 27.

Siempre pa, madamo ang magasiling nga ang Biblia kinaraan na. Halimbawa, ang 14-anyos nga si  Megan nagsiling, “Ang iban nga butang nga ginasiling sang Biblia, wala na sing pulos sa aton kalibutan karon.” Apang, ngaa amo sini dayon ang ginasiling sang iban? Sa masami, ini bangod wala nagaugyon ang Biblia sa ila mga pagtamod. Ginasikway nila ang Pulong sang Dios bangod tuhay ang ginatudlo sini sangsa luyag nila patihan. Apang, ini nga pagtamod di-makatarunganon kag ginapalig-on kita sang Biblia nga likawan ining sirado nga panghunahuna! Ang matuod, sa iya Pulong, ginapalig-on kita ni Jehova nga Dios nga binagbinagon ang katunayan nga ang iya mga sugo para sa aton kaayuhan. (Isaias 48:17, 18) Makatarunganon gid ini. Kay man, sin-o pa abi ang labi nga nakahibalo sang aton pagkahuman subong tawo sangsa aton Manunuga?

Subong isa ka pamatan-on, mahimo nga nagabag-obag-o ang imo nabatyagan. Ano abi kon naluyag ka sa isa nga pareho mo sing sekso? Nagakahulugan bala ini dayon nga homoseksuwal ka? Indi. Dumduma, yara ka sa “hingurusgan sang pagkapamatan-on,” ang tion nga kon kaisa nagabatyag ka sing indi hungod nga seksuwal nga handum. (1 Corinto 7:36) Sa pila ka tion, mahimo naluyagan mo ang isa nga pareho mo sing sekso. Apang ang pagbatyag sini nga kaluyag wala nagakahulugan nga homoseksuwal ka. Sa katunayan, ginapakita sang estadistika nga ini nga mga huyog masami nga nagakadula man lang sa pagligad sang tion. Apang, mahimo nga nagapalibog ka gihapon, ‘Paano nagasugod ini nga balatyagon?’

Suno sa iban, ang homoseksuwalidad yara na nga daan sa mga gene. May nagasiling naman nga natun-an ini sa palibot. Indi katuyuan sini nga artikulo nga mag-entra sa sinuay tuhoy sa kon bala ang homoseksuwalidad bangod sa mga gene ukon sa palibot. Sa pagkamatuod, indi gid nagakaigo nga ipabangod ang homoseksuwalidad sa isa lang ka rason. Ang homoseksuwalidad—kaangay sa iban pa nga mga panimuot—komplikado pa sangsa sini nga mga rason lamang.

Ano man ang kabangdanan sini, ang butang nga dapat talupangdon amo nga ginapakamalaut sang Biblia ang homoseksuwal nga mga buhat. Busa, ang tawo nga nagapakigbato sa mga handum sa pareho niya sing sekso may tulumuron nga masarangan niya lab-uton—masarangan niya nga batuan ini nga mga handum. Sa pag-ilustrar: Ang isa ka tawo mahimo nga ‘dali maakig.’ (Hulubaton 29:22) Sang nagligad nga mga tion, mahimo ginatugutan niya ang iya kaugalingon nga magsilabo sa kaakig. Apang, sang matun-an niya ang Biblia, nahibaluan niya nga dapat niya palambuon ang pagpugong sa kaugalingon. Buot bala silingon sini nga indi na sia magbatyag sing kaakig? Indi. Apang, bangod nahibaluan na niya ang pagtamod sang Biblia tuhoy sa wala ginapunggan nga kaakig, wala na sia nagapadala sa iya balatyagon. Kaangay man ini sa tawo nga naluyag anay sa isa nga pareho niya sing sekso apang nakatuon na karon tuhoy sa pagtamod sang Biblia sa homoseksuwal nga mga buhat. Kon kaisa, ang sayop nga mga handum mahimo magbalik. Pero paagi sa pagsunod sa laygay sang Biblia, mabatuan na niya ini nga mga handum.

Ibutang ta nga ang mga handum sa pareho sing sekso daw nagtudok na kag mabudlay gid batuan. Nian, saligi nga bisan ang nanggamot na nga sayop nga mga handum posible gihapon nga madaug. (1 Corinto 9:27; Efeso 4:22-24) Sa pagkamatuod, ikaw ang magadesisyon kon paano ka magakabuhi. (Mateo 7:13, 14; Roma 12:1, 2) Kag walay sapayan nga siling sang iban indi mo ini mahimo, masarangan mo nga kontrolon ang imo balatyagon—ukon mabatuan ini.

Pamatuki ang Sayop nga mga Buhat

Paano mo malikawan nga madalahig sa homoseksuwal nga mga buhat?

▪ Una Itugyan ang imo mga kabalaka kay Jehova sa pangamuyo, nga nagasalig nga ‘nagaulikid sia sa imo.’ (1 Pedro 5:7; Salmo 55:22) Mapabakod ka ni Jehova sang paghidait nga “nagalabaw sa tanan nga panghunahuna.” ‘Magabantay ini sang imo tagipusuon kag ikasarang sa paghunahuna’ kag makahatag sa imo sing “gahom nga labaw sa kinaandan” agod nga indi mo mahimo ang sayop nga mga handum. (Filipos 4:7; 2 Corinto 4:7) Si Sarah nga naghunahuna nga basi silahis sia, nagsiling: “Kada ginatublag ako sini nga panghunahuna, nagapangamuyo ako; kag ginaalay-ay ako ni Jehova. Kon wala ang iya bulig indi ko gid masarangan ini nga problema. Ang pangamuyo nagbulig gid sa akon!”—Salmo 94:18, 19; Efeso 3:20.

▪ Ikaduha Hunahunaa ang makapabakod nga espirituwal nga mga butang. (Filipos 4:8) Basaha ang Biblia adlaw-adlaw. Indi pagpakadiutaya ang ikasarang sini nga impluwensiahan ang imo hunahuna kag tagipusuon para sa kaayuhan. (Hebreo 4:12) Ang pamatan-on nga si Jason nagsiling: “Ang Biblia—lakip ang mga teksto subong sang 1 Corinto 6:9, 10 kag Efeso 5:3—may daku gid nga epekto sa akon. Ginabasa ko ini nga mga teksto kon  mag-utwas ang sayop nga mga handum.”

▪ Ikatlo Likawi ang pornograpiya kag ang bisan ano nga nagapasanyog sang homoseksuwalidad, nga magapukaw lamang sa sayop nga panghunahuna. * (Salmo 119:37; Colosas 3:5, 6) Ginapasanyog man sang pila ka pelikula kag programa sa telebisyon ang pagpati nga ang homoseksuwalidad isa lamang ka tuhay nga estilo sang pagkabuhi. “Ang tiko nga pagtamod sang kalibutan nag-apektar sa akon panghunahuna kag nagdugang sa akon kagumon kon ano gid bala ako,” siling ni Anna. “Karon ginalikawan ko na ang bisan ano ukon bisan sin-o nga nagapasanyog sang homoseksuwalidad.”—Hulubaton 13:20.

▪ Ikap-at Mangita sang imo masugiran, kag ipakighambal sa iya ang imo mga panghunahuna. (Hulubaton 23:26; 31:26; 2 Timoteo 1:1, 2; 3:10) Si Olef, nga nangayo sing bulig sa isa ka Cristianong gulang, naghinumdom: “Epektibo gid ang iya laygay. Kuntani sadto pa ako nakighambal sa iya.”

Indi Magpangampo!

Siempre pa, ang iban magasiling nga indi na kinahanglan nga himuon mo pa ini nga mga butang, nga makigbagay ka na lang sa imo seksuwalidad kag batunon kon ano ka. Apang ang Biblia nagasiling nga may mahimo ka! Halimbawa, ginasugiran kita sini nga ang pila ka mga Cristiano sang una nga nagabuhat anay sing homoseksuwalidad nagbag-o sang ila dalanon sang pagkabuhi. (1 Corinto 6:9-11) Magadaug ka man sa sini nga pagpakig-away—bisan pa nga sa karon sa tagipusuon mo pa lang ini.

Kon nagapadayon ang imo mga handum, indi magpangampo ukon maghinakop nga indi ka magmadinalag-on. (Hebreo 12:12, 13) Tanan kita nagapakig-away sa sayop nga mga huyog sa tion kag tion. (Roma 3:23; 7:21-23) Kon batuan mo ang sayop nga mga handum, mahimo nga madula man lang ini sa ulihi. (Colosas 3:5-8) Labaw sa tanan, magsandig kay Jehova para sa bulig. Ginahigugma ka niya kag nahibaluan niya kon ano ang makapahalipay sa imo. (Isaias 41:10) Huo, “magsalig ka kay Jehova kag maghimo ka sing maayo . . . , kag ihatag niya sa imo ang mga ginapangabay sang imo tagipusuon.”—Salmo 37:3, 4.

Dugang pa nga artikulo sang serye nga “Young People Ask . . .” ang masapwan sa Web site nga www.watchtower.org/ype

[Mga nota]

HUNAHUNAA

▪ Ngaa ginadumilian sang Dios ang homoseksuwalidad?

▪ Ano ang mahimo mo kon nagabatyag ka sing kaluyag sa isa nga pareho mo sing sekso?

▪ Sin-o ang mahimo mo masugiran kon nagapakigbato ka sa homoseksuwal nga mga handum?

[Retrato sa pahina 30]

Mangayo sing bulig sa isa ka hamtong nga Cristianong adulto