Nabuhi Gid Bala Sila sing Malawig?

Suno sa Biblia, si Adan nagkabuhi sing 930 ka tuig, si Set sing 912, kag si Metusela naman sing 969, nga kulang na lang sing 31 ka tuig para mangin isa ka libo! (Genesis 5:5, 8, 27) Ang mga tinuig bala sadto pareho man kalawig sa karon, ukon mas malip-ot bala ini, nga siling sang iban, katumbas lang sa mga binulan karon?

Ginapakita sang Biblia nga yadto nga mga tinuig pareho man kalawig sa karon. Binagbinaga ini: Kon ang isa ka tuig sadto pareho lang sa isa ka bulan karon, ang masunod nga mga tawo imposible gid nga mangin amay sa tuman ka bata nga edad: Si Kenan, antes sia mag-anom ka tuig, kag si Mahalalel kag Enoc naman, sulusobra lamang sila sa lima ka tuig.—Genesis 5:12, 15, 21.

Dugang pa, ang mga tawo sadto nakahibalo kon ano ang adlaw, bulan, kag tuig. (Genesis 1:14-16; 8:13) Sa katunayan, ang detalyado nga kronolohiya ni Noe nagabulig sa aton nga mahibaluan ang kalawigon sang isa ka bulan. Ang pagpaanggid sang Genesis 7:11, 24 sa Genesis 8:3, 4 nagapakita nga ang lima ka bulan, kutob sa ika-17 nga adlaw sang ikaduha nga bulan tubtob sa ika-17 nga adlaw sang ikapito nga bulan, katumbas sa 150 ka adlaw. Ginapakita sini nga gin-isip ni Noe ang petsa nga nagagamit sang isa ka bulan nga may 30 ka adlaw, kag ang 12 ka bulan sini katumbas sa isa ka tuig.—Genesis 8:5-13. *

Apang paano mabuhi ang mga tawo sing 900 ka tuig ukon kapin pa? Ang Biblia nagasugid sa aton nga gintuga sang Dios ang mga tawo agod magkabuhi sing dayon apang bangod nagpakasala si Adan, ang tanan nga tawo sa karon nangin makasasala man kag nagakapatay. (Genesis 2:17; 3:17-19; Roma 5:12) Ang mga tawo nga nagkabuhi antes sang Anaw mas malapit pa sa kahimpitan kon ipaanggid sa aton karon, kag amo gid ini ang rason kon ngaa malawig ang ila kabuhi. Halimbawa, si Metusela ikapito nga henerasyon halin kay Adan.—Lucas 3:37, 38.

Apang, sa dili madugay, dulaon ni Jehova ang epekto sang sala ni Adan sa tanan nga nagatuo sa ginpatulo nga dugo sang iya Anak, nga si Jesucristo. “Ang bayad nga ginabayad sang sala amo ang kamatayon, apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Huo, magaabot ang tion nga ang 969 ka tuig nga edad ni Metusela mangin tuman kalip-ot na lamang!

[Nota]

[Graph sa pahina 30]

(Para sa aktual nga pormat, tan-awa ang publikasyon)

1000

Metusela

Adan

Set

900

 

 

 

800

 

 

 

700

 

 

 

600

 

 

 

500

 

 

 

400

 

 

 

300

 

 

 

200

 

 

 

100

Kinaandan nga edad sang tawo karon