Tikang 3

Gamita ang Inyo Awtoridad

Ngaa importante ini? Ginapakita sang mga pagtuon nga “kon gamiton sang mahigugmaon nga mga ginikanan ang ila awtoridad, ang ila mga anak maalam sa eskwelahan, mas maayo makig-angot sa mga tawo, may kompiansa sa ila kaugalingon, kag mas malipayon sangsa mga kabataan nga ginapagustuhan lang ukon ginaestriktuhan gid sang ila mga ginikanan,” siling sang magasin nga Parents.

Ngaa mabudlay ini? Tubtob magtin-edyer na sila, magabato ang kabataan sa imo awtoridad. “Madali makasat-um ang mga kabataan kon ang ila mga ginikanan indi desidido kag daw mapasugot na,” sulat ni John Rosemond, awtor sang libro nga Parent Power! “Sa pamangkot nga ‘Sin-o ang nagadumala?’ kon indi ini gani pagtungdan sang mga ginikanan, mabulos dayon ang mga kabataan,” siling niya.

Ano ang makabulig? Indi magkabalaka nga magsunggod ukon maglain ang buot sang inyo mga anak kon gamiton ninyo ang inyo awtoridad sa ila. Ang nagtukod sang pamilya amo si Jehova nga Dios, kag sa sini nga kahimusan ang ginhatagan niya sing kinamatarong sa pagdumala sa pamilya amo ang mga ginikanan, indi ang kabataan. Gani, para sa kabataan, amo ini ang sugo niya: “Tumana ang inyo mga ginikanan.”​—Efeso 3:14, 15; 6:1-4.

Magamit ninyo ang inyo awtoridad nga indi kamo diktador. Paano? Sunda ang halimbawa ni Jehova. Mga kabataan niya kita kag may gahom sia nga piliton kita nga himuon ang iya kabubut-on, apang daw nagapakiluoy pa sia gani nga himuon naton ang maayo. “Kabay kuntani nga magpamati ka sa akon mga sogo! Niyan ang imo paghidait nanginsubong kuntani sang suba,” siling sang iya Pulong. (Isaias 48:18) Luyag ni Jehova nga tumanon naton sia, indi bangod nahadlok kita sa iya, kundi bangod ginahigugma naton sia. (1 Juan 5:3) Rasonable ang ginapahimo niya sa aton kag nahibaluan niya nga makabenepisyo kita kon sundon naton ang iya mga talaksan sang kon ano ang maayo kag malain.​—Salmo 19:7-11.

Paano kamo mangin kompiansa nga balanse ang inyo paggamit sang inyo awtoridad subong ginikanan? Una, dapat kumbinsido kamo nga amo ini ang ginapatuman sa inyo sang Dios. Ikaduha, dapat kumbinsido man kamo nga ang pagsunod sa mga talaksan sang Dios amo ang labing maayo para sa inyo kag sa inyo mga anak.​—Roma 12:2.

Ano ang dapat gid ninyo himuon sa paggamit sang inyo awtoridad?

[Blurb sa pahina 5]

“Disiplinaha ang imo mga anak, kag . . . pahalipayon nila ang imo tagipusuon.”​—Hulubaton 29:17, New Revised Standard Version