Ang Pagtamod sang Biblia

Ngaa Dapat Naton Ulikdan ang Aton Ginapuy-an nga Duta?

KON ipaanggid sa nagligad nga mga tion, mas makahalit sa aton planeta karon ang padayon nga ginahimo sang mga tawo. Samtang ang mga problema kaangay sang pag-init sang bug-os nga kalibutan labi pa nga makahaladlok, labi pa nga nagapanikasog man ang mga sientista, mga gobierno, kag mga negosyante nga tapnaon ini.

Indi bala nga dapat lang nga ulikdan naton ang aton ginapuy-an nga duta? Kon amo, paano? Nagahatag ang Biblia sing maayo nga mga rason agod manghikot kita para sa kaayuhan sang duta. Nagabulig man ini sa aton nga mangin balanse kita sa aton mga panikasog.

Pagsakdag sa Katuyuan sang Aton Manunuga

Gintuga ni Jehova nga Dios ang duta nga mangin tulad-hardin nga puluy-an sang katawhan. Sang matapos niya ang pagpanuga, nagsiling sia nga “tama gid kaayo” sini, kag gintulin niya sa tawo ang “pagpanguma kag pagbantay” sa duta. (Genesis 1:28, 31; 2:15) Paano ginatamod sang Dios ang kahimtangan sang duta karon? Maathag nga wala gid nahamuot ang Dios sa pag-abuso sang tawo sa duta, bangod ang Bugna 11:18 nagtagna nga ‘pagalaglagon niya ang mga nagalaglag sang duta.’ Gani, dapat kita mangin interesado sa nagakatabo sa duta.

Nagapasalig ang Biblia nga dulaon sang Dios ang tanan nga halit nga nahimo sang tawo sa duta kon ‘bag-uhon na niya ang tanan nga butang.’ (Bugna 21:5) Apang, indi kita dapat maghinakop nga tungod ipasag-uli sang Dios ang duta, indi importante ang bisan ano nga ginahimo naton karon. Importante gid ini! Paano naton mapakita nga nagaugyon kita sa pagtamod sang Dios sa aton duta kag sa iya katuyuan nga himuon ini nga isa ka paraiso?

Kon Paano Kita Makabulig Para sa Isa ka Matinlo nga Duta

Ang normal nga pagsinalayo sang tawo nagahigko sa aton duta. Maalamon nga  gindesinyo ni Jehova ang kinaugali nga mga siklo sa duta agod madula ang higko, sa amo magtinlo ang hangin, tubig, kag duta. (Hulubaton 3:19) Dapat maghisanto sa sini ang aton pagsinalayo. Gani, dapat kita maghalong nga indi naton madugangan pa ang problema sang aton ginapuy-an nga duta. Paagi sa sini, ginapakita naton nga ginahigugma naton ang aton isigkatawo subong sang aton kaugalingon. (Marcos 12:31) Binagbinaga ang makawiwili nga halimbawa sang panahon sang Biblia.

Ginsugo sang Dios ang pungsod sang Israel nga ilubong ang higko sang tawo “sa gowa sang dologan.” (Deuteronomio 23:12, 13) Bangod sini, matinlo ang dulugan kag madasig madunot ang higko. Amo man sa karon, ginatinguhaan sang matuod nga mga Cristiano nga ihaboy dayon sing nagakaigo ang ila mga basura. Kinahanglan nga maghalong gid kon delikado nga mga butang ang ginahaboy.

Madamo nga basura ukon mga usik ang magamit liwat ukon ma-recycle. Kon ginapatuman sang lokal nga kasuguan ang pag-recycle, nian, ang pagtuman sini isa ka paagi nga ginahatag naton kay “Cesar ang mga butang nga iya ni Cesar.” (Mateo 22:21) Mas mauti ang pag-recycle, apang ginapakita sini nga handum naton ang isa ka matinlo nga duta.

Pagpabalor sa Manggad sang Duta

Kinahanglan naton ang duna nga manggad agod may pagkaon kita, puluy-an, kag gatong. Paano naton mapabaloran ini nga mga regalo sang Dios sa aton? Sang ang mga Israelinhon nagpangayo sing karne sa kahanayakan, nagpadala si Jehova sing dagaya nga pitaw. Bangod sa kakagod, gin-abusuhan nila ini nga regalo, gani naakig gid si Jehova nga Dios. (Numeros 11:31-33) Ang Dios amo man gihapon tubtob karon. Gani, ginalikawan sang responsable nga mga Cristiano ang pataka nga paggamit sa manggad sang duta, nga mahimo tanda sang kakagod.

Ginatamod sang iban nga kinamatarong nila kon magpagusto sila sa paggamit sing enerhiya ukon iban pa nga mga manggad sang duta. Apang indi naton dapat uyangan ang duna nga mga manggad bangod masarangan naton ini ukon bangod bugana ini. Sa tapos milagruso nga ginpakaon ni Jesus ang daku nga kadam-an, nagsugo sia nga tipunon ang nabilin nga isda kag tinapay. (Juan 6:12) Wala gid gin-uyangan ni Jesus ang gin-aman sang iya Amay.

Mangin Balanse sa Aton mga Panikasog

Kada adlaw nagahimo kita sing mga desisyon nga nagaapektar sa aton ginapuy-an nga duta. Dapat bala kita maghimo sing indi kinaandan nga mga butang subong sang pagpalayo sa mga tawo agod malikawan ang paghalit sa aton ginapuy-an nga duta? Wala gid ina ginapanugyan sang Biblia. Binagbinaga ang halimbawa ni Jesus. Sang diri sia sa duta, nagkabuhi sia sing normal, amo nga natuman niya ang pagbantala nga hilikuton nga gintangdo sa iya sang Dios. (Lucas 4:43) Dugang pa, wala si Jesus nakigbahin sa pulitika agod masolbar ang mga problema sadtong tion. Maathag nga nagsiling sia: “Ang akon ginharian indi iya sining kalibutan.”​—Juan 18:36.

Nagakaigo, nian, nga binagbinagon naton kon ano ang epekto sa aton duta sang mga desisyon nga ginahimo naton kaangay sang pagpamalaklon para sa panimalay, transportasyon, kag paglingawlingaw. Halimbawa, ang iban nagabakal sing mga produkto nga indi tanto makahalit sa palibot. Ginalimitehan sang iban ang pagpakigbahin sa mga hilikuton nga makatuga sing polusyon ukon nagauyang sang duna nga mga manggad.

Kon ano man ang aton desisyon para sa aton ginapuy-an nga duta, indi naton dapat ipilit ini sa iban. Indi palareho ang lokal kag indibiduwal nga mga kahimtangan sang mga tawo. Apang, may salabton ang kada isa sa aton kon ano ang aton mga desisyon. Subong sang ginsiling sang Biblia, “ang tagsa ka tawo magdala sang iya kaugalingon nga lulan.”​—Galacia 6:5.

Gintulin sang Manunuga sa tawo ang pag-atipan sa duta. Ang pag-apresyar sa sini kag ang mapainubuson nga pagtahod sa Dios kag sa iya mga tinuga, dapat magpahulag sa aton nga maghalong gid sa aton mga desisyon nga nagaapektar sa aton ginapuy-an nga duta.

NAMANGKOT KA BALA?

▪ Lubaron bala sang Dios ang mga problema nga nagaapektar sa duta mismo?​—Bugna 11:18.

▪ Ano nga katungdanan para sa duta ang gintulin sang Dios sa mga tawo?​—Genesis 1:28; 2:15.

▪ Paano ginpakita ni Jesucristo nga wala niya gin-uyangan ang aman sang iya Amay?​—Juan 6:12.