Ang Pagtamod sang Biblia

Malain Bala ang mga Kontraseptibo?

MALAIN bala nga maggamit ang mag-asawa sing kontraseptibo? Ano sa banta mo? Ang imo sabat mahimo depende sa kon ano ang ginatudlo sang inyo simbahan. Ginatudlo sang Iglesia Katolika nga ang bisan ano nga paagi agod punggan ang pagbusong “malaut.” Ginapasanyog man nila ang ideya nga sa tagsa ka tion nga maghulid ang mag-asawa, posible nga magbusong ang babayi. Gani, para sa Iglesia Katolika, ang paggamit sing kontraseptibo “malain.”

Madamo nga tawo ang wala nagaugyon sa sini nga panudlo. Ang isa ka artikulo tuhoy sa sini nga topiko sa pamantalaan nga Pittsburgh Post-Gazette nagsiling nga “kapin sa 75 porsiento sang mga Katoliko sa Estados Unidos ang nagsiling nga indi dapat idumili sang simbahan ang paggamit sing artipisyal nga kontraseptibo. . . . Kag adlaw-adlaw, minilyon ang nagabalewala sini nga pagdumili.” Ang isa sa ila amo si Linda nga may tatlo ka bata. Gin-ako niya nga nagagamit sia sing kontraseptibo, apang nagsiling sia: “Matinlo ang akon konsiensia kag para sa akon wala ako nakasala.”

Ano ang ginasiling sang Pulong sang Dios tuhoy sini?

Ang Kabuhi Hamili

Ang kabuhi sang isa ka bata hamili sa Dios bisan ginapanamkon pa lang ini. Si Hari David sang Israel gin-inspirar sa pagsulat: “Ginputus mo ako sa tiyan sang akon iloy. . . . Ang imo mga mata nakakita sang akon wala mahuman nga kinaugali; sa imo tolon-an nasulat na sila tanan.” (Salmo 139:13, 16) Bisan ginapanamkon pa lang ang isa ka lapsag may kabuhi na ini, kag ginapakita sang Mosaikong Kasuguan nga manabat  ang isa ka tawo kon mahalitan niya ang wala pa mabun-ag nga lapsag. Amo nga ang Exodo 21:22, 23 nagsiling nga kon bangod sa pag-away sang duha ka tawo, aksidente nga mapatay ang nagabusong nga babayi ukon ang bata sa iya tiyan, dapat ini husayon sa atubangan sang tinangdo nga mga hukom. Dapat nila timbangtimbangon ang natabo, kon bala hungod gid ukon indi, apang mahimo nga ang silot “kabuhi sa kabuhi.”

Ini nga mga prinsipio sarang man maaplikar sa paggamit sing kontraseptibo kay ang iban sini nagaresulta sa aborsion. Ini nga mga sahi sang kontraseptibo wala nagahisanto sa mga prinsipio sa Biblia nga dapat tahuron ang kabuhi. Apang, ang kalabanan nga mga kontraseptibo wala man nagaresulta sa aborsion. Kon amo, puede bala maggamit sini?

Ginsugo sang Dios sanday Adan kag Eva kag ang pamilya ni Noe: “Magmabungahon kag magbuad, kag magtugub sang duta.” Apang wala na ginhatag ini nga sugo sa mga Cristiano. (Genesis 1:28; 9:1) Gani, yara na sa mag-asawa kon luyag nila nga magbata ukon indi, ukon kon pila kag kon san-o nila luyag makaangkon sing bata. Isa pa, wala man ginadumili sang Kasulatan ang paggamit sing kontraseptibo. Busa, suno sa pagtamod sang Biblia, yara sa mag-asawa kon bala luyag nila maggamit sing kontraseptibo nga wala nagaresulta sa aborsion. Kon amo ngaa ginapakamalaut sang Iglesia Katolika ang paggamit sing kontraseptibo?

Kaalam sang Tawo Kontra Kaalam sang Dios

Suno sa New Catholic Encyclopedia, sang ikaduha nga siglo C.E. ginbaton sang nagapangangkon nga mga Cristiano ang pilosopiya nga ang lamang nga katuyuan sang paghulid amo ang pagpamata. Gani, ini nga pangatarungan napasad sa pilosopiya ukon kaalam sang tawo kag indi sa kaalam sang Dios nga nasulat sa Biblia. Ini nga pilosopiya nagpadayon sing ginatos ka tuig kag ginpasangkad pa sang lainlain nga Katolikong teologo. * Nagdul-ong ini sa pagpati nga ang paghirupay para mapahalipay lamang ang kaugalingon nga wala sing tuyo nga makabata, malain kag isa ka pagpakasala. Apang indi amo sini ang ginatudlo sang Biblia.

Sing mabinalaybayon, ginlaragway sang tulun-an sang Hulubaton sa Biblia ang kalipay nga maangkon sang bana kag asawa gikan sa nagakaigo nga paghirupay: “Inum sing mga tubig sa imo suluptan, sa nagailig nga mga tubig gikan sa imo kaugalingon nga bobon. . . . Pagpakamaayohon ang imo tuburan, kag magkalipay sa asawa sang imo pagkapamatan-on, subong nga mahigugmaon nga usa nga babayi, maayoayo nga usa nga babayi. Ang iya mga dughan magbusug sa imo sa tanan nga tion, kag magpabihag ka sa gihapon sang iya gugma.”—Hulubaton 5:15, 18, 19.

Ang paghirupay isa ka dulot sang Dios para sa bana kag asawa. Apang, ini nga dulot wala ginhatag sang Dios para lamang sa pagpamata. Kundi isa man ini ka paagi nga mapabatyag sang mag-asawa ang ila gugma sa isa kag isa. Gani kon luyag sang mag-asawa nga maggamit sing kontraseptibo agod malikawan ang pagbusong, kinamatarong nila ina kag indi sila dapat paghukman.—Roma 14:4, 10-13.

[Nota]

NAPALIGBAN MO NA BALA?

▪ May butang bala nga malain sa paghirupay sang bana kag asawa?—Hulubaton 5:15, 18, 19.

▪ Ano ang dapat binagbinagon sang mga Cristiano kon nagagamit sila sing kontraseptibo?—Exodo 21:22, 23.

▪ Ano dapat ang aton pagtamod sa mga mag-asawa nga nagagamit sing kontraseptibo?—Roma 14:4, 10-13.

[Blurb sa pahina 11]

Ginsugo sang Dios sanday Adan kag Eva kag ang pamilya ni Noe: “Magmabungahon kag magbuad, kag magtugub sang duta.” Apang ini nga sugo wala na ginhatag sa mga Cristiano