Nagabakho kag Nadula nga Pagtuo sa Dios

“NAGALINAPTA ang mga bangkay bisan diin, kag indi namon mahibal-an kon diin anay ang ginatindugan sang amon balay,” siling sang isa ka taga-Sri Lanka nga tawo pagkatapos mahapay sang tsunami ang ila minuro sang Disiembre 2004. Sa isa ka artikulo tuhoy sa kalamidad, ang isa ka editor sang mga artikulo sa pamantalaan tuhoy sa relihion nagsiling nga kon kaisa “nagapangamuyo sia nga nagaugtom.”

Ginatamod sang madamo ang mga kalamidad subong silot sang Dios. Ginlaragway sang isa ka kolumnista ang makahalapay nga bagyo subong “inumol sang Dios.” Sa Estados Unidos, ginlaragway sang pila ka relihioso nga mga lider ang mga kalamidad kaangay sang Bagyo Katrina subong “kaakig sang Dios” sa “makasasala nga mga siudad.” Sa Sri Lanka, mga Cristiano ang ginbasol sang militante nga mga Budhista sa natabo nga tsunami, amo nga labi pa nga nag-init ang ila pagbangigay. Suno naman sa tulugyanan sang isa ka templo sang mga Hindu, naakig ang dios nga si Shiva bangod malain ang pagkabuhi sang mga tawo. Ang isa ka Budhista nga relihioso nga lider sa Estados Unidos nagsiling tuhoy sa mga kalamidad: “Wala kita makahibalo kon ngaa nagakatabo ining mga butang. Wala gani kita makahibalo kon ngaa yari kita diri sa duta.”

Kon makakita ka sing mga laragway sang guba nga mga balay, mga bangkay, kag nagabakho nga mga tawo, nagapamangkot ka bala kon kaisa, ‘Ngaa ginatugutan sang Dios nga mag-antos ang madamo?’ Ukon nagahunahuna ka bala, ‘Pat-od nga may makatarunganon nga mga rason ang Dios kon ngaa ginatugutan niya ining mga butang apang wala lang niya ginsugid ini nga mga rason’? Ginabinagbinag sang masunod nga mga artikulo ini nga mga pamangkot. Ginapaathag man sini ang pila ka praktikal nga mga tikang nga sarang mahimo sang mga tawo agod mabuhinan ang posibilidad nga mahalitan kag mapatay pananglit may manug-abot nga kalamidad ukon kon matabo ini.

[Retrato sa pahina 3]

Madamo nga relihioso nga mga lider ang wala makahibalo kon ngaa ginatugutan sang Dios ang mga kalamidad