INI nga mga pulong ni Shakespeare nagahisanto sa ginsiling sang maalam nga si Hari Solomon sang dumaan nga Israel sang nagligad nga mga 3,000 ka tuig: “Ang buangboang nagapati sang bisan ano, pero ang maalam nga tawo nagaandam sang iya kaugalingon nga tikang.” (Hulubaton 14:15, Maayong Balita) Huo, buangbuang lamang ang magapati sa tanan nga mabatian niya, nga nagapasad sang iya mga desisyon kag mga buhat sa indi masaligan nga mga laygay ukon mga panudlo. Subong sang paglapak sa gabok na nga latayan, mahimo nga madisgrasya kita kon magsayop kita sa kon ano ang dapat naton saligan. Mahimo mamangkot ka, ‘May yara bala panuytoy nga masaligan gid naton?’

Minilyon ka tawo sa bug-os nga kalibutan ang nagasalig gid sa dumaan nga libro nga ginatawag ang Balaan nga Biblia. Amo ini ang ginasaligan nila sa pagtuytoy sang ila mga tikang. Ang mga laygay kag mga panudlo sini amo ang ila ginasunod. Masiling bala nga nagalapak ini nga mga indibiduwal sa gabok na nga latayan? Ang sabat sa sini nga pamangkot nagadepende gid sa sabat sa isa pa ka pamangkot, May yara bala malig-on nga mga rason kon ngaa dapat saligan ang Biblia? Ginausisa sining pinasahi nga gua sang Magmata! ang ebidensia.

Indi tuyo sini nga gua sang Magmata! nga ipilit sa imo ang relihioso nga mga pagpati ukon mga pagtamod. Sa baylo, ipakita lamang sini ang mabakod nga ebidensia nga nagkumbinsi sa minilyon ka tawo nga masaligan gid ang Biblia. Kon mabasa mo na ang masunod nga mga artikulo, makadesisyon ka man kon bala masaligan gid ang Biblia.

Indi dapat pasapayanan ini nga topiko. Kay man, kon ang Biblia amo gid ang masaligan nga makuhaan sing panuytoy halin sa aton Manunuga, mapuslanon nga binagbinagon mo kag sang imo mga hinigugma kon ano ang ginasiling sang Biblia.

Apang, sambiton anay naton ang pila ka talalupangdon nga mga katunayan tuhoy sa Biblia. Isa gid ini ka pinasahi nga libro.