Ginahalitan Ka Bala sang Imo Pagpangita sing Kuarta?

ANO ang himuon mo, kon magmanggaranon ka sa ulihi? Magpulupatawhay ka na lang bala kag maglipaylipay? Mauntat ka bala sa pag-obra kag maghinguyang sing kapin nga tion upod sa imo pamilya kag mga abyan? Makuha ka bala sing karera nga naluyagan mo gid? Makatilingala nga madamo nga nagmanggaranon ang indi subong sini. Sa baylo, tubtob buhi sila nga nagapangita sing dugang pa nga kuarta—agod may ibayad sa ila bag-o nga mga kautangan ukon agod magmanggaranon pa gid.

Apang, natalupangdan sang iban nga ining materyalistiko nga dalanon nakahalit sa ila panglawas, sa ila pamilya, kag sa personalidad sang ila mga kabataan. Sa karon, may mga libro, mga artikulo, mga programa sa telebisyon, kag mga video nga nagapaandam batok sa sobra nga pagpatuyang kag ginarekomendar, sa baylo, ang “boluntaryo nga pagpasimple sang kabuhi.” Madamo ang nagasiling nga ang materyalistiko nga pagkabuhi mahimo makahalit sa imo—sa mental, emosyonal, kag pisikal pa gani.

Ang matuod, ang kabalaka tuhoy sa mga katalagman sang materyalismo indi bag-o. Halos 2,000 ka tuig sang una, nagsiling ang Biblia: “Ang mga determinado nga mangin manggaranon nagakahulog sa pagsulay kag sa siod kag sa madamo nga binuang kag makahalalit nga kailigbon, nga nagatugdang sang mga tawo sa kalaglagan kag kapahamakan. Kay ang gugma sa kuarta amo ang gamot sang tanan nga sahi sang makahalalit nga mga butang, kag paagi sa paghingamo sini nga gugma ang iban nagtalang gikan sa pagtuo kag nagbuno sang ila kaugalingon sing madamo nga kasakit.”—1 Timoteo 6:9, 10.

Apang, matuod bala ina? Nahalitan gid bala ang mga tawo nga ang panguna sa ila kabuhi amo ang pagpangita sing kuarta kag pagtipon sing materyal nga mga butang? Ukon natigayon bala nila ang tanan—ang manggad, ang kapagros, kag ang malipayon nga pamilya? Tan-awon naton.