Ang Pagtamod sang Biblia

Ano ang Kahulugan sang Mangin Isa ka Cristiano?

“SA AKON pungsod ang mangin isa ka Cristiano nagakahulugan nga magsimba isa ka bes kada semana,” siling ni Kingsley, gikan sa isa ka pungsod sa Aprika. Si Raad, gikan sa Natung-an nga Sidlangan, nagpaathag: “Sa amon komunidad ang mga Cristiano ginatamod nga isa ka grupo nga nagasunod sang mga kinabatasan kag mga tradisyon sang Nakatundan sa ila pamayo, mga selebrasyon, kag pagpakig-angot sa mga babayi.”

Apang ang mangin isa ka Cristiano nagakahulugan lamang bala nga ang isa magsimba isa ka bes kada semana kag magsunod sa pila ka kinabatasan kag mga tradisyon sang katilingban? Indi bala makatarunganon lamang nga ang tinaga nga “Cristiano” magpatuhoy sa dalanon sang pagkabuhi nga nagapakita sing panimuot, prinsipio, kag paggawi nga ginbantala kag ginpakita ni Cristo? * Paano ginahimo ang Cristianismo sang magsugod ini?

Cristianismo sang Una—Isa ka Dalanon sang Kabuhi

Nagsiling si Jesus sa iya mga sumulunod: “Mga abyan ko kamo kon ginahimo ninyo ang ginasugo ko sa inyo.” (Juan 15:14) Bangod ang mga panudlo ni Jesus nagaapektar sa tanan nga bahin sang ila kabuhi, ginpatuhuyan sang primero sang mga disipulo ni Cristo ang ila relihion subong ‘Ang Dalan.’ (Binuhatan 9:2) Sang ulihi, “gintawag [sila] nga mga Cristiano . . . paagi sa pagtuytoy sang Dios.” (Binuhatan 11:26) Ining bag-o nila nga ngalan nagakahulugan nga nagpati sila nga si Jesus ang Anak sang Dios, nga nagpaalinton sa katawhan sang kabubut-on sang iya langitnon nga Amay. Bangod sini nga pagpati, ginsunod nila ang isa ka dalanon sang kabuhi nga tuhay sangsa kalibutan sa palibot nila.

 Ang mga panudlo ni Cristo nagpahulag sa iya mga sumulunod nga sundon ang mga panudlo sang Biblia, nga nagakahulugan sing paglikaw sa “pagpakighilawas, kahigkuan, lugak nga paggawi, idolatriya, espiritismo, pag-ilinaway, pinuyas, kaimon, pagsilabo sang kaakig, pagbaisay, . . . pagpahubog, magansal nga kinalipay, kag mga butang nga kaangay sini.” (Galacia 5:19-21; Efeso 4:17-24) Ginpahanumdom ni apostol Pablo ang mga Cristiano sa Corinto nga ang pila sa ila naghimo anay sini gid nga mga butang. Nian nagdugang sia: “Apang ginhugasan na kamo, apang ginpakabalaan na kamo, apang ginpahayag na kamo nga matarong sa ngalan sang aton Ginuong Jesucristo.”—1 Corinto 6:9-11.

Naghambal si E. W. Barnes sa iya libro nga The Rise of Christianity: “Sa nahauna nga mga sinulatan tuhoy sa Cristianismo ang Cristianong kahublagan ginrepresentar subong may maayo gid nga moral kag masinulundon sa kasuguan. Ang mga katapo sini naghandum nga mangin maayong mga banwahanon kag mainunungon nga mga sakop. Naglikaw sila sa kalautan kag mga bisyo sang paganismo. Sa pribado nga pagkabuhi nangin mahidaiton sila nga mga kaingod kag masaligan nga mga abyan. Gintudluan sila nga mangin maligdong, mapisan kag matinlo sing pagkabuhi. Sa tunga sang nagadagsa nga kagarukan kag kahigkuan, kon ila ginahuptan ang ila mga prinsipio, bunayag kag maminatud-on sila. Mataas ang ila mga talaksan sa sekso: ginatahod ang wagkus sang pag-asawahay kag may putli nga pagkabuhi sang pamilya.” Amo ini ang mga kinaiya kon mangin Cristiano ang isa sang una.

Ang isa pa ka talalupangdon nga tanda sang Cristianismo sang una amo ang makugi nga pag-ebanghelyo sini. Ginsugo ni Cristo ang iya mga sumulunod: “Busa lakat kamo kag maghimo sang mga disipulo sa mga tawo sang tanan nga pungsod.” (Mateo 28:19, 20) Si Jean Bernardi, isa ka propesor sa Sorbonne University sa Paris, Pransia, nagsiling: “[Ang mga Cristiano] dapat maggua kag magbantala bisan diin kag bisan kay sin-o. Sa mga dalan kag mga siudad, sa mga plasa kag mga puluy-an. Ginabaton man sila ukon wala. Sa mga imol, ukon sa mga manggaranon nga ginaupangan sang ila mga pagkabutang. . . . Dapat sila maglakbay sa mga dalan, magpanakayon sa mga sakayan, kag magkadto sa mga ukbong sang duta.”

Matuod nga Cristianismo Karon

Ang matuod nga mga Cristiano karon dapat nga makilala bangod sang ila tuhay nga dalanon sang kabuhi, subong sa ginhimo nila sang unang siglo. Sing nahisuno, ginatuman gid sang mga Saksi ni Jehova ang mga prinsipio nga ginpasad sang una nga mga Cristiano. Natalupangdan sang iban ang ila mga panikasog nga ipahisuno ang ila kabuhi sa mga panudlo sang Biblia.

Halimbawa, ginabaton sang New Catholic Encyclopedia nga ang mga Saksi ni Jehova kilala subong “isa sa pinakamabuot nga mga grupo sa kalibutan.” Ang Deseret News sang Salt Lake City, Utah, nagkomento nga ang mga Saksi ni Jehova, “nagapasanyog sang mabakod nga higot sa pamilya kag nagapatubas sang mabungahon kag bunayag nga mga banwahanon.” Ang pamantalaan nagsiling pa: “Ang mga katapo nagapati sa isa ka mabakod nga talaksan sa moral. Nagapati sila nga ang pagpanigarilyo, sobra nga pag-inom, sayop nga paggamit sa droga, pagsugal, pagkasalamwanan sa sekso kag homoseksuwalidad mga buhat nga makahalalit sa espirituwalidad. Nagatudlo sila sing pagkabunayag kag kapisan sa trabaho.”

Serioso man ang mga Saksi sa ila salabton nga mangin makugi nga mga ebanghelisador. Ang New Catholic Encyclopedia nagkomento tuhoy sini: “Ang panguna nga obligasyon sang tagsa ka katapo . . . amo ang pagpanaksi tuhoy kay Jehova paagi sa pagbantala sang Iya nagapakari nga Ginharian. . . . Agod mangin matuod nga Saksi ang isa dapat magbantala sing epektibo sa nanuhaytuhay nga paagi.”

Maathag nga ang matuod nga Cristianismo labaw pa sangsa mangin katapo lamang sang isa sa madamo nga relihion sang Cristiandad. Gintagna mismo ni Jesus ang pagdamo sang di-matuod nga mga Cristiano. (Mateo 7:22, 23) Ginaagda ka sang mga Saksi ni Jehova nga tun-an kag iaplikar ang gintudlo ni Jesus. Amo ini ang kahulugan sang mangin isa ka Cristiano. Si Jesus nagsiling: “Kon nahibaluan ninyo ini nga mga butang, malipayon kamo kon himuon ninyo ini.”—Juan 13:17.

[Nota]

NAPALIGBAN MO NA BALA?

▪ Sin-o ang gintawag ni Jesus nga iya mga abyan?—Juan 15:14.

▪ Ano nga mga paggawi ang dapat likawan sang matuod nga mga Cristiano?—Galacia 5:19-21.

▪ Sa ano nga hilikuton dapat makigbahin ang mga Cristiano?—Mateo 28:19, 20.

[Mga retrato sa pahina 26]

Ang matuod nga mga Cristiano makugi nga mga ebanghelisador, subong sang ginhimo nila siniglo na ang nagligad