Gikan sa Amon mga Bumalasa

Kon ang Balatian Madula Na! (Enero 2007) Sang nagsiling kamo nga ang iban nga tawo “nagausik sing kuarta kag tion sa mga pagpabulong nga indi epektibo ukon makahalalit pa gani,” daw ginatumod ninyo ang alternatibo nga sahi sang pagpabulong kay ang artikulo nagpautwas sing pangduhaduha kon bala epektibo gid man kag masaligan ang pila ka alternatibo nga pagbulong. Buot bala ipahangop sini nga ginarekomendar sang Magmata! ang kombensional nga pagbulong subong mas masaligan kag mas epektibo? Suno sa U.S. General Accounting Office madamo sing pamatuod nga ang kombensional nga pagbulong indi masaligan kag indi epektibo.

G. C., Estados Unidos

Sabat sang “Magmata!”: May mga sahi sang pagbulong nga ginakabig anay sang mga tawo nga masaligan kag epektibo, apang sang ulihi, napamatud-an nga makahalalit ini. Nangin matuod ini sa kombensional (moderno nga medisina) kag sa alternatibo nga pagbulong. Bisan diin man sa sini ang imo pilion, maalamon gid nga hibaluon ang maayo kag malain nga epekto sini, kag pat-uron nga wala ini nagasumpakil sa mga prinsipio sa Biblia. Isa ini ka personal nga desisyon. Subong sang ginasiling namon halin pa sang una, Ang “Magmata!” wala nagapanugyan sing bisan ano nga sahi sang pagpabulong. Kag ginalikawan sang mga Cristiano nga hukman ukon pakalainon ang sahi sang pagpabulong nga ginpili sang iban. Kag subong ginapadaku sini nga artikulo, ang makadula sang tanan nga balatian sang tawo indi ang alternatibo ukon ang moderno nga medisina, kundi ang Ginharian sang Dios lamang.—Bugna 21:3, 4.

‘Magataklad Ako Subong sang Lalaki nga Usa’ (Agosto 2006) Ang pagpailob kag pagkamapainubuson ni Francesco Abbatemarco nagpahunahuna gid sa akon. Agod maalagad si Jehova, wala lamang niya ginbatas ang pisikal nga kasablagan kundi ginpakigbatuan man niya ang kapung-aw. Ginapahanumdom ako sang iya eksperiensia nga bisan ano pa ang aton kahimtangan mahimo naton alagaron si Jehova suno sa aton masarangan. Napalig-on man ako nga makita kon paano ang pag-aplikar sang Pulong sang Dios nagbulig sa iya nga maghimo sing daku nga mga pagbag-o sa iya kabuhi.

N. G., Cambodia

Madamo gid sing balagbag nga dapat landason si Francesco. Apang sang nasapwan niya ang kamatuoran, handa sia kag nasangkapan sa pag-atubang sini. Dalayawon gid ang iya determinasyon! Kaangay ko, kabay nga mapahulag man ang iban sa iya eksperiensia.

M. D., Bagatnan nga Aprika

Nanamian gid ako sang eksperiensia ni Francesco Abbatemarco! Handum ko gid nga masugid sa iya sing personal kon paano niya ako napalig-on nga alagaron si Jehova sing kapin pa.

J. B., Estados Unidos

Madamo gid nga salamat Francesco sa imo kakugi kag pagbatas. Napat-od ko nga sa bag-o nga sistema magataklad ka kaangay sang lalaki nga usa. Abi mo, madamo ka sing mga kauturan nga nagapalangga gid sa imo kag nagapangamuyo para sa imo.

S. G., Rusya