Tikang 4

Athaga ang mga Pagsulundan sang Pamilya kag Ipatuman Gilayon

Ngaa importante ini? “Ang matuod,” siling ni Ronald Simons, isa ka sosyologo sa University of Georgia, “mas maayo ang resulta kon maathag sa kabataan ang mga pagsulundan kag ang mga silot kon lapason nila ini. Kon indi subong sini, ang mga kabataan makagod kag masinulub-on​—kag ginapaugtas man nila ang tanan.” Simple lang ang ginasiling sang Pulong sang Dios: “Kon ginahigugma mo ang imo mga anak, tadlungon mo sila.”​—Hulubaton 13:24, New Century Version.

Ngaa mabudlay ini? Agod mapaathag mo sa imo mga anak ang rasonable nga mga pagsulundan nga dapat nila sundon, kinahanglan ang imo tion, panikasog, kag pagpailob. Kag daw kinaugali sa kabataan nga lapason ini nga mga pagsulundan. Husto ang ginkomento nanday Mike kag Sonia, nga may ginapadaku nga duha ka kabataan. “Ang mga kabataan gamay nga mga tawo nga may ila kaugalingon nga mga hunahuna kag mga handum kag napanubli nga huyog sa paghimo sing sala,” siling nila. Palangga gid sini nga mga ginikanan ang ila mga anak. Apang, ginbaton gid man nila nga, “Kon kaisa, ang mga kabataan batinggilan kag makagod.”

Ano ang makabulig? Iluga kon paano ginpakig-angutan ni Jehova ang pungsod sang Israel. Ginpabutyag niya ang iya gugma sa iya katawhan sa isa ka paagi. Maathag nga ginpaalinton niya sa ila ang iya mga sugo nga dapat nila tumanon. (Exodo 20:2-17) Ginpaathag niya sa ila kon ano ang mga silot kon maglalis sila.​—Exodo 22:1-9.

Gani, tilawi man nga listahon ang mga pagsulundan nga sa banta mo dapat tumanon sang kabataan. Ginapanugda sang pila ka ginikanan nga indi pagdamuon ang mga pagsulundan; husto na ang mga lima. Ang malip-ot nga listahan sang maathag nga mga pagsulundan sa sulod sang balay mas mahapos ipatuman kag mas madali tandaan. Upod sa mga pagsulundan, isulat man kon ano ang mangin silot kon lapason ini. Pat-ura nga rasonable ang mga silot kag handa ka nga ipatuman ini. Repasuha sing regular ang mga pagsulundan agod mahibaluan sang tanan, lakip kamo nga mag-asawa, kon ano ang ginapaabot sa inyo.

Kon lapason ang mga pagsulundan, ipadapat dayon ang disiplina, apang dapat nga kalma ka, desidido kag wala nagabag-obag-o. Tandai ini: Indi pagdisiplinaha ang bata kon akig ka. (Hulubaton 29:22) Apang, indi magpabuyanbuyan. Dapat ipadapat gid ang disiplina. Kay basi maghunahuna ang imo bata nga indi gali tuodtuod ang ginsiling mo. Kaanggid ini sa ginasiling sang Biblia: “Bangud nga ang paghukom batok sa malaut nga buhat wala ginahikot sing madali, busa ang tagipusoon sang mga anak sang mga tawo natuhoy sing bug-os sa ila sa paghimo sing malaut.”​—Manugwali 8:11.

Sa ano pa nga paagi magamit mo ang imo awtoridad agod makabenepisyo ang imo mga anak?

[Blurb sa pahina 6]

“Kondi ang inyo pagpamulong mangin-amo ‘Hoo’ ukon ‘Indi.’”​—Mateo 5:37