Naluwas Sila sa Makakulugmat nga Natabo sa Mumbai

SUNO SA MANUNULAT SANG MAGMATA! SA INDIA

ANG siudad sang Mumbai, nga ginatawag anay nga Bombay, may kapin sa 18 milyones ka pumuluyo. Adlaw-adlaw, anom pa pito ka milyon sining mga pumuluyo ang nagasakay sa madasig kag madamo nga tren pakadto-pakari sa ila ulubrahan, sa mga eskwelahan kag mga kolehiyo, sa mga balaligyaan, ukon sa mga lugar nga makawiwili pamasyaran. Kon madamo gid sing mga pasahero, ang siam ka bagon sang tren nga para lamang sa 1,710 ka pasahero, nagakarga sing mga 5,000 ka pasahero, amo nga gutok gid ini kaayo. Amo gid sini ang kahimtangan sang Hulyo 11, 2006, sang ginbombahan sang mga terorista ang mga tren sa Mumbai. Wala pa mag-15 minutos, pito ka bomba ang nagsigabong sa nanuhaytuhay nga mga tren sa Western Railway, nga ginbangdan sang pagkapatay sang kapin sa 200 ka tawo kag pagkasamad sang 800 pa ka tawo.

Madamo sa 22 ka kongregasyon sang mga Saksi ni Jehova sa Mumbai kag sa palibot sang siudad ang regular nga mga pasahero sang mga tren kag nakasakay mismo sa mga tren nga ginbombahan. Maayo lang kay wala sing isa sa ila ang napatay, apang may pila nga nasamaran. Manugpauli na si Anita halin sa iya trabaho. Gutok katama ang tren, gani nagtindog na lang sia malapit sa puertahan sang pangprimera-klase nga bagon sang tren agod mas mahapos sia nga makagua. Samtang nagahuganas ang tren, hinali lang nagsigabong sing mabaskog, kag ang bagon sang tren nga iya nahamtangan napuog sang maitom nga aso. Sang magtamwa sia sa puertahan kag magtulok sa iya tuuhan, nakita niya nga ang metal nga dingding sang masunod nga bagon nabilwa kag nagahabilhabil. Nakugmat gid sia sang makita ang mga bangkay kag mga parte sang lawas nga nagtalabog kag nagtupa sa mga riles. Pagkatapos sang tion nga sa iya pamatyag daw kadugay gid—apang ang matuod mga pila lamang ka segundo—nagpundo ang tren. Naglumpat sia kag ang iban pa nga pasahero kag nagdalagan palayo sa tren. Gintawgan ni Anita sa iya cell phone ang iya bana nga si John kag maayo lang kay nakontak niya ini; pagligad sang pila lang ka minuto nangin busy ang mga linya  sang telepono sa bug-os nga siudad tungod madamo gid ang naggamit sang telepono. Nagpabilin sia nga kalmado tubtob nasugilanon niya ang iya bana. Nian nagnguyngoy si Anita. Ginsugid niya sa iya bana ang natabo kag ginpangabay ini nga sugaton sia. Samtang nagahulat sia, nag-ulan, amo nga napanas ang madamo nga ebidensia nga makabulig kuntani sa mga imbestigador.

Si Claudius, isa pa ka Saksi ni Jehova, naghalin sa iya opisina sing mas temprano sa kinaandan. Nagsakay sia sa tren sang 5:18 sang hapon sa Churchgate Station, ang katapusan nga terminal sang Western Railway kag nagsulod sa pangprimera-klase nga bagon sang tren. Samtang nagapangita sing pulungkuan para sa isa ka oras nga biyahe padulong sa estasyunan sang Bhayandar, nakita niya si Joseph nga isa man ka Saksi ni Jehova sa kaiping nga kongregasyon. Madasig nga naglipas ang tion samtang nagaistoryahanay sila. Bangod kapoy si Joseph, natulugan sia. Sanglit tuman ka gutok ang tren, nagtindog na nga daan si Claudius sang ang tren yara pa sa isa ka estasyunan antes sang estasyunan nga panaugan niya agod magpalapit sa puertahan. Samtang nagatindog didto si Claudius, nakabugtaw si Joseph kag nagbalikid sa iya agod magpaalam. Samtang nagapanguyapot sa kalaptan sang pulungkuan, naglihay si Claudius kag nagbalikid agod makighambal sa iya. Mahimo nga bangod sini naluwas ang kabuhi ni Claudius. Sang hinali, nagsigabong sing mabaskog. Ang bagon sang tren nagtay-ug sing mabaskog, nagpuog ang aso, kag nagdulom. Nagtumpilak si Claudius sa salog sa tunga sang duha ka raya sang mga pulungkuan kag, luwas sa nagatagring nga tunog sa iya mga dulunggan, daw nagpalamungol sia. Naguhab ang iya ginatindugan anay. Ang mga pasahero nga nagatindog sa tupad niya nagtalabog sa riles ukon patay na nga nagahinuray-ad sa salog. Nalampuwasan niya ang ikalima sa pito ka bomba nga ginpalupok sa mga tren sa sining makakulugmat gid nga Martes.

Gindala si Claudius sa ospital, nga nabulit sing dugo ang iya panapton. Apang, agsik ini sang dugo sang nagkalamatay nga mga pasahero. Gamay lamang ang iya mga samad—nagisi ang iya eardrum, napaso ang iya isa ka kamot, kag nasirab diutay ang iya buhok. Sa ospital, nagkitaay sila ni Joseph kag sang asawa sini nga si Angela, nga pasahero man sa masunod nga bagon sang tren nga nareserba para sa mga babayi, amo nga wala ini maano. Naglagob ang tuo nga mata ni Joseph kag nagbungol sia. Ginpasalamatan sining tatlo ka Saksi si Jehova bangod naluwas sila. Si Claudius nagsiling nga ang una niya nga napensaran sang naulian sia amo nga, ‘Wala gid sing pulos nga mag-amar ka sing kuarta kag materyal nga mga butang sa sining sistema kon sa hinali madula mo ang imo kabuhi!’ Malipayon gid sia kay ang iya kaangtanan sa iya Dios nga si Jehova, amo ang labing importante nga butang sa iya kabuhi!

Sa sulod sang malip-ot lamang nga tion, ang siudad sang Mumbai ginpakugmat sang daku nga baha, mga kinagubot, kag sining ulihi lang pagpamomba. Apang, ang kapin sa 1,700 ka Saksi didto may maayo kag makugi nga espiritu. Ginapaambit nila sing regular sa ila mga kaingod ang matahom nga paglaum sa bag-ong kalibutan, diin wala na sing kasingki.—Bugna 21:1-4.

[Blurb sa pahina 23]

Naguhab ang iya ginatindugan anay

[Retrato sa pahina 23]

Si Anita

[Retrato sa pahina 23]

Si Claudius

[Retrato sa pahina 23]

Sanday Joseph kag Angela

[Credit Line sang retrato sa pahina 22]

Sebastian D’Souza/AFP/Getty Images