Pagbantay sa Kalibutan

▪ Ang 5 porsiento sa balayran sa koryente sang isa ka kinaandan nga panimalay sa Canada naghalin sa de-koryente nga mga kagamitan nga, bisan wala ginagamit, naangot gihapon sa saksakan.—NATIONAL POST, CANADA.

▪ Suno sa isa ka surbe, nagapati ang mga Ruso nga lakip sa pinakaimportante nga mga problema nga dapat lubaron sang gobierno amo ang pagpauntat sang “kagarukan” kag “pagtapna sang pagtimbuok sang mga presyo.”—PRAVDA, RUSSIA.

▪ Suno sa isa ka surbe, mga 26.4 porsiento sang mga Grade V kag VI sa Taiwan “ang nakahunahuna nga maghikog.”—THE CHINA POST, TAIWAN.

▪ “Bisan pa nabuhinan sang teknolohiya sing 38% ang kinaandan nga isa ka semana nga pagtrabaho sa Estados Unidos sa sulod sang isa ka siglo, ang mga empleyado wala gihapon sing tion sa pagliwaliwa, bangod mas malawig ang ila paglakbay pakadto-pakari sa trabaho, nagdamo na sa ila ang nagaeskwela kag nagdamo pa gid ang ila hilikuton sa sulod-balay.”—FORBES, UNITED STATES.

▪ Ang mga gas nga nagapainit sang klima halin sa mga pabrika sang mga pungsod nagsaka sing 1.6 porsiento sa ulot sang 2003 kag 2004, kag amo ang “pinakamataas sa kapin sa isa ka dekada.”—REUTERS, OSLO, NORWAY.

Krisis sa Tubig sa China

Apektado gid ang China sang “pagdagta sa tubig kag kakulang sing matinlo nga tubig.” Ang madamo nga siudad may mga pasilidad sa pagproseso agod mangin matinlo liwat ang nagamit na nga tubig, apang kulang sila sing kuarta agod mapaandar ini. “Ang kalabanan nga suba, linaw kag kanal sang pungsod mahigko bangod sang nagamit na nga tubig halin sa mga pabrika kag mga kabalayan subong man sang may pestisidio nga mga tubig halin sa mga uma,” report sang The Wall Street Journal. Dugang pa, “mga 300 milyones ka tawo ang wala sing matinlo nga tubig nga mainom.” Ang kahimtangan “malain gid,” siling sang Journal, kag labi pa ini nga nagalain.

“Mga Saksi ni Jehova Bala Kamo?”

Sang nagligad nga tuig, ang mga turista sa mga baybayon sang Isla sang Elba sa Italya ginpalapitan kag ginsugilanon sang lamharon nga mga Katoliko nga nagbaton sa imbitasyon sang obispo sang diosesis sang Massa Marittima-Piombino. Nagsiling sia nga kon luyag sang mga pamatan-on nga mangin mga Cristiano kag magpabilin nga amo sini, dapat nila ipahayag ang ila pagtuo. Natingala sa sini ang mga bakasyunista. Suno sa pamantalaan nga Il Tempo, ang labing kinaandan nga reaksion nga nabaton sang mga pamatan-on amo, “Mga Saksi ni Jehova bala kamo?”

Musika nga Ginaangot sa Seksuwal nga Buhat

Ang mga tin-edyer nga nagapamati sing mga musika nga may “binastos nga liriko bahin sa sekso” mahimo nga “makighilawas sing mas maaga sangsa mga nagapamati sing iban nga mga kanta,” siling sang isa ka pagtuon nga ginreport sa Associated Press. “Ang mga kanta nga nagalaragway sa mga lalaki subong ‘salamwanan sa sekso’ kag sa mga babayi subong nagakaigo nga talupangdon para sa sekso lamang kag ang mga kanta nga espesipiko nga nagasambit sang seksuwal nga mga buhat mahimo gid nga nagatulod sa pagpakighilawas sing mas maaga sangsa mga kanta nga ang pagpatuhoy sa sekso halangpunon lamang kag ang relasyon mas permanente,” siling sang report. Nagsiling ini nga “dapat usisaon sing maayo sang mga ginikanan, mga edukador kag sang mga tin-edyer mismo ang mga mensahe sang liriko sang mga kanta.”

Mausik nga mga Konsumidor

Sang 2004, ang mga Australiano naghaboy sing 5.3 bilyones dolyares ($4.1 bilyones, U.S.) nga kantidad sang wala makaon nga pagkaon, report sang The Australia Institute, isa ka organisasyon nga nagapanalawsaw. Kapin ini sa 13 ka pilo sangsa ginadonar sang mga Australiano sa iban nga mga pungsod sang 2003. Sa kabilugan, ang kabug-usan nga kantidad nga ginausik sang mga Australiano sa mga butang kag mga serbisyo nga wala gid magamit ukon talagsa lang gingamit nagalab-ot sa kapin sa $10.5 bilyones ($8.1 bilyones, U.S.) kada tuig—sobra pa sa ginagasto sang pungsod sa mga unibersidad kag mga dalan.