Ang daw Wala sing Kamatayon nga Water Bear

SUNO SA MANUNULAT SANG MAGMATA! SA JAPAN

▪ SA HALOS tanan nga sahi sang tubigon kag mabasabasa nga duog sa bug-os nga kalibutan—kalumutan, yelo, ubay sang sapa, mainit nga tuburan, linaw, kadagatan, kag bisan gani sa likod sang inyo balay—mahimo nga makakita ka sang water bear, nga isa sa pinakagamay apang pinakamapatol nga mga tinuga. Tuman gid ka gamay ang water bear nga halos indi ini makita, ang lawas sini nga ginaputos sang pangamlig nga panit may apat ka bahin, malip-ot, kag may walo ka tiil, nga ang tagsa may mga kamoy sa punta. Ang korte sini kag paghayonhayon kaangay sa balik-awot nga paglakat sang isa ka oso, amo nga gintawag ini nga water bear.

Ang water bear isa ka tardigrade, nga buot silingon “mahinay maglakat.” Ginatos ka espesyi sini ang nakilal-an na, kag ang mga bayi nagaitlog sing 1 tubtob 30 ka bilog sa kada tion. Linibolibo sining magagmay nga mga tinuga ang mahimo masapwan sa pila lang ka hakop sang basa nga balas ukon duta. Masami gid nga makit-an sila sa mga lumot nga nagatubo sa atop.

Ang mga water bear mabuhi gihapon bisan sa pinakabudlay nga kahimtangan. “Gintilawan nga ibutang ini sa vacuum sa sulod sang walo ka adlaw, dason tatlo ka adlaw nga ginbutang ini sa helium gas sa hustuhan nga temperatura, kag nian pila ka oras nga ginpabay-an sa temperatura nga -272°C (-458°F), apang naulian ini sang ginbalik sa hustuhan nga temperatura,” siling sang Encyclopædia Britannica. Masarangan man sini ang radiasyon sang X-ray nga pila ka gatos ka pilo nga mas mabaskog sangsa radiasyon nga makapatay sa tawo. Kag, ginapatihan man nga mabuhi ini sa kahawaan sa malawig nga tion!

Ang sekreto sini amo ang ila ikasarang nga magpapataypatay diin ang ila metabolismo nagahinay tubtob sa kubos sa 0.01 porsiento sangsa normal—halos wala na! Agod mahimo ini, ginapasalop nila ang ila mga tiil sa ila lawas, ginaislan ang nadula nga tubig sang isa ka pinasahi nga kalamay, kag nagabarikutot agod mangin gamay kaayo nga bola nga naputos sang wax nga ginatawag tun. Kon ang palibot mangin mahun-og liwat, magabugtaw sila sa sulod lang sang pila ka minuto ukon pila lang ka oras. Sa isa ka hitabo, ang mga water bear nga wala sing animo sa sulod sang 100 ka gatos ka tuig madinalag-on nga napasag-uli!

Huo, sa ila hipos apang makatilingala nga paagi, ining magagmay nga “nagasaog nga mga tinuga” nagadayaw kay Jehova.—Salmo 148:10, 13.

[Credit Line sang retrato sa pahina 30]

© Diane Nelson/Visuals Unlimited