Ang Pagtamod sang Biblia

Ano ang Buot Silingon nga ang Bana Amo ang Ulo?

SA MADAMO nga kadutaan ang seremonya sa kasal nagalakip sang pagsumpaanay kag nagapangako ang nobya nga tumanon niya ang iya bana. Apang, madamo gihapon nga babayi ang indi luyag nga ang ila bana amo ang ila ulo. Binagbinaga ang ginatudlo sang Biblia tuhoy sa sini nga butang. Masapwan mo nga ang ginatudlo sang Biblia timbang kag praktikal.

Gintangdo sang Dios nga Pagkaulo

Ginlaragway sa Biblia ang pagkaulo sa Efeso 5:22-24: “Ang mga asawa magpasakop sa ila bana subong nga sa Ginuo, bangod ang bana amo ang ulo sang iya asawa subong nga si Cristo amo man ang ulo sang kongregasyon . . . Sa katunayan, subong  nga ang kongregasyon nagapasakop kay Cristo, amo man ang mga asawa sa ila bana sa tanan nga butang.” Subong “ulo sang iya asawa,” dapat pangunahan sang bana ang iya pamilya, kag sundon sang asawa ang iya pagpanguna kag tahuron ang iya pagkaulo.​—Efeso 5:33.

Ang awtoridad sang bana may limitasyon kay dapat sia gihapon magpasakop sa Dios kag kay Cristo. Wala sia sing kinamatarong nga suguon ang iya asawa nga lapason ang kasuguan sang Dios ukon ikompromiso ang iya nahanas sa Biblia nga konsiensia. Walay sapayan sini, ginhatagan sia sang Dios sing responsibilidad nga maghimo sing importante nga mga desisyon para sa pamilya.​—Roma 7:2; 1 Corinto 11:3.

Ginasugo sang Biblia ang bana nga ipakita ang iya pagkaulo sing masinakripisyuhon, kag ginauna ang kaayuhan sang iya asawa sangsa iya kaugalingon. Ang Efeso 5:25 nagasiling: “Mga bana, padayon nga higugmaa ang inyo asawa, subong nga si Cristo naghigugma man sang kongregasyon kag nagtugyan sang iya kaugalingon tungod sa sini.” Ang bana nga nagasunod sa talalupangdon nga halimbawa ni Jesus sang gugma wala nagagamit sang iya katungdanan subong ulo para lamang sa iya kaugalingon nga kaayuhan.

Dugang pa, ginasugo sang Biblia ang bana nga magpuyo upod sa iya asawa “suno sa ihibalo.” (1 Pedro 3:7) Indi lamang niya hibaluon ang pisikal kag emosyonal nga mga kinatuhayan sang mga lalaki kag mga babayi, kundi dapat man mahangpan niya ang mga kinahanglanon sang iya asawa.

“Sia ang Imo Kaupud”

Ang pagpasakop bala sang asawa nagakahulugan nga masunod lang sia pirme sa iya bana? Binagbinaga ang halimbawa ni Sara, nga ginsambit sa Biblia subong huwaran sang pagkamatinumanon sa iya bana, nga si Abraham. (1 Pedro 3:5, 6) Nagpasakop sia kay Abraham sa dalagku kag magagmay nga mga butang, gikan sa pagbiya sa komportable nga puluy-an kag nagpuyo sa mga tolda tubtob sa paghanda sing pagkaon sing dalidali. (Genesis 12:5-9; 18:6) Apang, tuhoy sa serioso nga mga butang, sulitsulit nga ginpabutyag niya ang iya pagtamod bisan pa indi ugyon sa sini si Abraham. Natabo ini sang luyag niya pahalinon sa ila panimalay ang babayi ni Abraham nga si Hagar kag ang iya panganay nga anak nga si Ismael. Sa baylo nga sabdungon si Sara, nagsiling ang Dios kay Abraham nga “pamatii ang iya tingog.” Samtang, padayon nga nagpasakop kag naghulat si Sara sa desisyon ni Abraham, sa baylo nga palakton niya mismo sanday Hagar kag Ismael.​—Genesis 21:8-14, NW.

Ginapakita sang halimbawa ni Sara nga sa baylo nga magsunod lamang sa gusto sang iya bana, ang asawa may talahuron nga katungdanan kag sia “kaupud” sang iya bana. (Malaquias 2:14) Subong kaupod, nagaamot sia sing malahalon nga mga ideya ukon panugda sa mga desisyon sang pamilya kag may katungdanan sia sa pamilya, nga amo ang pag-atipan sa madamo nga hilikuton sa balay kag bisan pa gani sang pinansial nga mga butang. Siempre, subong ulo sang pamilya, ang bana amo ang responsable sa paghimo sang katapusan nga mga desisyon.​—Hulubaton 31:10-31; 1 Timoteo 5:14.

Pagtahod sa Manunuga

Gintuga ni Jehova nga Dios ang lalaki kag babayi, kag gintukod niya ang pag-asawahay subong sagrado nga paghiusa sa tunga nila. (Genesis 2:18-24) Ginhatagan man sang Dios sing espesipiko nga papel ang bana kag asawa nga magahatag sa ila sing labing daku nga kalipay.​—Deuteronomio 24:5; Hulubaton 5:18.

Subong Tagtukod sang pag-asawahay, may kinamatarong kag ikasarang si Jehova sa pagpahamtang sing mga talaksan para sa kahimusan sang pag-asawahay. Ang mga magtiayon nga nagatuman sang ila tagsa ka papel kag nagapasakop sa kahimusan sang Dios sa pagkaulo, indi lamang bangod praktikal ini kundi bangod ginatahod nila ang awtoridad sang Dios, makabaton sang iya pagpakamaayo kag pagsakdag.

NAMANGKOT KA BALA?

▪ Sin-o ang nagpahamtang sing himpit nga huwaran sa pagkaulo?​—Efeso 5:25.

▪ May limitasyon bala ang awtoridad nga ginhatag sang Dios sa bana?​—1 Corinto 11:3.

▪ Ano ang katuyuan sang pag-asawahay kag sang kahimusan sa pagkaulo?​—Hulubaton 5:18.

[Retrato sa pahina 28]

Mangin malipayon ang mag-asawa kon sundon sang bana ang halimbawa ni Cristo sa pagkaulo