Mga Pamatan-on nga Naga-Internet!

Handurawa nga ang imo bata nagalagaw sing isahanon sa mga kalye kon gab-i.

Handurawa nga ang imo tin-edyer nga bata nagaorganisar sing isa ka party sa inyo balay kag wala ka sing hinalung-ong sa sini.

Handurawa nga ang imo bata nagapahimo sang duplikado nga mga yabi para sa inyo balay kag ginapanagtag ini sa mga estranghero.

KON ang imo bata nagagamit sing Internet, ang mga ginsambit sa ibabaw indi gid imposible nga matabo. “Tuman kadaku ang posibilidad nga magkilalahay ang madamo nga tawo sa Internet, paagi sa message board kag subong man paagi sa pagbaslanay sing mga mensahe,” siling sang magasin nga Science News.

Kadali lang natun-an sang mga pamatan-on ang paggamit sing Internet. Sa pagkamatuod, sang 2004 halos 9 sa kada 10 ka tawo sa Estados Unidos nga nagapangidaron sing 12 tubtob 17 ang nagagamit sing Internet, nga matigayon sa halos tanan nga bahin sang kalibutan.

Pila lamang ka tawo ang nagapanghiwala sang pagkamapuslanon sang Internet. Apang ang tanan dapat maghalong sa mga katalagman nga ginadala sini. Halimbawa, madamo nga pamatan-on ang naga-Internet nga wala ginabantayan, kag ang pila sa ila nagapakigbahin sa network sang mga tawo, nga kon makilala mo indi mo gid—kag bisan sang imo bata—pag-agdahon sa inyo balay.

Ang pila ka inosente nga pamatan-on di-maalamon nga nagabutang pa gani sing personal nga impormasyon, opinyon, kag mga retrato sa Internet. Suno kay Propesor Zheng Yan sang State University of New York, ‘masami nga wala marealisar sang mga pamatan-on kon daw ano kadamo nga tawo ang mahimo makatigayon sina nga impormasyon, lakip ang mga mahingaliton sa sekso.’

Usisaon naton kon ano ang ginahimo sang madamo nga pamatan-on sa Internet. Mabuligan kita sini nga makita ang mga problema nga mahimo mag-utwas, mausisa kon ano ang ila ginapangita sa Internet, kag mahibaluan kon paano naton sila mabuligan agod matigayon nila ang ila nagakaigo nga mga kinahanglanon. Makabulig man ini sa Cristianong mga pamatan-on nga maatubang ang hangkat nga magpabilin nga matutom sa Dios sa sining mabudlay nga mga tion.—2 Timoteo 3:1-5.