Napili Ko ang Husto nga Karera

Panugiron ni Sonia Acuña Quevedo

Gintanyagan ako sing mas mataas nga posisyon sa akon trabaho sa banko. Ini nga trabaho magakahulugan sing kadungganan kag mas mataas nga sueldo. Apang, bag-o ko lang nabaton ang pangagda nga mag-alagad sa isa ka malayo nga kongregasyon subong bug-os tion nga payunir nga ministro. Pagligad sang 32 ka tuig, nahibaluan ko nga maalamon ang akon desisyon sadto.

SI NANAY ginpadaku nga Romano Katoliko apang may pagduhaduha sia sa doktrina sang simbahan. Nagapalibog sia kon ngaa ginasimba ang mga imahen nga ginhimo sang tawo. Ang relihioso nga kamatuoran importante sa iya, gani nagasimba sia sa lainlain nga relihion para sa kaathagan, apang wala sia makasapo sing sabat.

Isa ka adlaw samtang nagapungko si Nanay sa gua sang amon balay sa Tuxtla, Mexico, agod magpahanginhangin, ginpalapitan sia sang isa sa mga Saksi ni Jehova. Nagdayaw gid si Nanay kay pasad sa Biblia ang sabat sang Saksi sa iya mga pamangkot, gani nagpasugot si Nanay nga balikan sia. Sang magbalik ang Saksi, nagahulat si Nanay upod ang Adbentista nga ministro, Katoliko nga pari, kag Nazarene nga manugwali. Ginpamangkot ni Nanay ang parte sa Adlaw nga Inugpahuway, kag ang Saksi lamang ang nakahatag sing makaalayaw nga sabat pasad sa Kasulatan. Ang matuod, ang Saksi lamang ang may dala nga Biblia! Sang 1956, pagkatapos lamang sang anom ka bulan nga pagtuon sing Biblia, ginbawtismuhan si Nanay subong isa sa mga Saksi ni Jehova. Otso anyos ako sadto.

Ang Ginkabalak-an Gid ni Tatay

Wala nagpamatok si Tatay sang magtuon sing Biblia si Nanay. Apang sang pati kami nga apat ka kabataan nila—duha ka lalaki kag duha ka babayi—gintudluan man ni Nanay kag sang nagtambong na sia sa Cristianong mga miting, ginsunog ni Tatay ang iya literatura. Bangod kumbinsido gid si Tatay nga ginpatalang kami, gingamit niya ang Biblia sang Katoliko agod pamatud-an nga ang mga Saksi malimbungon nga nagbutang sang ngalan sang Dios—Jehova—sa ila bersion sang Biblia. Sang ginpakita ni Nanay ang ngalan sang Dios sa Biblia mismo ni Tatay, natingala gid sia, kag nagbag-o ang iya panimuot sa mga Saksi.—Salmo 83:18.

Sa Mexico, isa gid ka pinasahi nga okasyon ang ika-15 nga kaadlawan sang isa ka bata nga babayi. Bangod ang pagsaulog sang kaadlawan di-Makasulatanhon, wala ko na ginsaulog ang akon kaadlawan. * Apang nagpamilit gid si Tatay nga regaluhan ako sing isa ka pinasahi nga butang. Ginpamensar ko ini kag nagsiling, “Tay, luyag ko nga ikaw ang regalo ko. Luyag ko nga mag-upod ka sa akon sa masunod nga asambleya sang mga Saksi ni Jehova.” Nagpasugot sia, kag naglambo ang iya interes sa Biblia.

Isa ka gab-i, pagkatapos sang mabaskog nga bagyo, natapakan ni Tatay ang kable sang koryente kag malubha sia nga nasamaran. Samtang nagapaayoayo, 24 oras nga gin-atipan sia sang mga Saksi sa amon duog—isa ka pagpakita sing Cristianong gugma nga indi gid niya malipatan. Sang ulihi, nakigbahin na sia sa publiko nga ministeryo kag gindedikar ang iya kabuhi kay Jehova. Sing makapasubo, napatay si Tatay sang Septiembre 30, 1975, isa ka bulan na lang antes sia bawtismuhan kuntani. Nahidlaw na gid kami nga mahakos sia sa pagkabanhaw!—Binuhatan 24:15.

Maayo nga Impluwensia sang Pamilya

Ginapabaloran gid sang akon magulang nga si Carmen ang bug-os tion nga ministeryo. Sa tapos sia nabawtismuhan sang 1967, nagregular payunir sia, nga nagahinguyang sing mga 100 ka oras sa ministeryo kada bulan. Sang ulihi, nagsaylo sia sa siudad sang Toluca, sa sentro sang Mexico. Sang makatapos ako sa pag-eskwela, nakatrabaho ako  sa banko kag ginbawtismuhan ako sang Hulyo 18, 1970.

Naghatag gid sing daku nga kalipay kay Carmen ang bug-os tion nga pagministeryo, kag ginpalig-on niya ako nga updan sia sa Toluca. Napensaran ko ini samtang nagapamati ako sa pamulongpulong nga nagapadaku nga dapat gamiton sang mga sumulunod ni Jesus ang ila hamili nga espirituwal nga pagkabutang agod himayaon ang Dios. (Mateo 25:14-30) Ginpamangkot ko ang akon kaugalingon, ‘Nagapangabudlay bala ako sing lakas kag ginagamit ang espirituwal nga mga hiyas nga gintugyan sa akon?’ Ini nga panghunahuna nagpadabdab sa sulod nakon sang handum nga himuon ang labi pa para kay Jehova.

Pagpili sa Duha ka Tulumuron

Sang 1974, nag-aplay ako agod mag-alagad subong payunir nga ministro sa iban nga lugar. Wala madugay sang ulihi, gintawgan ako sa trabaho sang isa ka Cristianong gulang sa Toluca. “Ginahulat ka namon. Ngaa wala ka pa nagkadto diri?” pamangkot niya. Sa wala ko ginapaabot, gintangdo ako nga mag-alagad sa Toluca subong isa ka espesyal payunir, apang ang sulat para sa akon asaynment mahimo nga nagtalang! (Ang mga espesyal payunir nagaalagad sing bug-os tion bisan diin man sila itangdo sang organisasyon ni Jehova.)

Ginpahibalo ko dayon ang banko sa akon desisyon nga maghalin. “Dali lang, Sonia,” siling sang akon boss, nga nagawagayway sing isa ka panid nga papel. “Bag-o lang kami ginpahibalo nga isa ikaw sa pito ka babayi nga ginpili nga mangin isa sa mga assistant manager. Ang aton kompanya wala pa gid anay makatangdo sing mga babayi sa sini nga posisyon. Indi mo bala ini pagbatunon?” Subong sang ginsambit sa umpisa, ini nga promosyon magakahulugan sing kadungganan kag mas mataas nga sueldo. Sa gihapon, ginpasalamatan ko ang akon boss kag ginsilingan sia nga determinado ako nga alagaron ang Dios sing bug-os. “Ti, padayuna ina,” siling niya. “Apang tandai, kon luyag mo mag-obra handa gid kami nga batunon ka liwat.” Pagligad sang duha ka adlaw ato na ako sa Toluca.

Pag-espesyal Payunir sa Mexico

Duha na ka tuig nga nagaalagad si Carmen subong espesyal payunir sa Toluca sang nag-apas ako sa iya. Malipayon gid kami kay nag-updanay liwat! Apang ang amon pag-updanay wala magdugay. Tatlo ka bulan sang ulihi, naaksidente si Nanay kag busa nagakinahanglan sing padayon nga pag-atipan. Pagkatapos mapamangkot ang sanga talatapan sang mga Saksi ni Jehova, nagsugtanay kami ni Carmen nga sia ang mapauli agod atipanon si Nanay, nga iya ginhimo sa sulod sang 17 ka tuig. Sa sini nga mga tinion, nag-alagad si Carmen subong isa ka regular payunir, kag ginaagda niya ang iya mga ginatun-an sa Biblia nga sa balay sila matuon, agod nga indi niya mabiyaan si Nanay.

Sang 1976, gin-asayn ako liwat sa Tecamachalco, isa ka siudad nga may magkatuhay nga kahimtangan—ang mga pigado nagapuyo sa isa ka bahin sang banwa, kag ang mga manggaranon sa pihak naman nga bahin. Nakasugod ako sing pagtuon sa Biblia sa isa ka laon nga tigulang nga babayi nga nagaistar upod sa iya manggaranon nga manghod nga lalaki. Sang ginsingganan niya ang iya manghod nga luyag niya mangin Saksi, ginpahog sia sini nga pahalinon sa ila balay. Apang, ining mapainubuson nga babayi wala mahadlok, kag sang nabawtismuhan sia, gintuman sang iya manghod ang iya pamahog. Bisan pa nga 86 anyos na sia sadto, bug-os gid ang iya pagsalig kay Jehova. Gin-atipan sia sang kongregasyon kag nagpabilin sia nga matutom tubtob sa iya kamatayon.

Nag-eskwela sa Gilead, Dayon Nagpa-Bolivia

Malipayon gid ako sa akon pag-alagad sa Tecamachalco sa sulod sang lima ka tuig. Dayon nakabaton ako sing imbitasyon nga magtambong sa una nga Gilead Extension School nga pagahiwaton sa Mexico. Subong sang ginapahangop sang ngalan sini, isa lamang ini ka ekstension sang eskwelahan nga ginahiwat sa New York. Luyag gid nanday Nanay kag Carmen nga batunon ko ang imbitasyon, gani nagkadto ako sa sanga talatapan sa Mexico City para sa napulo ka semana nga kurso, isa gid ka talalupangdon nga espirituwal nga bahin sang akon kabuhi. Naggradwar ang amon klase sang Pebrero 1, 1981, kag gin-asayn ako sa La Paz, Bolivia, upod kay Enriqueta Ayala (karon Fernández na).

Pag-abot namon sa La Paz, ang mga kauturan nga masugat tani sa amon wala pa makaabot. “Ngaa usikan naton ang tion?” siling namon. Gani nagpanaksi kami sa mga tawo sa erport. Pagligad sang tatlo ka oras sang makalilipay nga pagbantala, nagkitaay gid man kami sang mga kauturan halin sa sanga talatapan. Nagpangayo sila sing pasaylo nga nagasiling nga tuman gid ka gutok sang kalye bangod sang carnival.

 Pagpanaksi sa Ibabaw sang mga Panganod

Ang La Paz halos 3,625 metros sa ibabaw sang nibel sang dagat, gani sa kalabanan nga adlaw yara kami sa ibabaw sang mga panganod. Bangod diutay lang ang oksiheno sa hangin mabudlay ang pagginhawa, kag ginakapoy dayon ako bisan dali lang ang akon pagbantala. Bisan isa ka tuig pa ang nagligad antes ako nakapasibu sa sining mataas nga duog, ang pagpakamaayo ni Jehova naglabaw gid sa pisikal nga mga kabudlayan. Halimbawa, isa ka aga sang 1984, nagtaklad ako sa batuhon nga bukid pakadto sa isa ka balay nga nahamtang sa putukputukan. Nagahangos, nanuktok ako sa puertahan, kag ang isa ka babayi naggua. Makalilipay ang amon paghambalanay, kag nagsiling ako nga mabalik ako sa masunod nga mga inadlaw.

“Ambot lang,” siling niya. Apang nagbalik ako, kag ginpangabay ako sang babayi nga tun-an sing Biblia ang iya bata nga babayi. “Responsibilidad ina sang mga ginikanan,” siling ko. “Apang, buligan ko ikaw kon luyag mo.” Nagpasugot sia kag nagtuon man sia sing Biblia. Bangod indi sia makahibalo magbasa, nagtuon kami sa bukleta nga Learn to Read and Write, nga ginhanda sang mga Saksi ni Jehova para sa sini nga mga kahimtangan.

Sa pagligad sang tion, nangin walo ang kabataan sini nga pamilya. Kon magduaw ako, ang pila ka kabataan nagakaptanay agod buligan ako nga makataklad sa banglid. Sang ulihi, ang bug-os nga pamilya nag-alagad kay Jehova—ang amay, iloy, kag walo ka kabataan. Tatlo sa mga babayi payunir, kag ang isa sa mga lalaki gulang sa kongregasyon. Sang mapatay ang ila amay sang 2000, ministeryal sia nga alagad sa kongregasyon. Malipayon gid ako kon hunahunaon ko ining maayo nga pamilya kag ang ila katutom! Nagapasalamat ako kay Jehova sa pagtugot sa akon nga buligan sila.

Nag-updanay Kami Liwat ni Carmen

Sang mapatay si Nanay sang 1997, gin-agda liwat si Carmen nga mag-alagad subong espesyal payunir. Sang 1998 gin-asayn sia sa Cochabamba, Bolivia, diin nagaalagad ako. Huo, pagkatapos sang 18 ka tuig nag-updanay kami liwat, kag si Carmen nangin misyonera. Makalilipay gid ang amon mga tinion sa Cochabamba, diin ang klima tuman gid kanami amo nga ginasiling nga ang mga pispis nga swallow wala nagahalin diri! Sa karon, yara kami sa Sucre, Bolivia, isa ka matahom nga siudad nga may 220,000 ka pumuluyo, nga nahamtang sa mataas nga nalupyakan. Ginhayuan ini anay nga Little Vatican bangod madamo ang simbahan sang Katoliko diri, apang karon ang siudad may lima na ka kongregasyon sang mga Saksi ni Jehova.

Sing tingob, kami ni Carmen nakapayunir sa sulod sang kapin sa 60 ka tuig, kag natigayon namon ang di-matupungan nga pribilehiyo nga mabuligan ang kapin sa isa ka gatos ka tawo nga magpabawtismo. Huo, ang pag-alagad kay Jehova sing bug-os tagipusuon amo gid ang labing makapaladya nga paagi sang pagkabuhi!—Marcos 12:30.

[Nota]

[Retrato sa pahina 15]

Nagtaklad ako sa batuhon nga bukid agod tun-an ini nga pamilya

[Retrato sa pahina 15]

Sa ministeryo upod sa akon magulang nga si Carmen (sa tuo)