Isa ka Tumalagsahon nga Higante nga Bato

SUNO SA MANUNULAT SANG MAGMATA! SA CANADA

NANGIN masaligan ini nga palatandaan sang mga mangingisda kag mga nabigador sa sulod sang mga siglo. Ginhimo ini nga halandumon sang mga mamalaybay, mga manunulat kag mga pintor. Ginlaragway sang isa ka ensiklopedia ini nga bato subong “makatalanhaga kag makawiwili.” Sa sidlangan nga punta sang Gaspé Peninsula sa Gulpo sang St. Lawrence, yara ang matahom nga Percé Rock nga nahamtang sa nagainggat kag duag-asul nga tubig sang Atlantic Ocean. Ang bato mga 433 metros ang kalabaon, mga 90 metros ang kasangkaron, kag kapin sa 88 metros ang kataason.

Kon kaisa, ang maisugon nga mga tumandok nagasaka sa tindugon nga kilid sang bato kag nagapanguha sang itlog sa mga pugad sang mga pispis. Apang, agod mapreserbar kag maamligan ang bato subong man ang mga pispis nga nagapuyo sa sini, sang 1985 gindeklarar sang panguluhan sang Quebec ang Percé Rock kag ang kaingod nga Bonaventure Island subong mga dalangpan sang pispis. Ang Bonaventure Island amo ang ikaduha sa pinakadaku nga buluaran sang northern gannet sa kalibutan.

May nagasiling nga sang una ang Percé Rock naangot sa mainland kag ini mahimo nga may halos apat ka arko. Apang karon isa na lang ka arko ang nabilin—kapin sa 30 metros ang kasangkaron—sa punta nayon sang bato nga nagaatubang sa dagat. Kon hunas makita ang isa ka pasil nga nagaangot sa bato kag sa mainland. Kada mga apat ka oras, sarang makalakat ang maisog nga mga bisita tubtob sa tiilan sang bato kag dayon manglubaybay sing mga 15 minutos padulong sa arko samtang ginaagsikan sang balod.

May dapat andaman ang mga adbenturero. Ang isa nga nakataklad sa ibabaw sang natiphag nga mga bloke sang bato agod malab-ot ang baba sang arko nagsiling: “Kada pila ka minuto makabati ka sing makakululba nga lagabong sang mga bato nga nagatupa sa tubig kaangay sang magamay nga mga bomba. Ang pila ka bato nagatupa sa iban nga bato kag nagasigabong kaangay sa lupok sang isa ka pusil.”

Subong sang natalupangdan sang madamo nga bisita, ang Percé Rock may makahalawhaw nga katahom. Apang, isa lamang ini ka halimbawa sang matahom nga mga talan-awon nga aton makita diri sa duta. Nanuhaytuhay kag tuman gid kadamo ini! Sa tion nga makita ang mga ini, ayhan ikaw man ‘magapahimunong kag magatalupangod sa makatilingala nga mga binuhatan sang Dios.’—Job 37:14.

[Credit Line sang retrato sa pahina 23]

© Mike Grandmaison Photography