Ang Pagtamod sang Biblia

Tuman Na Bala nga “Mangin Maayo”?

“GINATINGUHAAN ko gid nga mangin isa ka maayo nga tawo,” siling sang pamatan-on nga si Allison. Kaangay niya, madamo ang nagapati nga amo lamang ini ang ginapangayo sang Dios.

Nagapati naman ang iban nga bisan pa makasala sila sing mabug-at, patawaron sila sang Dios kon maayo sila nga mga tawo. Nagapati sila nga mas handa ang Dios nga magpatawad sangsa magsilot.

Sa pagkamatuod, lainlain ang ginahatag nga kahulugan sang mga tawo sa kon ano ang buot silingon sang “mangin maayo.” Apang, ano ang ginasiling sang Biblia? Ano ang dapat naton himuon agod kahamut-an kita sang Dios? Para sa Dios, ano ang isa ka maayo nga tawo?

Pagtuman sa Panuytoy sang Aton Manunuga

Subong aton Manunuga, may kinamatarong si Jehova nga Dios sa paghatag sa aton sing panuytoy sa moral. (Bugna 4:11) Sa Biblia, naghatag ang Dios sing mga kasuguan kag mga prinsipio agod tuytuyan kita sa aton paggawi kag pagsimba. Ginsilingan sang Dios ang iya katawhan: “Tumana ang ako tingog, kag dapat himuon ninyo ang mga butang suno sa tanan nga ginsugo ko sa inyo; kag kamo mangin akon katawhan kag ako mangin inyo Dios.”—Jeremias 11:4.

Gani, agod “mangin maayo” sa pagtamod sang Dios, dapat nga hibaluon naton ang iya mga talaksan kag tumanon ini. Handurawa nga luyag mo nga mangin abyan ka sang isa ka tawo. Siempre pa, gusto mo mahibaluan kon ano ang luyag niya, kag nian sundon mo ini agod mahamuot sia sa imo. Ginapakita sang Biblia nga, kaangay sang patriarka nga si Abraham, mahimo kita mangin abyan ni Jehova kag kahamut-an niya. (Santiago 2:23) Dugang pa, bangod mas mataas ang talaksan sang Dios sangsa aton, indi kita makapaabot nga ipahisuno niya ang iya mga talaksan sa aton mga talaksan.—Isaias 55:8, 9.

Importansia sang Pagkamatinumanon

Maakig gid bala ang Dios sa aton kon lapason naton ang “indi tanto ka importante” nga mga sugo? Ang iban mahimo mangatarungan nga indi na kinahanglan nga tumanon ang “indi tanto ka importante” nga mga sugo. Apang, wala sing sugo ang Dios nga indi importante. Talupangda nga sa 1 Juan 5:3, ang Biblia wala maghinambit nga may diutay kag dalagku nga mga sugo ang Dios sang nagsiling ini: “Amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” Kon ginahimo naton ang aton bug-os nga masarangan sa pagtuman sa tanan nga mga sugo sang Dios, mapakita naton nga ginahigugma gid naton sia.—Mateo 22:37.

Bangod kita indi himpit, nahibaluan ni Jehova nga makasala gid man kita. Kon tunay nga ginahinulsulan naton ang aton mga sala kag ginatinguhaan gid nga indi na ini pagsuliton, handa sia sa pagpatawad sa aton. (Salmo 103:12-14; Binuhatan 3:19) Apang mahamuot ayhan ang Dios kon hungod naton nga lapason ang pila ka sugo, nagahunahuna nga mahimo naton ini matabunan kon mangin matinumanon kita sa iban nga butang? Ginapakita sang isa ka halimbawa sa Biblia nga wala nahamuot ang Dios sa sini.

Si Hari Saul sang Israel wala nagtuman sang tanan nga sugo sang Dios. Samtang nagapakig-away batok sa mga Amaleknon, ginsugo sia nga laglagon  niya ang tanan pati na ang ila kasapatan. Dapat niya “sila pamatyon.” Bisan pa gintuman niya ang iban nga mga sugo, wala ni Saul gintuman ang sugo nga laglagon “ang pinakaali sang panong.” Ngaa? Bangod luyag nila sang iya mga tinawo nga atihon ini.—1 Samuel 15:2-9.

Sang ginpamangkot ni manalagna Samuel si Saul kon ngaa wala niya gintuman ang sugo sang Dios, nagrason si Saul nga gintuman niya ini. Ginsaysay niya ang maayo nga mga butang nga ginhimo niya kag sang iya mga tinawo, lakip ang paghalad nila sa Dios. Si Samuel namangkot sa iya: “May daku bala nga kahamuot si Jehova sa mga halad-nga-sinunog kag mga halad subong sang sa pagtuman sang tingog ni Jehova? Yari karon! Ang pagtuman maayo pa sangsa halad, kag ang pagpamati sangsa sapay sang mga lalaki nga karnero.” (1 Samuel 15:17-22) Gani indi matabunan sang paghalad ukon paghimo sing mga butang nga maayo ang aton pagsupak sa Dios.

Ang mga Talaksan sang Dios—Pamatuod sang Iya Gugma

Bangod ginahigugma kita ni Jehova, wala niya kita ginpabay-an nga haumhaumon lamang kon paano naton sia pahamut-an. Sa Biblia maathag nga ginhatag niya ang talaksan sa moral, nga daw nagasiling: “Amo ini ang dalan. Lakat sa sini, kamo nga katawhan.” (Isaias 30:21) Kon tumanon naton ang iya panuytoy, indi kita malugaw-an kag maligban sa nagasumpakilay nga mga opinyon sang mga tawo sa kon ano ang husto kag sa kon ano ang sayop. Kag makasalig kita nga ang panuytoy sang Dios ‘nagatudlo sa aton agod makabenepisyo kita’ kag para gid ini pirme sa aton kaayuhan.—Isaias 48:17, 18.

Ano ang katalagman kon kita ang magbuot kon ano ang maayo? Duna sa aton tanan nga mangin makagod. Mahimo malimbungan kita sang aton tagipusuon. (Jeremias 17:9) Kon may mga sugo ang Dios nga daw mabudlay tumanon ukon daw tuman ka istrikto para sa aton, mahimo nga mahapos lang para sa aton nga pakadiutayon ini.

Halimbawa, mahimo hunahunaon sang isa ka dalaga kag isa ka soltero nga wala sing malain sa pagpakighilawas kay pareho man sila nga di-minyo kag personal nila ini nga desisyon. Ayhan nahibaluan nila nga ang ila ginahimo supak sa mga talaksan sang Dios apang mahimo maghinakop sila nga basta “wala sila sing ginaperwisyo,” indi man siguro maakig ang Dios. Mahimo mangibabaw ang ila kailigbon amo nga indi na nila makita ang epekto kag malain nga mga resulta sang ila ginahimo. Ang Biblia nagpaandam: “May dalanon nga matarong sa tawo, apang ang katapusan sini mga dalanon sang kamatayon.”—Hulubaton 14:12.

Ang tanan nga kasuguan ni Jehova nagapabanaag sang iya gugma sa mga tawo kag sang iya handum nga malikawan naton ang pag-antos. Ang paglapas sa mga talaksan sang Dios tuhoy sa sekso ukon sa iban pa nga paggawi wala nagahatag sa mga tawo sing kalipay kag kadalag-an sa kabuhi. Para sa madamo, nagpagamo pa ini sang ila kabuhi. Apang, ang pagtuman sa kasuguan sang Dios nagabulig nga mangin maayo ang aton kabuhi kag malikawan nga mahalitan naton ang aton kaugalingon kag ang iban.—Salmo 19:7-11.

Kon luyag mo gid nga kabigon sang Dios nga isa ka maayo nga tawo, nian himua ang imo bug-os nga masarangan nga tumanon ang iya panuytoy. Maeksperiensiahan mo mismo nga ang ‘mga sugo ni Jehova indi mabug-at.’—1 Juan 5:3.

NAPALIGBAN MO NA BALA?

▪ Ngaa dapat naton tumanon ang panuytoy sang aton Manunuga?—Bugna 4:11.

▪ Dapat bala naton tumanon ang tanan nga sugo sang Dios?—1 Juan 5:3.

▪ Ngaa indi maalamon nga maghimo kita sang aton kaugalingon nga mga talaksan sa moral?—Hulubaton 14:12; Jeremias 17:9.

[Retrato sa pahina 21]

Pareho bala sa iya sang Dios ang imo pagtamod sa kon ano ang husto kag sayop?