Ang Pagkamapainubuson Kaluyahon Bala Ukon Kabakod?
Ang Pagtamod sang Biblia
Ang Pagkamapainubuson Kaluyahon Bala Ukon Kabakod?
MASAMI nga ginapadaku sang kalibutan nga ang bugalon kag hambog nga tawo amo ang dapat ilugon. Ang mapainubuson kag mabuot daw ginakabig nga mahuyang, mapigaw, ukon matalaw. Apang, kaluyahon gid bala ang matuod nga pagkamapainubuson? Kag kabakod gid bala ang pagkabugalon? Ano ang pagtamod sang Biblia?
Sa umpisa pa lang, ginhinambitan na sing positibo sang Biblia ang pila ka sahi sang bugal. Halimbawa, mapabugal sang mga Cristiano nga si Jehova ang ila Dios kag nga kilala niya sila. (Salmo 47:4; Jeremias 9:24; 2 Tesalonica 1:3, 4) Mapabugal man sang mga ginikanan kon huwaran ang ila mga anak sa Cristianong paggawi kag maisog nga nagapanindugan para sa matuod nga pagsimba. (Hulubaton 27:11) Apang, may malain man nga sahi sang bugal.
Pag-usisa sing Maayo sa Bugal kag Pagkamapainubuson
Ang isa ka kahulugan sang bugal amo ang sobra nga pagpabalor sa kaugalingon. Ini nga sahi sang bugal nagahatag sa isa sing di-nagakaigo nga balatyagon sang pagpaimportante sa kaugalingon kag pagkasuperyor, ayhan bangod sang iya katahom, rasa, tindog sa katilingban, ikasarang, ukon manggad. (Santiago 4:13-16) Ang Biblia nagasambit sang mga tawo nga “nagapahambog.” (2 Timoteo 3:4) Buot silingon, mataas gid ang ila pagtamod sa ila kaugalingon, ang pagtamod nga indi gid makatarunganon.
Apang, ang mga mapainubuson nagatamod sa ila kaugalingon sing bunayag kag tampad, nga nagakilala sang ila pagkadihimpit kag sang ila kubos nga kahimtangan sa atubangan sang Dios. (1 Pedro 5:6) Dugang pa, ginakilala nila—kag ginakalipay pa gani—ang mas maayo nga mga kinaiya nga makita nila sa iban. (Filipos 2:3) Gani, wala gid sila nahisa ukon naimon. (Galacia 5:26) Busa, makatarunganon nga ang matuod nga pagkamapainubuson nagapalambo sang maayo nga kaangtanan sa iban kag nagabulig agod mabatyagan sang isa ang kasiguruhan kag kalig-unan.
Binagbinaga ang halimbawa ni Jesus. Antes magkari sa duta, isa sia ka gamhanan nga espiritu nga tinuga sa langit. Sang nagkabuhi na sia sa duta, himpit sia nga tawo. (Juan 17:5; 1 Pedro 2:21, 22) Wala sing makatupong sa iya ikasarang, kaalam, kag ihibalo. Apang, wala sia magpabugal kundi pirme mapainubuson. (Filipos 2:6) Ginhinawan pa gani niya ang tiil sang iya mga apostoles sa isa ka higayon; kag nagpakita sia sing tunay nga interes sa mga bata. (Lucas 18:15, 16; Juan 13:4, 5) Ang matuod, samtang yara sa tupad niya ang isa ka bata, si Jesus nagsiling: “Ang bisan sin-o nga magpaubos sang iya kaugalingon kaangay sini nga bata amo ang labing daku sa ginharian sang langit.” (Mateo 18:2-4) Huo, sa pagtamod ni Jesus—kag sang iya Amay—ang matuod nga pagkadaku naggikan sa pagkamapainubuson, indi sa pagkabugalon.—Santiago 4:10.
Ang Pagkamapainubuson Kabakod
Bisan pa si Jesus isa ka huwaran sa pagkamapainubuson, indi gid sia matalaw ukon mahuyang. Maisog sia nga naghambal sing kamatuoran kag wala gid mahadlok sa tawo. (Mateo 23:1-33; Juan 8:13, 44-47; 19:10, 11) Busa, gintahod pa gani sia bisan sang iban niya nga kaaway. (Marcos 12:13, 17; 15:5) Apang indi gid dominante si Jesus. Sa baylo, paagi sa pagkamapainubuson, kaayo, kag gugma, ginbuyok niya ang mga tawo, amo nga natigayon niya ang pagpalangga sang mga tawo nga indi gid matigayon sang bugalon. (Mateo 11:28-30; Juan 13:1; 2 Corinto 5:14, 15) Bisan sa karon, minilyon ang matutom nga nagapasakop kay Cristo bangod sa gugma kag tudok nga pagtahod sa iya.—Bugna 7:9, 10.
Ginapalig-on sang Pulong sang Dios ang pagkamapainubuson bangod ang mga mapainubuson sing tagipusuon madali magbaton sing laygay kag makalilipay ang pagtudlo sa ila. (Lucas 10:21; Colosas 3:10, 12) Kaangay sa isa ka sampaton maghambal nga Cristianong manunudlo sang una nga si Apolos, handa gid sila nga bag-uhon ang ila pagtamod kon sugiran sing sibu kag bag-o nga impormasyon. (Binuhatan 18:24-26) Kag wala sila natahap magpamangkot, samtang ang mga bugalon indi gid maghimo sini, bangod nahadlok sila nga basi madayag ang ila pagkaignorante.
Binagbinaga ang halimbawa sang unang siglo nga Etiopianhon nga eunuco, nga nagapalibog tuhoy sa pila ka dinalan sa Kasulatan. “Nahibaluan mo gid bala ang imo ginabasa?” pamangkot sa iya sang Cristianong disipulo nga si Felipe. Ang Etiopianhon nagsabat: “Sa pagkamatuod, paano ko ini mahibaluan, luwas kon may isa nga magtuytoy sa akon?” Daw ano nga pagkamapainubuson—labi na bangod ang eunuco mahimo nga prominente gid nga tawo sa ila lugar! Bangod sang iya pagkamapainubuson, nahibaluan niya ang madalom nga paghangop sa Kasulatan.—Binuhatan 8:26-38.
Tuhay gid ang Etiopianhon kon ipaanggid sa Judiyong escriba kag Fariseo, nga nagkabig sang ila kaugalingon subong mga kadalagkuan sa relihion sang ila panahon. (Mateo 23:5-7) Sa baylo nga mamati sing mapainubuson kay Jesus kag sa iya mga sumulunod, ginmulay nila sila kag ginpangitaan sing sayop. Busa, ang ila bugal amo ang nagbutang sa ila sa espirituwal nga kadudulman.—Juan 7:32, 47-49; Binuhatan 5:29-33.
Ikaw Bala Kaangay sa Mahumok Ukon Matig-a nga Daga?
Ginpaangay sang Biblia si Jehova sa isa ka maninihon kag ang mga tawo sa daga. (Isaias 64:8) Ang pagkamapainubuson nagabulig sa isa ka tawo nga mangin kaangay sang mahumok nga daga sa mga kamot sang Dios, nga iya madihon agod mangin isa ka matahom nga suludlan; samtang ang matinaastaason kaangay sang kigas, matig-a nga daga nga madugmok. Ang bantog nga halimbawa sang matig-a nga daga amo ang bugalon nga si Paraon sang dumaan nga Egipto nga nagbato kay Jehova nga amo ang ginbangdan sang iya kamatayon. (Exodo 5:2; 9:17; Salmo 136:15) Ang pagkalaglag ni Paraon nagapamatuod gid sang hulubaton nga: “Ang bugal nagauna sa pagkapukan, kag ang matinaastaason nga espiritu nagauna sa pagkasandad.”—Hulubaton 16:18.
Ang ginkutlo nga hulubaton wala nagapahangop nga ang katawhan sang Dios indi apektado sang bugal. Halimbawa, ang mga apostoles ni Jesus masami nga nagabaisay kon sin-o ang labing daku sa ila. (Lucas 22:24-27) Walay sapayan sini, wala sila nangin bugalon kundi nagpamati sila kay Jesus kag sang ulihi ginbag-o nila ang ila panimuot.
“Ang resulta sang pagkamapainubuson kag sang kahadlok kay Jehova amo ang manggad kag himaya kag kabuhi,” sulat ni Solomon. (Hulubaton 22:4) Makapakumbinsi gid ang mga rason kon ngaa dapat kita magpalambo sing pagkamapainubuson! Indi lamang ini mabakod kag kalahamut-an nga kinaiya kundi nagabulig pa ini sa aton nga matigayon ang kahamuot sang Dios kag ang padya nga kabuhi nga walay katapusan.—2 Samuel 22:28; Santiago 4:10.
NAPALIGBAN MO NA BALA?
▪ Malain bala ang tanan nga sahi sang bugal?—2 Tesalonica 1:3, 4.
▪ Paano ang pagkamapainubuson nagapauswag sang kaalam? —Binuhatan 8:26-38.
▪ Dapat bala palambuon sang mga alagad sang Dios ang pagkamapainubuson?—Lucas 22:24-27.
▪ Ano ang palaabuton sang mga mapainubuson?—Hulubaton 22:4.
[Retrato sa pahina 20, 21]
Suod ang mga bata kay Jesus bangod mapainubuson sia