Ang Pamatuod sang Wala Nagalubad nga Gugma sang Dios

ANG pito ka kalatingalahan sang dumaan nga kalibutan gintawag nga kalatingalahan bangod gindayaw gid ini sang mga tawo. Apang, magluwas sa piramide, ini nga mga tinukod wala na sa karon. Sa pihak nga bahin, ang Biblia, bisan pa ginsulat lamang sang mga mapainubuson nga mga tawo sa madali mapierde nga mga materyales, yara gihapon kag sibu nga ginpaalinton tubtob sa karon. Gani, masaligan gid naton ining pinasahi nga libro.—Isaias 40:8; 2 Timoteo 3:16, 17.

Bangod mga tawo lamang ang gingamit ni Jehova nga Dios sa pagsulat sang iya mensahe, ginpat-od niya nga indi ini maapektuhan sang ila di-himpit nga panghunahuna. Dugang pa, bangod simple lamang ang lenguahe nga ila gingamit sa Biblia, mabasa ini kag mahangpan sang madamo bisan pa wala sila sing mataas nga tinun-an. (Binuhatan 4:13) Amo gid sina ang paabuton mo gikan sa Manunuga kag sa mga manunulat nga gingamit niya. Dugang pa, ang pagkalapnag sang Biblia nagapamatuod sang gugma sang Dios sa katawhan, bisan diin man sila nagapuyo ukon ano man ang ila lenguahe. (1 Juan 4:19) Sa pagkamatuod, ang pagkalapnag sang Biblia wala nagapanubo, kundi nagapataas pa gani sang balor sini!

Indi lamang tuhoy sa gugma sang Dios ang ginaunod sang Biblia. Subong ginpakita sa nauna nga mga artikulo, ginapaathag sang Pulong sang Dios kon diin kita naghalin, kon ngaa malip-ot lang kag magamo gid ang kabuhi, kag kon paano magahatag ang Dios sing solusyon paagi sa iya Ginharian. Nabinagbinag man naton ang pila sa labing epektibo nga laygay sang Biblia kon paano makatigayon sing makalilipay kag makaalayaw nga kabuhi bisan sa karon. (Salmo 19:7-11; Isaias 48:17, 18) Labaw sa tanan, natun-an naton kon paano tinluan sang aton Manunuga ang iya ngalan nga ginmusingan sang pagbinutig ni Satanas.—Mateo 6:9.

Ano pa bala nga libro ang tama ka bilidhon, mapuslanon, praktikal, kag puno sang paglaum para sa mga nasit-an nga mga katawhan? Huo, indi subong sang pito ka kalatingalahan sang dumaan nga kalibutan nga kalabanan sini gintukod sa paghimaya sa butig nga mga dios ukon gumalahom nga mga tawo, ang Biblia isa gid ka pamatuod sang wala nagalubad nga gugma sang Dios sa iya katawhan.

Luyag mo bala pamatud-an ini sa imo kaugalingon? Sa karon, nagahiwat ang mga Saksi ni Jehova sing libre nga pagtuon sa Biblia sa kapin sa anom ka milyon ka tawo sa bug-os nga kalibutan. Ginakabig nila nga isa ka pribilehiyo nga buligan ang sinsero nga mga tawo agod mahangpan man nila kon daw ano ka masaligan ang inspirado nga Pulong sang Dios, ang Biblia.—1 Tesalonica 2:13.