Mga Rason Kon Ngaa Masaligan ang Biblia
5. Natuman ang mga Tagna
Hunahunaa ang isa ka manugbalita nga kilala na nga husto pirme ang iya ginapaalinton tuhoy sa paniempo. Kon magsiling sia nga maulan, madala ka bala sing payong?
NAGAUNOD ang Biblia sing madamo nga tagna. * Ginapamatud-an sang maragtas nga ang mga tagna sa Biblia maathag kag nagakatuman pirme.
Pinasahi nga mga bahin.
Ang mga tagna sa Biblia masami nga espesipiko kag natuman tubtob sa pinakagamay nga mga detalye. Masami nga talalupangdon gid ang ginatagna sini kag kabaliskaran sa ginapaabot sang mga tawo nga nagakabuhi sa panahon nga ginasulat ina nga tagna.
Isa ka talalupangdon gid nga halimbawa.
Ang dumaan nga Babilonia nga may maayo nga lokasyon sa Suba Eufrates gintawag nga “sentro sang politika, relihion, kag kultura sang dumaan nga Sidlangan.” Sang mga 732 B.C.E., gintagna ni manalagna Isaias nga mapukan ang Babilonia. Naghatag si Isaias sing espesipiko nga mga impormasyon: Ang lider nga magabihag amo si “Ciro,” ang nagaamlig nga suba sang Eufrates “pamalahon,” kag ang mga gawang sang siudad “indi pagtakpan.” (Isaias 44:27–45:3) Pagligad sang mga 200 ka tuig, sang Oktubre 5, 539 B.C.E., natuman ang tanan nga detalye sang tagna. Ginpamatud-an sang Griego nga istoryador nga si Herodotus (ikalima nga siglo B.C.E.) kon paano napukan ang Babilonia. *
Isa ka maisugon nga detalye.
May gintagna pa si Isaias nga makapakibot gid tuhoy sa Babilonia: “Indi na ini pagtawohan.” (Isaias 13:19, 20) Maisugon gid matuod ang pagtagna nga mahapay sing dayon ang isa ka mabakod nga siudad nga nahamtang sa maayo gid nga lokasyon. Normal nga paabuton mo nga matukod liwat ini nga siudad kon maguba ini. Bisan nagluntad pa ang Babilonia sa pila ka tion sa tapos ini mabihag, nagmatuod sang ulihi ang gintagna ni Isaias. Ang lokasyon karon sang dumaan nga Babilonia “matapan, mainit, bakante kag yab-ukon,” report sang magasin nga Smithsonian.
Makahalawhaw binagbinagon kon daw ano kabug-at ang gintagna ni Isaias. Mapaanggid ang iya gintagna sa pagsiling nga sa amo gid nga paagi ang isa ka siudad karon, subong sang New York ukon London, pagalaglagon pagligad sang 200 ka tuig halin karon kag dayon masiling ka nga indi na gid ini pagpuy-an liwat. Sa pagkamatuod, ang talalupangdon gid amo ang katunayan nga nagmatuod ang gintagna ni Isaias! *
Sibu nga gintagna sang Biblia nga ang gamhanan nga Babilonia bihagon sang lider nga si Ciro
Sa sini nga mga serye sang mga artikulo, nabinagbinag naton ang pila ka ebidensia nga nagkumbinsi sa minilyon ka tawo nga masaligan ang Biblia. Gani, ginasaligan nila ini sa pagtuytoy sang ila mga tikang. Tun-i ang Biblia agod mahibaluan mo man kon bala masaligan mo ini.
^ par. 4 Ang mga dahumdahom bahin sa paniempo, mga posibilidad lamang. Apang, ang mga tagna sa Biblia naghalin sa Dios, nga sarang makamaniobra sang mga butang kon luyag niya.
^ par. 6 Para sa dugang pa nga mga detalye tuhoy sa katumanan sang tagna ni Isaias, tan-awa ang pahina 27-29 sang brosyur nga Isa ka Libro Para sa Tanan nga Tawo, nga ginabalhag sang mga Saksi ni Jehova.
^ par. 8 Para sa dugang pa nga mga halimbawa tuhoy sa mga tagna sa Biblia kag maragtason nga mga katunayan nga nagapamatuod sa katumanan sini nga mga tagna, tan-awa ang pahina 117-33 sang libro nga The Bible—God’s Word or Man’s? nga ginabalhag sang mga Saksi ni Jehova.
Basi Manamian Ka Man
PARTE SA AMON
Ngaa Dapat Tun-an ang Biblia?
Minilyon karon sa bilog nga kalibutan ang nakakita sang sabat sa importante nga mga pamangkot sa kabuhi sa bulig sang Biblia. Gusto mo man bala?
