Ano ang Paglaum sang mga Imol?

INDI malain nga magbakabaka sa pagtrabaho kon ang sueldo husto. Talupangda ang komento sang isa ka manunulat sang Biblia: “Nahibaluan ko nga wala na sing maayo pa . . . sangsa magkalipay . . . kag nga ang tagsa ka tawo man magkaon kag mag-inom kag makakita sing kaayuhan sa bug-os niya nga kinabudlayan. Dulot ini sang Dios.”—Manugwali 3:12, 13.

Apang subong sang nakita na naton, luyag sang sistema sa ekonomiya sa bug-os nga kalibutan nga magbakabaka sa pagtrabaho ang mga mamumugon apang masami nga indi naman husto maghatag sing sueldo. Madamo ang imol gihapon, kag nagahimakas nga mabuhi sa adlaw-adlaw. Talagsa lang sila nga ‘nagakalipay’ kag ‘nakakita sing kaayuhan’ sa ila kabuhi. Ang kalibutan nangin tuman ka manggaranon, apang ayhan katunga sang katawhan ang wala sing oportunidad nga makabenepisyo sa sini.

Ang Pag-ulikid sang Dios sa mga Imol

Wala nalipay sa sini ang Manunuga sang katawhan, nga si Jehova nga Dios. Naluoy si Jehova sa mga imol. Aton mabasa sa Biblia: “Pat-od nga indi [sang Dios] pagkalipatan ang pagtuaw sang mga nasit-an.” (Salmo 9:12) Si Jehova isa ka Dios nga nagaulikid sa mga imol.

Tuhoy kay Jehova, ang Biblia nagasiling: “Gintugyan sa imo sang makaluluoy, sang bata nga walay amay, ang iya kaugalingon. Ikaw nangin iya manugtabang.” (Salmo 10:14) Talupangda kon paano ginapatuhuyan sini nga bersikulo ang mga napiutan subong mga indibiduwal. * Huo, ginatan-aw sang Dios ang kada isa kag ginabinagbinag ang iya mga kinahanglanon. Para sa iya, ang kada tawo hamili kag takus nga talupangdon. Ginaagda ni Jehova ang mga tawo gikan sa tanan nga kahimtangan sing pangabuhi nga magtuon sa iya kag makig-abyan sa iya.

Ang isa ka butang nga matun-an sang mga tawo sa Dios amo ang magpakita sing kaluoy kag kahanuklog sa iban. Ginakabig sang mga Saksi ni Jehova ang ila kaugalingon nga isa ka daku nga espirituwal nga pamilya. Ginapabaloran nila ang isa kag isa subong mga indibiduwal—ang matuod nga Cristianong gugma bugana sa tunga nila. Si Ginuong Jesucristo nagsiling anay sa iya mga sumulunod: “Tanan kamo mag-ulutod.” (Mateo 23:8) Busa, ang tanan nga nagapakigbahin sa matuod nga pagsimba nangin bahin sang isa ka paghiliutod  nga wala sing ginapasulabi. Nagaulikid sila sa isa kag isa kag nagapalig-unay sa mabudlay nga mga tion.

Nagaunod ang Biblia sing mga prinsipio nga makapahaganhagan sa di-maayo nga mga epekto sang kaimulon. Ginapakita sang Kasulatan nga ginapakamalaut sang Dios ang paghigko sa lawas—paagi sa paggamit sing tabako—kag ang sobra nga pag-inom sing alkohol. (Hulubaton 20:1; 2 Corinto 7:1) Ang tawo nga nagaaplikar sini nga mga prinsipio wala nagausik sing kuarta sa makahalalit nga mga bisyo. Malikawan niya ang balatian nga tuga sang pagpanigarilyo kag pagpahubog kag ang resulta nga gasto sa pagpabulong. Nagatudlo man ang Biblia sa mga tawo nga sikwayon ang materyalistiko nga panghunahuna kag kakagod. (Marcos 4:19; Efeso 5:3) Paagi sa pagtahod sa Pulong sang Dios sa sini nga mga butang, ang isa ka tawo wala man nagausik sing kuarta sa sugal.

Nagahatag ang Biblia sing praktikal nga mga prinsipio para sa adlaw-adlaw nga pagkabuhi, bisan pa sa sobra nga kaimulon. Talupangda ang masunod nga eksperiensia:

Sa isa ka pungsod diin madamo ang wala sing trabaho, isa ka empleyada sa pabrika ang posible nga madulaan sing trabaho sang naglisensia sia nga hatagan sia sing tion nga makatambong sa Cristianong mga miting. Mahapos sia nga pahalinon sa trabaho sang iya superbisor. Apang, nakibot sia kag ang iban pa nga empleyado sang ginpasugtan sia. Dugang pa, ginsilingan sia sang superbisor nga luyag niya nga magtrabaho sia sing padayon sa iya pabrika kag gindayaw sia subong “isa ka huwaran nga trabahador.” Ngaa?

Ginasunod sang empleyada, nga isa sa mga Saksi ni Jehova, ang mga prinsipio sang Biblia. Sa luyag niya nga ‘mangin bunayag sa tanan nga butang,’ wala sia nagabinutig ukon nagapangawat kag gani nakilala sia nga bunayag. (Hebreo 13:18) Bilang pagsunod sa inspirado nga prinsipio sa Colosas 3:22, 23, “bug-os kalag” sia kon magtrabaho. Buot silingon, matinumanon sia sa iya amo kag mapisan nga nagatrabaho sa kada adlaw nga ginasuelduhan sia.

Sa pagkamatuod, nagakabuhi kita sa isa ka sistema sa ekonomiya diin lapnag ang kakagod kag pinakaimportante sa gihapon ang ganansia. Ang  iban nga nagatahod sing hanuot sa mga prinsipio sang Biblia mahimo gihapon nga maghimakas agod matigayon ang ila kinahanglanon nga pagkaon, panapton, kag puluy-an. Apang may matinlo sila nga konsiensia sa atubangan sang ila Manunuga kag may kompiansa nga nagahulat sa mas maayo nga tion sa unahan, ini bangod kay Jehova, “ang Dios nga nagahatag sang paglaum.”—Roma 15:13.

Isa ka Permanente nga Solusyon sa Kaimulon

Ginapahayag sang Biblia nga wala gid nahamuot si Jehova sa di-makatarunganon nga nagapigos sa mga imol. Ang inspirado nga Pulong sang Dios nagasiling: “Kailo ang mga nagahimo sing mahaliton nga mga palatukuran kag sila nga sa pirme nga pagsulat, nagsulat sing kagamo lamang, agod tabugon ang mga timawa gikan sa isa ka legal nga asunto kag agawon ang katarungan gikan sa mga nagaantos . . . , agod ang mga balo nga babayi mangin ila inagaw, kag agod atihon nila bisan ang mga bata nga lalaki nga wala sing amay!” (Isaias 10:1, 2) Ginapatumbayaan man nila ang mga imol sing hungod ukon indi, ang mga nagakontrol karon sa ekonomiya sang tawhanon nga katilingban bahin sang mapiguson nga sistema nga laglagon sang Labing Gamhanan nga Dios.

Serioso nga ginpamangkot ni manalagna Isaias ang mga manugpigos: “Ano ang inyo himuon sa adlaw sang paghatag sing igtalupangod kag sa paglaglag, kon mag-abot ini gikan sa malayo?” (Isaias 10:3) Laglagon sila ni Jehova kag ang ila di-makatarunganon nga sistema.

Apang indi lamang paglaglag sa mga manugpigos ang himuon sang Dios. Hatagan niya ang mga matarong sing isa ka sahi sang pagkabuhi nga wala na sing inhustisya. Paagi sa isa ka labing maayo nga sahi sang gobierno, tugutan niya ang tanan nga tawo nga magkabuhi sing makaalayaw kag sing makalilipay kag dulaon niya ang kaimulon. Agod maghamungaya sa sina nga tion, indi mo na kinahanglan ang daku nga panublion nga kuarta, may impluwensia nga mga koneksion kag mga kasosyo, ukon mga sampaton sa negosyo. Paano kita makapat-od nga mahanabo gid ini nga mga pagbag-o?

Gintawag ni Jesucristo, ang isa nga gintangdo ni Jehova nga maggahom sa katawhan, inang makalilipay nga palaabuton subong “pagtuga-liwat.” (Mateo 19:28) Nagakahulugan ini sing pagbag-o liwat, sing isa ka bag-o nga panugod sa kabuhi sang tawo. Paagi sa paggamit sa tinaga nga  “pagtuga-liwat,” ginpadaku ni Jesus nga hatagan ni Jehova ang mga matarong sing oportunidad nga magkabuhi nahisanto sa kabubut-on sang aton mahigugmaon nga Manunuga. Lakip sa madamong benepisyo nga ihatag niya sa katawhan sa sina nga tion amo ang pagdula sing permanente sa di-makatarunganon nga ekonomiya nga nagapabug-at sa tuman kadamo.

Ang Biblia matagnaon nga nagsiling tuhoy sa paggahom ni Jesucristo: “Luwason niya ang imol nga nagapangayo sing bulig, subong man ang nasit-an kag ang bisan sin-o nga wala sing manugtabang. Magakaawa sia sa kubos kag imol, kag luwason niya ang mga kalag sang mga imol. Tubson niya ang ila kalag gikan sa pagpigos kag kasingki, kag ang ila dugo mangin bilidhon sa iya itululok.”—Salmo 72:12-14.

Matigayon mo ining matahom nga palaabuton. Apang agod matuman mo ang mga ginapatuman sang Dios para sa kabuhi sa sinang bag-ong kalibutan, dapat anay nga tun-an mo kag dayon himuon ang kabubut-on sang matuod nga Dios. Maghimo ka sing maalamon nga mga desisyon pasad sa ihibalo sa Pulong sang Dios. Magkabuhi ka nga ginahulat ang makalilipay nga palaabuton nga ihatag sang Dios sa tanan nga katawhan. Indi ka gid mapaslawan. Ang Pulong sang Dios nagasaad: “Ang mga imol indi pagkalimtan sing dayon, ukon madula sing dayon ang paglaum sang mga mahagop.”—Salmo 9:18.

[Nota]

[Blurb sa pahina 9]

Matigayon mo ang isa ka matahom nga palaabuton

[Kahon/Retrato sa pahina 10]

Dapat Bala Ako Magsaylo Kon Diin Mas Maayo ang Pangabuhi?

Wala ginahambalan sang Pulong sang Dios ang mga tawo kon diin sila dapat magpuyo kag magtrabaho. Apang, mabuligan sia sang mga prinsipio sang Biblia sa pagpamat-od kon bala mas maayo nga magsaylo sia sa iban nga pungsod diin mas maayo ang pangabuhi. Talupangda ang masunod nga mga pamangkot kag ang nadalahig nga mga prinsipio sa Kasulatan.

1. Nasulay bala ako bangod sang wala sing basihan nga mga hambal? Ang Hulubaton 14:15 nagasiling: “Ang bisan sin-o nga di-eksperiensiado nagatuo sa tagsa ka pulong, apang ang isa nga maalam nagabinagbinag sang iya mga tikang.” Sang nagsaylo sia sa isa ka manggaranon nga pungsod, ang isa ka tawo gikan sa Nasidlangan nga Europa nagsiling: “Nabalitaan ko nga madamo diri sing kuarta kag madali lang ini makita. Apang tubtob karon wala ko pa ini makita.”

2. Timbang bala ang akon pagtamod sa mga kinahanglanon sang akon pamilya? Nahangpan ko bala kon ano gid ang mga kinahanglanon kag kon ano ang mga luyag lamang? Katungdanan sang mga ulo sang pamilya nga amanan sing materyal nga mga butang ang ila asawa kag mga anak. (1 Timoteo 5:8) Apang salabton man sang mga amay sa Dios nga tudluan ang ila mga anak tuhoy sa moral kag espirituwal nga mga butang. (Deuteronomio 6:6, 7; Efeso 6:4) Ayhan maaman sang amay ang mas madamo nga materyal nga butang kon maglakat sia. Apang indi niya maaman ang moral kag espirituwal nga paghanas nga kinahanglan sang iya mga anak kon indi niya sila makita sa sulod sang pila ka semana, bulan, ukon tuig.

3. Nahangpan ko bala nga ang madugay nga paghilayuay namon nga mag-asawa mahimo nga magbutang sa amon sa katalagman nga magpanglahi? Nagapaandam ang Pulong sang Dios sa mga mag-asawa nga hunahunaon nila ang seksuwal nga mga kinahanglanon sang isa kag isa.—1 Corinto 7:5.

4. Nahangpan ko bala ang malain nga resulta sang ilegal nga pagsulod sa isa ka pungsod? Obligado ang matuod nga mga Cristiano nga tumanon ang kasuguan sang isa ka pungsod.—Roma 13:1-7.

[Mga retrato sa pahina 8, 9]

Manggaranon man kita ukon imol, ang mga prinsipio sang Biblia mapuslanon

[Credit Line sang retrato sa pahina 7]

Top: © Trygve Bolstad/Panos Pictures