Tikang 6

Sapaka ang Ginabatyag sang Inyo Anak

Ngaa importante ini? Kinahanglan gid sang kabataan ang labing importante nga mga tawo sa ila kabuhi, nga amo ang ila mga ginikanan, agod mahibaluan nila kon ano ang ila ginabatyag. Kon pirme lang pamatukan sang mga ginikanan ang ginasiling sang ila mga anak, mahimo gid nga indi na sila magtampad kag mahimo nga daw indi na sila makahibalo magpabutyag sang ila kaugalingon.

Ngaa mabudlay ini? May huyog ang kabataan nga pasobrahan ang ila ginahunahuna kag ginabatyag. Matuod, ginakabalak-an sang mga ginikanan ang ginasiling sang pila ka kabataan. Halimbawa, ang isa ka napaslawan nga bata mahimo magsiling, “Naugot gid ako sa akon kabuhi.” * Ang duna nga isabat sang isa ka ginikanan mahimo nga, “Indi ka magsiling sina!” Mahimo nagakabalaka ang mga ginikanan nga kon batunon nila ang negatibo nga ginabatyag ukon ginahunahuna sang ila anak, daw subong nga ginakunsinti nila ina.

Ano ang makabulig? Iaplikar ang ginalaygay sang Biblia nga “magmadagmit sa pagpamati, magmahinay sa paghambal, magmakuli sa pagpangakig.” (Santiago 1:19) Tandai nga gintalupangod ni Jehova nga Dios ang negatibo nga ginbatyag sang madamo sa iya matutom nga mga alagad kay ginpasulat niya ini sa Biblia. (Genesis 27:46; Salmo 73:12, 13) Halimbawa, bangod sang mabudlay gid nga mga pagtilaw, ginhandum ni Job nga kuntani mapatay na lang sia.​—Job 14:13.

Maathag nga dapat tadlungon ang iban nga ginhunahuna kag ginbatyag ni Job. Apang sa baylo nga pamatukan ang ginabatyag ni Job ukon punggan sia sa paghambal, mapailubon nga ginpabay-an sia ni Jehova nga ipautwas ang iya ginabatyag. Pagkatapos, gintadlong sia ni Jehova sa maayo nga paagi. Amo sini ang ginsiling sang isa ka Cristiano nga amay, “Bangod ginatugutan ako ni Jehova nga ipautwas ko sa iya ang akon ginabatyag paagi sa pangamuyo, sa banta ko dapat lamang nga tugutan ko man ang akon mga anak nga ipautwas nila sa akon ang ila positibo kag negatibo nga ginabatyag.”

Sa masunod nga tion nga masulay ka sa pagsiling sa imo anak, “Indi ako magpati nga amo sina ang ginabatyag mo” ukon “Indi ako magpati nga amo sina ang ginahunahuna mo,” dumduma ang bantog nga prinsipio ni Jesus: “Ang buut ninyo nga himoon sa inyo sang mga tawo, himoa man ninyo sa ila ang subong.” (Lucas 6:31) Halimbawa, ano abi kon gin-akigan ka sa inyo trabaho ukon naglalain ka, bangod nagsala ka. Nagtu-ad ka sa imo suod nga abyan nga bangod sini indi ka na makaobra sing maayo. Ano ang luyag mo nga himuon sang imo abyan? Sugiran ka bala nga indi matuod ang ginabatyag mo kag pagkatapos singganan ka nga ikaw gid ang salaon sa natabo? Ukon mas luyag mo bala nga magsiling ang imo abyan: “Mabudlay gid man ang natabo sa imo”?

Mahimo gid nga mas madali batunon sang bata man ukon tigulang ang laygay, kon sa banta niya ang isa nga nagalaygay nakahangop sa iya kag sa iya man problema. “Ang tagipusoon sang maalam nagatudlo sang iya baba, kag nagadugang sing tinon-an sa iya mga bibig,” siling sang Pulong sang Dios.​—Hulubaton 16:23.

Paano mo mapat-od nga ginapamatian gid ang imo laygay?

[Nota]

[Blurb sa pahina 8]

“Ang nagasabat sa wala pa sia makabati, kabuangan ini kag kahuluy-an sa iya.”​—Hulubaton 18:13