Malapit na Madula ang mga Kalamidad
Malapit Na Madula ang mga Kalamidad
MGA linog, mga inaway, mga tiggulutom, kag mga balatian—pila ini sang gintagna ni Jesus nga mangin tanda sang “katapusan sang panuigon” nga amo karon ang aton tion. (Mateo 24:3, 7, 8; Lucas 21:7, 10, 11) Sa pagkamatuod, indi ini pagbuot sang Dios. Indi si Jesus ukon ang iya Amay nga si Jehova nga Dios ang salaon sa sini.
Apang ang butang nga ginapatimaan sini nga mga kahimtangan amo ang pagbuot sang Dios. Amo ini ang pagkari sang Ginharian sang Dios—isa ka langitnon nga panguluhan nga pagagamhan ni Jesucristo—kag ang pagkalaglag sang tanan nga nagasikway sa pagkasoberano ni Jehova. (Daniel 2:44; 7:13, 14) Pagkatapos sini, mangin isa ka malinong nga duog ang duta diin wala na sing kalamidad nga kahadlukan. Matuman gid ang saad sang Dios: “Ang akon katawohan magapabilin sa puluy-an nga makidaiton, sa mga puluy-an nga malig-on, kag sa mga palahuwayan nga malinong.”—Isaias 32:18.
Mamati sa Dios kag Mabuhi Tubtob San-o!
Subong sang napaathag na sa nagligad nga artikulo sini nga serye, ang pagsunod sa mga paandam makaluwas sing kabuhi. Ini nga prinsipio labi pa nga maaplikar sa mga paandam sang Dios nga nasulat sa Biblia. Nagasaad ang Dios nga “ang nagapamati sa akon magapuyo sing malig-on kag magamalinong, sa wala sing kahadluk sa malaut.”—Hulubaton 1:33.
Ginatinguhaan gid sang mga Saksi ni Jehova nga mamati sa Dios paagi sa regular nga pagbasa sang iya Pulong kag pag-aplikar sang mga panudlo sini. Ginaagda nila ikaw nga amo man sini ang himuon. Huo, ang tanan nga matinumanon nga nagapamati kay Jehova indi dapat mahadlok sa palaabuton kag sa kalamidad nga mahanabo sa mga malauton. Sa baylo, mapaabot nila nga matigayon ang kabuhi nga walay katapusan sa Paraiso nga duta, diin “magakalipay sila sa kabuganaan sang paghidait.”—Salmo 37:10, 11.
[Kahon sa pahina 8]
LUGPAY PARA SA MGA NAGALALAW
Napatay bala ang imo mga hinigugma, ayhan bangod sang kalamidad ukon sang iban pa nga trahedya? Sang nagligad nga halos 2,000 ka tuig na, ang suod nga abyan ni Jesus nga si Lazaro ginhugakom sang hilaw nga kamatayon. Sang mabalitaan ini ni Jesus, nagkadto sia sa minuro nga ginapuy-an ni Lazaro, sa Betania, kag ginbanhaw niya si Lazaro.—Juan 11:1-44.
Ginhimo ni Jesus ini nga milagro indi lamang bangod ginahigugma niya si Lazaro kag ang iya pamilya kundi agod maghatag man sing pasalig sa iya saad nga banhawon niya ang “tanan nga yara sa mga lulubngan” sa tion sang iya paggahom sa Ginharian. (Juan 5:28, 29) Huo, sa nagapakari nga Paraiso, dulaon ni Jesus ang tanan nga halit nga nagsugod sang matabo ang pagrebelde sa Eden. *—1 Juan 3:8.
[Nota]
^ par. 10 Kon tuhoy sa laygay sang Biblia kon paano malandas ang kasubo nga mabatyagan bangod sa pagkapatay sang isa ka hinigugma kag sa mas detalyado nga paathag tuhoy sa ginasaad nga pagkabanhaw, tan-awa palihug ang brosyur nga Kon ang Isa nga Ginahigugma Mo Mapatay, nga ginabalhag sang mga Saksi ni Jehova.
[Kahon/Retrato sa pahina 9]
GINBAG-O SANG LINOG ANG DIREKSION SANG AKON KABUHI
Sang 1971, isa ako ka hoben pa nga iloy nga nagahandum nga mangin umalamba. Natawo ako sa Winnipeg, Manitoba, sa Canada apang sang 1957 nagsaylo ako malapit sa Hollywood, sa California, E.U.A., agod padayunon ang akon daku nga gugma sa musika.
Si Nanay nga nagapuyo sa Canada kag isa sa mga Saksi ni Jehova nagaduaw sa akon kada tig-ilinit sa sulod sang siam ka tuig. Gingamit niya ini nga mga higayon agod hambalon ako tuhoy sa Biblia, kay kumbinsido sia nga ang Biblia nagahatag sing labing maayo nga laygay tuhoy sa pamilya kag kon paano mangin malipayon. Palangga ko si Nanay gani matinahuron nga nagapamati ako sa iya. Apang, paglakat niya, ginahaboy ko ang mga literatura nga ginahatag niya sa akon, kay kompiansa ako nga husto ang direksion sang akon kabuhi.
Nian, sang kaagahon sang Martes sang Pebrero 1971, natapungawan ako bangod sang mabaskog gid nga linog. Makabulungol ang gahod kag sobra gid ang pag-uyog. Kinulbaan gid ako kag dalidali nga ginkadtuan ko ang akon bata nga lalaki nga yara sa kona. Maayo na lang nga wala sia mahaliti. Sang mag-untat ang pag-uyog, nagalinapta sa salog ang buka nga mga kristal kag ang mga unod sang platera. Ang tubig sa swimming pool nag-alwak sa palibot. Bisan pa wala mahaliti ang akon pamilya, indi na ako makatulog.
Nasambit anay sa akon ni Nanay ang tuhoy sa “katapusan nga mga adlaw,” nga ang isa ka bahin sini amo ang “mabaskug nga mga linog.” (2 Timoteo 3:1; Lucas 21:7-11) Sadto nga tig-ilinit, ginduaw niya ako liwat nga amo ang kinaandan nga ginahimo niya kada tuig apang wala sia sing dala nga mga literatura tuhoy sa Biblia. Bangod siam ka tuig na nga ginapanaksihan niya ako nga wala sing resulta, naghinakop sia nga indi ako interesado. Apang, sayop sia! Pag-abot gid niya, ginpaarakan ko sia sing mga pamangkot. Daw hinali nga naglas-ay ang akon handum nga mangin bantog nga umalamba.
Sadto gid nga semana, nag-upod ako kay Nanay sa pagtambong sa Cristiano nga mga miting sa Kingdom Hall sa amon lugar, kag pagkatapos sadto, talagsa lang ako nagapalya sa pagtambong. Nangita si Nanay sing utod nga maghiwat sing pagtuon sa Biblia upod sa akon. Ginbawtismuhan ako sang 1973, kag karon, nagahinguyang ako sing promedyo nga 70 ka oras kada bulan sa pagbantala sing maayong balita sang Ginharian sang Dios sa iban. (Mateo 24:14) Huo, sa baylo nga gub-on sang linog ang akon pagtuo sa Dios, nakabulig ini agod makatukod ako sing pagtuo sa Dios.—Panugiron ni Colleen Esparza.
