Isa ka Tingog sang “Walay Kamatayon nga Siudad”

SUNO SA MANUNULAT SANG MAGMATA! SA ITALYA

Ang hitsura kag tunog sang madamo nga fountain sang Roma nagpahulag sa Italyano nga manugkomposo nga si Ottorino Respighi nga magkomposo sing ambahanon nga ginatig-uluhan “Ang mga Fountain Sang Roma.” Duawon naton ang isa sa labing matahom sini nga mga fountain, ang Trevi Fountain.

Nag-agi kami sa makitid nga dalan pakadto sa fountain, kag pagliko namon, nahayanghag gid kami sa amon nakita. Amo ini ang isa ka daku nga fountain nga 20 metros ang kalaparon kag 26 metros ang kataason nga nagabarakang sa diutay nga plasa. Daw ano katahom nga fountain sa gamay lamang nga duog!

Si Papa Clemente XII ang nagpatukod sang Trevi Fountain kag ang nagdesinyo sini amo ang Italyano nga arkitekto nga si Niccolò Salvi. Ginsugdan ini nga ipatindog sang 1732 kag natapos sang 1762. Ang tubig sini nagahalin sa Aqua Virgo, isa ka daku nga kanal nga may kalabaon nga mga 13 kilometros, nga gintukod mga 2,000 ka tuig na ang nagligad.

Ang desinyo sini nga fountain, nga nahamtang sa atubangan sang isa ka palasyo, daw yara sa dagat. Ang himuhimo nga persona nga si Oceanus (ukon suno sa iban, si Neptune) bugalon nga nagatindog sa daw pakinhason niya nga karwahe, kag ginapunggan niya ang baha sa ubos niya. Samtang nagabusawak ang tubig sa iban pa nga mga pigura pakadto sa kabatuhan sa ubos, ang tunog sini daw balod nga nagadapya sa hunasan. Ang linaw nagabarakang sa daku nga bahin sang plasa, amo nga kon lantawon daw bahin sang fountain ang plasa.

Kada adlaw, ginatos ka turista ang nagakadto sa sining diutay nga plasa kag nagahaboy sang mga sensilyo sa fountain, nga ginakabig nga isa sa labing bantog nga duog para sa mga turista sa Roma. Kada semana, ginapahubsan ang fountain. Ang kuarta nga ginahaboy diri sang mga turista, nga mga 11,000 ka dolyar kada semana, ginahatag sa relihioso nga organisasyon nga nagabulig sa mga imol.

Kon ang pag-amba sang mga fountain, subong sang pagpati ni Respighi, amo ang tingog sang siudad, nian ang Trevi Fountain amo ang soloista, kay pinasahi gid ini sa madamo nga fountain nga ginadayaw sang mga dumuluaw sa Roma, ang Walay Kamatayon kuno nga Siudad.